ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
• ʻOku malava ke ʻi ai ha toetuʻu kapau ʻe mate ha kiʻi tama ʻoku faʻu ʻi manava ki muʻa ke fāʻeleʻí?
ʻOku kamata ʻa e moʻuí ʻi hono tuʻituʻiaʻí. ʻE lava ke fokotuʻu hake ʻe Sihova ʻa e faʻahinga tāutaha ʻi ha faʻahinga tuʻunga pē ʻo e moʻuí koeʻuhí “ʻoku malava ʻa e meʻa kotoa pē ki he ʻOtua.” (Mk. 10:27) Ka ʻoku ʻikai tala hangatonu mai ʻe he Tohi Tapú ia pe te ne fokotuʻu hake ʻa e fānaú teʻeki fāʻeleʻi naʻa nau mate ʻoku nau kei ʻi manavá.—4/15, peesi 12, 13.
• Ko e hā ʻe lava ai ke tau maʻu ʻaonga mei hono siofi ʻa e fanga loó, safaná, heʻé mo e mokó?
Ko e meʻamoʻui ko eni ʻe faá ʻoku nau fakatātaaʻi ʻa e poto fakanatula. Ko ia ai, ʻoku nau fakahīkihikiʻi ʻa e poto ʻo e ʻOtuá. (Pal. 30:24-28)—4/15, peesi 16-19.
• Ko e hā ʻoku fakamatala lelei ai ʻa e Tohi Tapú fekauʻaki mo e fakalongolongó?
ʻOku fakahaaʻi ai ko e fakalongolongó ʻoku lava ke hoko ia ko ha fakaʻilonga ʻo e fakaʻapaʻapa, ko ha tokoni ia ki he fakalaulaulotó, pea ko ha fakamoʻoni ʻo e fakapotopoto mo e ʻiloʻilo. (Sāme 37:7; 63:6; Pal. 11:12)—5/15, peesi 3-5.
• Ko e ngaahi tuʻi Siuta ʻe toko fiha naʻe tuʻu-ki-muʻa ʻenau fakahāhā ʻa hono mamahiʻi ʻa e fale ʻo e ʻOtuá?
Ko e tuʻi ʻe 19 naʻa nau puleʻi ʻa e puleʻanga fakatonga ʻo Siutá, pea ko e toko fā naʻe ʻiloa ʻi heʻenau mamahiʻí—ko ʻAsa, Sihosafate, Hesekaia pea mo Siosaia.—6/15, peesi 7-11.
• ʻOku kau ʻa e kau Kalisitiane pani kotoa ʻi he māmaní ʻi hono tokonaki mai ʻo e meʻakai fakalaumālié?
ʻIkai. Ko e faʻahinga kotoa ʻoku paniʻaki ʻa e laumālie ʻo e ʻOtuá ko e konga kinautolu ʻo e kalasi tamaioʻeiki anga-tonu mo potó, ka ko e faʻahinga ʻoku faʻuʻaki ʻa e Kulupu Pulé ʻoku nau tokangaʻi ʻa hono ʻomai ʻo e meʻakai fakalaumālié.—6/15, peesi 22-24.
• Ko e ngaahi tafaʻaki fē ʻoku totonu ke akoʻi ai ʻe he ngaahi mātuʻá ʻenau kau talavoú ki muʻa ke nau mavahe mei ʻapí?
ʻOku totonu ke nau lava ʻo tauhi maʻu ha founga-tuʻumaʻu fakalaumālie, fai ʻa e ngaahi fili lelei, fetuʻutaki lelei mo e niʻihi kehé, tokanga ki he moʻui lelei fakafoʻituituí, levaʻi lelei ʻa e meʻa fakapaʻanga fakafoʻituituí, fakamaʻa mo tauhi ha ʻapi pe ko ha ʻapaatimeni pea mo ʻoua ʻe fakafalala.—7/1 peesi 12.
• Ko e hā ʻoku mahuʻinga ai ʻa e taʻu 2009 ki he Kau Fakamoʻoni ʻa Sihová?
ʻI he 1909 naʻe hiki ai ʻa e ʻuluʻiʻapitanga ʻo e Sōsaieti Taua Leʻo Tohi Tapu mo e Tulekí, ʻa e kautaha fakalao ʻa e kautaha faipulusi ʻoku ngāueʻaki ʻe he Kau Fakamoʻoni ʻa Sihová, mei Pittsburgh, Pennsylvania, ki Brooklyn, Niu ʻIoke, ʻa ia ʻoku hokohoko atu ai ʻene ngāué.—7/1, peesi 22-24.
• Ko e hā ʻoku lava ai ke pehē ko e ʻofá ko ha faikehekehe tefito ia ʻi he tōʻongafai ʻa Sīsuú pea mo e tōʻongafai ʻa e kau taki lotú?
ʻI he ʻikai ʻofa ʻi he kakai lāuvalé, naʻe fehiʻanekinaʻi kinautolu ʻe he kau taki lotu ko iá. ʻIkai ko ia pē, naʻe ʻikai te nau ʻofa ki he ʻOtuá. Naʻe ʻofa ʻa Sīsū ʻi heʻene Tamaí pea naʻe ueʻi ia ʻe heʻene fakaʻofaʻia ki he kakaí. (Mt. 9:36) Naʻá ne loto-māfana, kaungāongoʻi, mo anga-lelei kia kinautolu.—7/15, peesi 15.