ʻOku Talaʻofa Atu ʻe he ʻOtuá ha Koloa?

‘ʻOku fiemaʻu ʻe he ʻOtuá ke ke koloaʻia—ke lahi ʻa e kā ʻi he tauʻanga meʻalelé, ke ʻi ai haʻo pisinisi lakalakaimonū. Tui pē koe kiate ia, fakaava hoʻo uāletí, pea ʻoange kiate ia ʻa e meʻa kotoa ʻokú ke malava ke foakí.’

KO E pōpoaki ia ʻoku pouaki ʻe he ngaahi kulupu fakalotu ʻe niʻihi ʻi Pelēsila, fakatatau ki he lau ʻa ha nusipepa ʻoku pulusi ai. Ko ha pōpoaki ia ʻoku fakakaukau fakamātoato ki ai ʻa e tokolahi. ʻI he fekauʻaki mo ha savea naʻe fai ʻi ʻAmelika fekauʻaki mo e kakai ʻoku nau taukaveʻi ko e kau Kalisitiane kinautolú, ʻoku fakamatala ʻi he makasini Time: “Ko ha 61% naʻa nau tui ʻoku fiemaʻu ʻe he ʻOtuá ke tuʻumālie ʻa e kakaí. Pea ko e 31% . . . naʻa nau loto-tatau kapau te ke foaki hoʻo paʻangá ki he ʻOtuá, te ne tāpuakiʻi koe ʻaki ʻa e paʻanga lahi ange.”

Ko e faʻahinga fakakaukau peheni, ʻoku faʻa ui ko e teolosia tuʻumālié, ʻoku fakautuutu ʻene lahí tautefito ʻi he ngaahi fonua ʻAmelika-Latiná, hangē ko Pelēsilá, pea ʻoku ʻaukolo ʻa e kakaí ki he ngaahi siasi ʻoku talaʻofa ai ʻa e ngaahi tāpuaki fakamatelie mei he ʻOtuá. Ka ʻoku talaʻofa moʻoni ʻe he ʻOtuá ʻa e koloaʻia ki he faʻahinga ʻoku tauhi kiate iá? Naʻe koloaʻia ʻa e kau sevāniti kotoa ʻa e ʻOtuá ʻi he kuohilí?

Ko e moʻoni ʻi he ngaahi Konga Tohi Tapu Faka-Hepeluú, ʻoku tau faʻa ʻiloʻi ai ko e tāpuaki ʻa e ʻOtuá ʻoku ʻalu fakataha ia mo e tuʻumālie fakamatelie. Ko e fakatātaá, ʻi he Teutalonome 8:18, ʻoku tau lau ai: “Te ke manatu pe kia Sihova ko ho ʻOtua, he ko ia ia ʻoku ne foaki kiate koe ʻa e mafai ke ngaohi koloa.” Naʻe fakapapauʻi ʻe he meʻá ni ki he kau ʻIsilelí kapau naʻa nau talangofua ki he ʻOtuá, naʻá ne ʻai kinautolu ke hoko ko ha puleʻanga tuʻumālie.

Fēfē ʻa e faʻahinga tāutahá? Ko e tangata faitōnunga ko Siopé naʻe koloaʻia lahi ʻaupito, pea ʻi he hili hono fakamasivaʻi ia ʻe Sētané, naʻe toe fakafoki ʻe Sihova ʻa e koloa ʻa Siopé “ʻo liunga ua.” (Siope 1:3; 42:10) Ko ʻĒpalahame foki naʻe koloaʻia. ʻOku pehē ʻi he Senesi 13:2 naʻá ne ‘moū ʻaupito ʻi he fanga manú, pea ʻi he siliva mo e koula.’ ʻI he taimi naʻe puke ai ʻe he kau tau fakatahataha ʻa e ngaahi tuʻi ʻe fā ʻi he Hahaké ʻa Lote naʻe fohaʻaki ʻe ʻĒpalahamé, naʻe “fakateholo atu [ʻa ʻĒpalahame] mo ʻene kau tau [kuo akoʻi], ko e kakai tonu ʻo hono ʻapi, ko e toko tolungeau mo e toko hongofulu ma valu.” (Senesi 14:14) ʻI he ʻi ai ʻa e ‘kau tangata kuo akoʻi’ ʻe toko 318 naʻa nau malava ke toʻo meʻataú, ʻoku pau pē ko e fāmili ʻo ʻĒpalahamé naʻe mātuʻaki tokolahi. Ko e moʻoniʻi meʻa ko ia ʻene malava ke tauhi ha fuʻu fāmili tokolahi peheé ʻoku fakahaaʻi ai ko ha tangata koloaʻia ʻaupito ia, mo tokolahi ʻene fanga monumanú.

ʻIo, ko e tokolahi ʻo e kau sevāniti faitōnunga ʻa e ʻOtuá ʻi he kuohilí​—ko ʻĒpalahame, ʻAisake, Sēkope, Tēvita, Solomone, ko e hingoa pē eni ʻo e niʻihi—​naʻa nau koloaʻia. Kae kehe, ʻoku ʻuhinga ení ʻe ʻai ʻe he ʻOtuá ʻa e tokotaha kotoa ʻoku tauhi kiate iá ke koloaʻia? ʻI he tafaʻaki ʻe tahá, ko e moʻoniʻi meʻa ko ia ʻo e masiva ʻa ha tahá ʻoku ʻuhinga iá ʻoku ʻikai te ne maʻu ʻa e tāpuaki ʻa e ʻOtuá? Ko e kupu hokó ʻe lāulea ai ki he ongo fehuʻi ko ení.