Lavameʻa ʻa e Feingangāue Makehe ʻi Pulukāliá
“Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.”—MT. 9:37, 38.
HE FEʻUNGAMĀLIE Ē ko e ngaahi lea ko ia ʻa Sīsuú mo e tuʻunga ʻi Pulukālia, ko ha fonua fakaʻofoʻofa ʻi he Palakaná he tonga-hahake ʻo ʻIulopé! ʻOku ʻi ai ha fiemaʻu moʻoni ʻo e kau ngāue tokolahi ange ke nau ʻoatu ʻa e ongoongo leleí ki he kakai laka hake he toko fitu milioná. ʻOku ʻi ai nai ʻa e kau malanga ʻe toko 1,700 ʻi Pulukālia, ka ʻoku ʻikai malava ke nau kāpui ʻa e feituʻu ngāué kotoa. Fakatatau ki ai, naʻe tali ai ʻe he Kulupu Pulé ke fakaafeʻi ʻa e Kau Fakamoʻoni lea faka-Pulukālia mei he ngaahi fonua ʻIulope ʻe niʻihi ke nau haʻu ʻo kau ʻi ha feingangāue makehe ʻi he 2009. Naʻe fakataimitēpileʻi ʻa e feingangāué ki he uike ʻe fitu lolotonga ʻa e taimi māfaná, ʻo tumutumuʻaki ʻa e Fakataha-Lahi Fakavahe “Hanganaki Leʻo!” ʻi Sofia, ʻi ʻAokosi 14-16, 2009.
Tali ʻe he Fuʻu Tokolahi
Ko e fanga tokoua ʻi he ʻōfisi vaʻa ʻi Sofia naʻa nau fifili pe ko e toko fiha mei Falanisē, Kalisi, Pōlani, Siamane, Sipeini mo ʻĪtali te nau talí. ʻE ʻuhinga iá ko e fononga ki Pulukālia ʻi heʻete fakamole pē ʻaʻata pea fakamoleki ʻa e taimi mālōloó ʻi he malangá. He fakafiefia ē ko ia ʻi he faai ki he tokolahi ange ʻi he uike ki he uike ʻa e kau tohi kolé, ʻo aʻu ai ki he toko 292! ʻI he fuʻu tali tokolahi peheé, ʻe malava ai ke vaheʻi ʻa e kau ngāue pole ko ení ki he kolo lalahi Pulukālia kehekehe ʻe tolu: Ko Kazanlak, Sandanski mo Silistra. Naʻe fakaafeʻi ʻe he kau ʻovasia sēketi ʻi Pulukāliá ʻa e kau tāimuʻa mo e kau malanga ʻi he feituʻú ke nau poupou foki ki he feingangāué. Naʻe iku ʻo malanga faivelenga ʻa e kau ngāue pole ʻe toko 382 ʻi he ngaahi feituʻu ngāue ʻa ia naʻe tātātaha ke aʻu ki ai mo e ongoongo leleí.
Ko e fanga tokoua mei he ngaahi fakatahaʻanga ofi maí naʻe fekauʻi atu kinautolu ki muʻa, ke nau fokotuʻutuʻu ha ngaahi nofoʻanga. Naʻa nau totongi ha ngaahi ʻapaatimeni pea taʻofi ʻa e ngaahi hōtele naʻe maʻamaʻá. Ko e fanga tokoua ko eni he feituʻú naʻa nau ngāue taʻehelaʻia ʻi he tokoni ki he kau ngāue pole ne aʻu maí ke nau nofo lelei ki honau nofoʻangá pea tokangaʻi leva ʻenau ngaahi fiemaʻú. ʻI he kolo lalahi kotoa ʻe tolú, naʻe totongi ai ha ngaahi feituʻu ke fai ai ʻa e fakatahá. Naʻe fai ʻa e ngaahi fokotuʻutuʻu ke fai ʻa e ngaahi fakataha ʻa e fakatahaʻangá ʻe he fanga tokoua ʻaʻahí. Naʻe fakafiefia ke sio ko e ngaahi feituʻu naʻe ʻikai nofo ai naʻa mo ha Fakamoʻoni ʻe toko tahá, naʻe fakataha ai ʻa e kau malanga ʻe toko 50 ke fakahīkihikiʻi ʻa Sihova.
Ko e faivelenga ʻa e faʻahinga ko ianaʻa nau haʻu mei he ngaahi fonua kehé ki he feingangāué naʻe lahi ʻaupito. Lolotonga ʻa e taimi māfaná, ko e fua māfana ʻo e ʻeá ʻi Pulukāliá naʻe lava ke aʻu ʻo laka hake he tikilī Selosiasi ʻe 40. Kae kehe, naʻe ʻikai ha meʻa ʻe lava ke ne taʻofi ʻa e fanga tokoua mo e fanga tuofāfine faivelenga ko ení. Ko Silistra, ko ha kolo ʻi he Vaitafe Danube ʻoku ʻi ai ʻe kakai laka hake he toko 50,000, naʻe fai ai ha fakamoʻoni fakaʻāuliliki ʻi he ʻuluaki uike ʻe tolú. Ko ia ai, naʻe fakaaʻu atu ʻe he fanga tokouá ʻenau ngāué ki he ngaahi kolo ofi maí, naʻa mo ʻenau aʻu ki Tutrakan, ʻi he kilomita ʻe 55 ki he hihifo ʻo Silistra. Naʻe faʻa kamata ʻenau malangá ʻi he 9:30 pongipongi. Hili ha mālōlō hoʻatā, naʻa nau faʻa hokohoko atu ʻo aʻu ki he 7:00 efiafi pe fuoloa ange ai. ʻI he tuʻunga meimei tatau, koeʻuhi ko e faivelenga lahi ʻa e kau ngāue pole ko ení, naʻe aʻu ai ʻa e feingangāue ʻi Kazanlak mo Sandanski ki he fanga kiʻi kolo kaungāʻapí mo e ngaahi kolo lalahí.
Ko e Hā Naʻe Lavaʻí?
Naʻe fai ha fakamoʻoni tuʻu-ki-muʻa lolotonga ʻa e uike ko eni ʻe fitú. Hangē ko ia naʻe leaʻaki ʻi he ngaahi ʻaho ʻo e kau ʻapositoló, ko e kakai ʻo e ngaahi kolo lalahi ko ení naʻe lava ke nau pehē, ‘Kuo mou fakafonu ʻa homau koló ʻaki hoʻomou akonakí.’ (Ng. 5:28) Ko e Kau Fakamoʻoni naʻe kau ʻi he ngāué naʻa nau tufa ʻa e makasini ʻe 50,000 nai pea kamata ʻa e ako Tohi Tapu ʻe 482. Ko e meʻa fakafiefiá, he ʻi Sepitema 1, 2009, naʻe fokotuʻu ai ha fakatahaʻanga ʻi Silistra, pea ʻoku ʻi ai ʻa e ngaahi kulupu ʻi Kazanlak pea ʻi Sandanski. ʻOku fakalotomāfana ke sio ki he fakalakalaka lelei fakalaumālie ʻa e faʻahinga tāutaha ko e ʻuluaki taimi ia naʻa nau fanongo ai ki he ongoongo leleí ʻi he lolotonga ʻa e feingangāue ko ení.
ʻI he ʻuluaki uike ʻo e feingangāué, naʻe malanga ai ha tuofefine tāimuʻa makehe lea faka-Pulukālia mei Sipeini kia Karina, ko ha fefine ʻi Silistra ʻa ia naʻe tuʻuaki nusipepa ʻi he halá. Naʻe fakahāhā ʻe Karina ʻa e mahuʻingaʻia peá ne haʻu ki ha fakataha. Naʻá ne tali lelei ha ako Tohi Tapu. Ko hono malí ko ha tokotaha fakaʻikaiʻi-ʻOtua, ko ia naʻá ne kole ai ke fai ʻene ako Tohi Tapú ʻi ha paʻake. Naʻe kau ʻi he ako Tohi Tapú ʻa ʻene ongo tamaiki fefiné. Ko e taʻahine lahí, ko Daniela, naʻá ne fakahāhā ha houngaʻia anga-kehe ki he moʻoni Fakatohitapú. Naʻá ne lau ʻa e tohi Akoʻi ʻe he Tohi Tapú ʻi ha uike pea ngāueʻaki leva ʻa e meʻa ʻoku leaʻaki ʻe he Tohi Tapú fekauʻaki mo e ʻikai ngāueʻaki ʻa e ngaahi ʻīmisí ʻi he lotú. Pea naʻá ne kamata leva ke vahevahe atu ʻa e moʻoní ki hono ngaahi kaumeʻá. ʻI he uike pē ʻe tolu hili ʻene ʻalu ki heʻene ʻuluaki fakataha ʻi he fakatahaʻangá, naʻá ne pehē ange ki he tuofefine naʻá ne fai ʻa e akó: “ʻOku ou ongoʻi ʻe au ʻo hangē ko ha taha au ʻo kimoutolú. Ko e hā ʻoku pau ke u fai koeʻuhi ke u lava ai foki ʻo kamata malanga?” ʻOku hokohoko atu hono fai ʻe Daniela ʻa e fakalakalaka lelei, fakataha mo ʻene faʻeé mo hono tehiná.
ʻI Kazanlak, ko ha tokoua Pulukālia ko Orlin, ʻa ia naʻe haʻu mei ʻĪtali ki he feingangāué, naʻá ne luelue ki hono nofoʻangá ʻi he hili ʻa e ngāue fakamalangá. ʻI heʻene fonongá, naʻe faifakamoʻoni ai ʻa Orlin ki he ongo talavou naʻá na tangutu he sea ʻi ha paʻake. Naʻá ne ʻoange kia kinaua ha tatau ʻo e tohi Akoʻi ʻe he Tohi Tapú pea fokotuʻutuʻu ki ha toe ʻaʻahi he ʻaho hono hokó. ʻI he ʻaʻahi ko iá, naʻe kamata ai ʻe Orlin ha ako Tohi Tapu mo Svetomir ʻa ia naʻe toe hoko atu ʻi he ʻaho pē hono hokó. ʻI he ʻaho ʻe hiva, naʻe ako tuʻo valu ai ʻa Orlin mo Svetomir. Naʻe fakamatala ʻa Svetomir: “ʻI he ʻaho ʻe ua ki muʻa ke u fetaulaki mo koé, naʻá ku lotu ai ki he ʻOtuá ki ha tokoni ke u hoko ʻo ʻiloʻi ia. Pea naʻá ku palōmesi kapau te ne tokoniʻi au, te u fakatapui ʻeku moʻuí kiate ia.” Hili e foki ʻa Orlin ki ʻĪtalí, naʻe hokohoko atu ʻe he fanga tokoua he feituʻú ʻa e ako mo Svetomir, pea ʻokú ne ʻai ʻa e moʻoní ko ʻene meʻa.
Tāpuaki Lahi ki he Niʻihi Naʻa Nau Fai ʻa e Feilaulaú
ʻOku anga-fēfē ongoʻi ʻa e faʻahinga ko ia naʻa nau ngāueʻaki loto-fiefoaki honau taimi mālōloó pea folau ʻi he fakamole pē ʻanautolu ki ha fonua ʻe taha ke malangaʻi ai ʻa e ongoongo leleí? Ko ha mātuʻa ʻoku ngāue ʻi Sipeini naʻá ne tohi: “Kuo hanga ʻe he feingangāue ʻi he feituʻu ngāue ʻi Pulukāliá ʻo fakatahatahaʻi ʻa e fanga tokoua Sipeiní ʻo nau toe vāofi ange. Naʻe maongo lahi ia ki he fanga tokoua naʻa nau kau ki aí.” Naʻe tohi ʻe ha ongo meʻa mei ʻĪtali: “Ko e māhina fakalata taha eni ʻi heʻema moʻuí!” Naʻá na toe pehē: “Naʻe liliu ʻe he feingangāué ʻema moʻuí! ʻOkú ma kehe he taimí ni.” Ko e ongo meʻá ni naʻá na kamata fakakaukau fakamātoato fekauʻaki mo e ala lava ke na hiki ʻosi ki Pulukālia ke ngāue ʻi he feituʻu ʻoku lahi ange ai ʻa e fiemaʻú. Ko Carina ko ha tuofefine tāimuʻa tuʻumaʻu teʻeki mali ia mei Sipeini naʻe tokoni ʻi he feingangāue ʻi Silistra. ʻI he hili iá naʻá ne tukuange ʻene ngāue ʻi Sipeiní pea hiki ki Pulukālia ke poupou ki he fakatahaʻanga foʻou ʻi he kolo lahi ko iá. Naʻá ne fakahū ʻa e paʻanga feʻunga ke nofo ai ʻi ha taʻu ʻi Pulukālia. ʻOku pehē ʻe Carina fekauʻaki mo ʻene filí: “ʻOku ou fiefia ʻaupito ʻi hono fakaʻatā au ʻe Sihova ke u ngāue heni ʻi Pulukāliá, pea ʻoku ou fakaʻamu ʻe malava ke u nofo ai pē heni ʻi ha taimi lōloa. Kuo ʻosi ʻi ai ʻeku ako Tohi Tapu ʻe nima, pea ko e toko tolu ai ʻoku nau maʻu ʻa e ngaahi fakatahá.”
Naʻe loto ha tuofefine ʻĪtali ke kau ʻi he feingangāué, ka ʻi heʻene toki kamata ʻi ha ngāue foʻoú, naʻe ʻikai ʻi ai haʻane ngaahi ʻaho mālōlō. ʻI he ʻikai toe holomuí, naʻá ne kole ai ke livi taʻevahe ʻi ha māhina ʻe taha pea naʻá ne mateuteu ke fakafisi mei heʻene ngāué kapau heʻikai tali ʻa ʻene kolé. ʻI heʻene ʻohovalé, naʻe pehē ange ʻe hono pule ngāué: “Sai, ka ko e meʻa pē ʻe taha: Kuo pau ke ke lī mai kiate au ha pousikaati mei Pulukālia.” Naʻe ongoʻi moʻoni ʻe he tuofefiné kuo tali ʻe Sihova ʻene ngaahi lotú.
Ko Stanislava, ko ha kiʻi tuofefine ia mei he kolo lahi ko Varna ʻi Pulukālia ʻa ia naʻe ngāue taimi-kakato ʻi ha ngāue vahe lelei, naʻá ne livi mei he ngāué ke kau ʻi he feingangāue ʻi Silistra. ʻI heʻene sio ki he fiefia ʻa e kau tāimuʻa tokolahi kuo nau haʻu mamaʻo ʻaupito ke malangaʻi ʻa e ongoongo leleí ʻi hono fonuá, naʻe maongo kiate ia ʻo ne fakatō loʻimata. Naʻá ne kamata fakakaukau fekauʻaki mo e meʻa naʻe faiʻaki ʻene moʻuí, ʻi he tuli ki ha ngāue fakamāmaní. ʻI heʻene foki ki ʻapi hili ʻa e uike ʻe ua, naʻá ne tukuange ai ʻene ngāué ʻo ne hoko ko ha tāimuʻa tuʻumaʻu. ʻOkú ne ongoʻi fiefia moʻoni he taimí ni, ʻi heʻene manatuʻi hono Tokotaha-Fakatupú ʻi heʻene kei talavoú.—Koh. 12:2 (12:1, PM).
Ko ha tāpuaki ē ko ia ke hoko ʻo longomoʻui ʻi he ngāue ʻa Sihová. ʻOku ʻikai ha meʻa lelei ange ʻe lava ke ke fai ʻi hono vaheʻi ho taimí mo e iví ki he ngāue mahuʻinga ʻo e faiako mo hono malangaʻi ʻa e ongoongo leleí. ʻOku ʻi ai ha ngaahi founga ʻe lava ke ke fai fakafoʻituitui ke fakalahi ʻa hoʻo kau ʻi he ngāue fakafaifekau fakahaofi-moʻui ko ení? ʻOku ʻi ai nai ha ngaahi feituʻu ʻi ho fonuá tonu ʻa ia ʻoku lahi ange ai ʻa e fiemaʻú. ʻE lava ke ke hiki ki ha feituʻu pehē? Pe te ke fakakaukau nai ke ako ha lea ʻe taha ke tokoniʻi ʻa e kakai ʻi ho fonuá ʻa ia ʻoku nau fieinua ki he moʻoni Fakatohitapú. Ko e hā pē ha ngaahi feʻunuʻaki ʻe lava ke ke fai ke fakalahi ai hoʻo kau ʻi he ngāue fakafaifekaú, ʻe lava ke ke fakapapauʻi ʻe tāpuakiʻi lahi koe ʻe Sihova.—Pal. 10:22.
[Puha/Fakatātā ʻi he peesi 32]
Ko ha ʻAho Fakangalongataʻa
Ko e tokolahi ʻo e faʻahinga ko ia naʻa nau haʻu mei he ngaahi fonua ʻIulope kehé ke poupouʻi ʻa e feingangāue makehe ʻi Pulukāliá naʻa nau palani ke maʻu ʻa e Fakataha-Lahi Fakavahe “Hanganaki Leʻo!” ʻi Sofia. Naʻe fakalototoʻa ʻaupito ki he fanga tokoua mo e fanga tuofāfine fakalotofonuá ke feʻiloaki mo e fuʻu kau ʻaʻahi tokolahi mei he ngaahi fonua kehekehe. He fiefia moʻoni ē ko e toko 2,039 naʻa nau maʻu iá ʻi hono tukuange mai ʻe Tokoua Geoffrey Jackson ʻo e Kulupu Pulé ʻa e New World Translation of the Holy Scriptures kakato ʻi he lea faka-Pulukāliá! Ko e faʻahinga kotoa naʻa nau ʻi ai he Falaité naʻa nau fakahāhā ʻenau houngaʻia moʻoni mei he lotó fakataha mo e loto-māfana mo e pasipasi lōloa. Naʻe aʻu ʻo fakatō loʻimata ʻi he fiefia ʻa e tokolahi. Ko e liliu tonu ko eni ʻi he lea faingofua ke mahinoʻí ʻe tokoniʻi ai ʻa e kakai Pulukālia loto-moʻoní ke nau hoko ʻo ʻiloʻi ʻa Sihova.
[Mape ʻi he peesi 31]
(Sio ki he tohi ki he fakamatala kakato)
PULUKĀLIA
SOFIA
Sandanski
Silistra
Kazanlak
[Fakatātā ʻi he peesi 31]
Naʻe fai ha fakamoʻoni tuʻu-ki-muʻa lolotonga ʻa e uike ʻe fitu ko iá