ʻUhinga Ne Hao Ai ʻa e Tohi Tapú

Kuo hao mai ʻa e Tohi Tapú. Ko hono olá, ʻoku lava ke ke maʻu mo lau hano tatau ʻi he ʻahó ni. Pea ʻi hoʻo fili ha liliu Tohi Tapu lelei, ʻokú ke tuipau ʻokú ke lau ha tatau ʻoku alafalalaʻanga ko ha tatau mei he muʻaki hiki-tohí.a Ka ko e hā kuo tolonga mai ai ʻa e Tohi Tapú neongo ʻene popo fakanatula, fakafepaki kakaha, mo e feinga ke liliu ʻa e pōpoaki ʻi aí, ʻo kau ai ʻa e ngaahi fakamatala fakaofo ʻo ʻene hao maí? Ko e hā ʻoku makehe ai ʻa e tohi ko ení?

Ko e tokolahi ʻo e kau ako Tohi Tapú naʻa nau maʻu ʻa e fakamulituku tatau mo e ʻapositolo ko Paulá, naʻá ne tohi: “Ko e potu Folofola kotoa pē kuo fakamānavaʻi ia ʻe he ʻOtuá.” (2 Tīmote 3:16) Naʻa nau tui naʻe hao mai ʻa e Tohi Tapú koeʻuhí ʻoku makehe ʻa e Folofola ʻa e ʻOtuá pea koeʻuhí naʻe fakatolonga ia ʻe he ʻOtuá ʻo aʻu mai ki he ʻahó ni. Ko Faizal, naʻe lave ki ai ʻi he kamataʻangá ʻo e kupu hokohoko ko ení, naʻá ne fakakaukau ke fakatotoloʻi ʻa e ngaahi taukaveʻi ko ení ʻaki ʻene ako ʻa e Tohi Tapú. Naʻá ne ʻohovale ʻi he meʻa naʻá ne akó. Naʻe vave ʻene ʻilo ʻoku ʻikai ke ʻi he Tohi Tapú ʻa e ngaahi akonaki lahi ʻoku mafolalahia ʻi he Puleʻanga-Haʻa-Kalisitiané. ʻIkai ko ia pē, naʻe maongo kiate ia ʻa e taumuʻa ʻa e ʻOtuá ki he māmani hangē ko ia ʻoku hā ʻi Heʻene Folofolá.

“ʻOku ou tuipau ʻi he taimí ni ko e Tohi Tapu ʻoku ou maʻú ko e meʻaʻofa ia mei he ʻOtuá,” ko ʻene leá ia. “Ko ia ai, kapau ʻoku lava ʻe he ʻOtuá ʻo ngaohi ʻa e ʻunivēsí, ʻikai ʻokú ne maʻu ʻa e mālohi ke ne ʻomai ha tohi pea fakatolonga ia maʻa kitautolu? Ke toe leaʻaki ha meʻa kehe mei ai ʻoku fakangatangata ai ʻa e mālohi ʻo e ʻOtuá​—pe ko hono fakangatangata ʻa e mālohi ʻo e Māfimafi-Aoniú! Pea ko hai au ke u fakangatangata ʻa e mālohi ʻo e ʻOtuá?”​—ʻAisea 40:8.