ʻOku ʻAonga ʻa e Tataki ʻa e Tohi Tapú ʻi he ʻAhó Ni?

ʻOKU PEHĒ ʻE HE NIʻIHI ʻIKAI. Naʻe fakahoa ʻe ha toketā ʻa hono ngāueʻaki ʻa e Tohi Tapú ko e tatakí ki hono ngāueʻaki ʻo ha tohi fakaako mei he 1920 tupú ke akoʻi ʻaki ha kalasi kemi. ʻE ʻeke nai ʻe ha taha tui veiveiua pe te ke ngāueʻaki ha tohi fakahinohino ki ha komipiuta kuo liʻaki ke tatakiʻaki koe ʻi hono ngāueʻaki ʻo ha komipiuta foʻou fakaeonopooni. ʻI hono fakalea ʻe tahá, ʻoku sio ʻa e niʻihi ki he Tohi Tapú kuo ʻosi hono taimí.

Ko e hā ka ngāueʻaki ai ʻe ha taha ha tataki ʻi he kuonga muʻá ʻi he māmani tekinolosia māʻolunga fakaeonopooni he ʻaho ní? He ko ē, ʻoku taʻefaʻalaua ʻa e uepisaiti mo e peesi ʻinitaneti ʻoku ʻoatu ai ʻa e faleʻi mo e tataki fakamuimui tahá. Ko e kau faleʻi mo e ngaahi polokalama ʻi he T.V ʻokú ne ʻomai ha matavai ʻo e ʻilo ʻa e kau toketā fakaeʻatamaí, ko e founga moʻui ʻa e kau poto mataotaó, mo e kau faʻutohí. Pea ʻoku fakatau atu ʻe he ngaahi fale tohí ha ngaahi tohi tokoni fakatāutaha lahi faufaua, ʻo maʻu ai ha paʻanga ʻe laui piliona.

ʻI he kotoa ʻo e fakamatala fakaeonopooni ʻoku ala maʻú, ko e hā ke hanga ai ki he Tohi Tapú​—ko ha tohi naʻe kakato ʻi he meimei taʻu ʻe 2,000 kuo maliu atú? ʻIkai ʻoku tonu ʻa e pehē ʻe he kau tui veiveiuá ko hono ngāueʻaki ha tohi pehē mei he kuonga muʻá ki he tatakí ʻoku hangē ia ko hano ngāueʻaki ha tohi kemi pe tohi fakahinohino komipiuta kuo ʻosi hona taimí? Ko hono fakahoa atu ʻa e fakaʻuhingá ni ʻoku hala. ʻOku liliu vave ʻaupito ʻa e saienisí mo e tekinolosiá, ka kuo liliu ai ʻa e fiemaʻu tefito ki he tangatá? ʻOku kei fiemaʻu pē ʻe he kakaí ke nau maʻu ʻa e ʻuhinga ʻo e moʻuí mo maʻu ha fiefia mo ha ongoʻi malu, vā lelei fakafāmili, mo ha kaungāmeʻa lelei.

Neongo ʻene motuʻá, ʻoku ʻomai ʻe he Tohi Tapú ʻa e ngaahi fiemaʻu ko iá mo e meʻa lahi ange. ʻOkú ne toe taukaveʻi ko e fakamānavaʻi ia ʻe hotau Tokotaha-Fakatupú. ʻOkú ne ʻomai ʻa e tataki ʻi he tafaʻaki kotoa ʻo ʻetau moʻuí mo teuʻi kitautolu ki ha faʻahinga pole pē. (2 Tīmote 3:16, 17) Mahulu hake ai, ʻokú ne taukaveʻi ʻokú ne ʻomai ʻa e akonaki ʻoku tuʻuloa​—ko ha faleʻi ʻoku ʻikai ʻaupito ke ʻosi hono taimí! ʻOku pehē ʻe he Tohi Tapú tonu: “Ko e folofola ʻa e ʻOtuá ʻoku moʻui.”​—Hepelū 4:12.

ʻE lava ke moʻoni ʻa e ngaahi taukaveʻi ʻa e Tohi Tapú? Kuo ʻosi hono taimí, pe ko e tohi ʻaonga mo lelei taha ia ʻi he ngaahi tohí​—ko hono moʻoní, ko ha tohi ʻoku moʻui? Ko e taumuʻa ʻo e pulusinga ko eni ʻo e Ko e Taua Leʻo, ko e ʻuluaki eni ʻi ha hokohoko ʻo ha ngaahi ʻīsiu makehe, ke tokoniʻi koe ke ke maʻu ʻa e tali ki he ngaahi fehuʻi ko ení.