Ko e Taua Leʻó​—Meʻakai Fakalaumālie ʻi he Taimi Totonu

¹ Kuo meimei taʻu ʻe 114 hono fakalototoʻaʻi ʻe he Ko e Taua Leʻó hono kau lau tohí ke nau tauhi maʻu ʻa e tokanga fakalaumālie. ʻOku langa hake ʻe he makasini ko e Awake! ʻa ia ʻoku pulusi fakataha mo iá ʻa e falala ki he talaʻofa ʻa e Tokotaha-Fakatupú ki ha māmani foʻou melino mo maluʻanga ʻe hoko mai ʻi hotau toʻutangatá ni. Ko e ongo makasini ko ʻení, kuó na hoko ko e meʻangāue angatonu ki hono fakamaama hotau halá ʻi he māmani kuo fakapoʻuli. (ʻAi. 60:2) ʻOku ʻikai ke liliu ʻa e moʻoni ʻo e Folofola ʻa e ʻOtuá, ka ʻoku toe maʻalaʻala ange ʻa ʻetau maʻu ʻa e mahino ki aí ʻi hono ngāueʻaki ʻe Sihova ʻa e ongo makasini ko ʻení mo e ngaahi meʻangāue kehe ke ʻomai ai kiate kitautolu ʻa e meʻakai fakalaumālie “ʻi hono taimi totonu.”​—Mt. 24:45; Pal. 4:18.

² Ngāueʻaki ʻa e Ngaahi Makasiní ki he Lelei Tahá: Te tau malava ke fakahāhā ʻetau houngaʻia ʻi he fakamaama fakalaumālie kuo tau maʻú ʻaki ʻetau fakalototoʻaʻi loto-māfana ʻa e kakaí ke nau lau fakatouʻosi ʻa e Ko e Taua Leʻo mo e Awake! Heʻikai te tau faʻa fakahā ha tukuhau ʻi he ʻuluaki ʻaʻahi ʻi he ngāue fale-ki-he-falé pe ko e ngāue fakamoʻoni ʻikai ʻi he founga anga-mahení. ʻOku tokolahi ʻa e kakai ʻoku nau maʻu maʻu pē ʻa e tatau ʻe taha ʻo e ngaahi makasiní pea ʻoku hā mahino ʻenau fiefia ʻi hono lau iá. ʻE houngaʻia nai ʻa e kakai ko ʻení ʻi he faingamālie ke maʻu ha tukuhau ki ha māhina ʻe ono ʻi he lea faka-Pilitānia. Kaekehe, ko e lelei tahá ke tuʻuaki ʻa e ʻīsiu ʻe taha pē ʻo e ngaahi makasiní ki he tokotaha-ʻapi ʻa ia ʻoku ʻikai ke anga-maheni lelei mo ʻetau ngaahi tohí pea ʻoku fakangatangata nai ʻa ʻene mahuʻingaʻia ki he mahuʻinga ʻo e ngaahi makasiní.

³ Ka ʻe anga-fēfē ke ke ʻiloʻi pe ʻoku ʻi ai ha mahuʻingaʻia moʻoni? ʻI hoʻo tuʻuaki ha taha pe ua ʻo ha ngaahi poini ʻi he makasiní, pe ko ha tuleki pe polosiua, fakatokangaʻi ʻa e meʻa ʻoku fai ʻe he tokotaha-ʻapí. ʻOkú ne fanongo tokanga? ʻOku hā haʻane ʻapasia ki he Tohitapú pea muimui ʻi hono lau ʻa e ngaahi konga Tohitapú? ʻOku ʻi ai haʻane tali ki he ngaahi fehuʻí pe ko e hā haʻane lau? Kapau ʻoku pehē, te ke fokotuʻutuʻu nai ki ha toe foki ʻi he uike hono hokó pe toe vave ange ai ke fai ha toe fetalanoaʻaki ʻi he taimi ko iá. Kapau ʻe hā maʻalaʻala ko e tokotaha-ʻapí ʻokú ne lau ʻa e tohi naʻá ke tuku aí peá ne mahuʻingaʻia ke talanoa ʻo kau ki he ngaahi meʻa fakalaumālié, te ke ʻeke nai leva kiate ia pe te ne saiʻia ke maʻu maʻu pē ʻa e ngaahi makasiní.

⁴ ʻE malava nai ke tuʻuaki ʻa e ʻīsiu ʻe taha ʻo e ngaahi makasiní ki he kaungāngāué, ko e kaungāakó, mo e ngaahi kāingá. ʻE toe lava ʻo tuʻuaki ʻa e ngaahi makasiní ki he ngaahi maheni ʻoku ngāue fakapisinisí pea pehē ki he ngāue fakamoʻoni ʻi he halá.

⁵ ʻOku totonu ke fakafaingamālieʻi leva ki he kau malangá ʻa e ngaahi makasini foʻoú ʻi he vave taha ʻi hono maʻu ʻe he fakatahaʻangá. ʻI hoʻo maʻu ha ʻīsiu foʻou, lau leva ke ke anga-maheni mo ia. Ko e hā ʻa e ngaahi kaveinga ʻoku tokanga lahi ki ai ʻa e kakai ʻi ho feituʻú? Ko e melino mo e maluʻanga ki he māmaní? Ko e tuʻunga fakaʻikonōmiká? Ko ha puleʻanga lelei? Ko e ʻātakaí? ʻOku tuʻu-ki-muʻa hono tataki ʻe he Ko e Taua Leʻó ʻa e kakaí ki he fakaleleiʻanga tuʻumaʻu, ko e Puleʻanga ʻo e ʻOtuá. (Tān. 2:44; Mt. 6:10) Ko e moʻoni ko e meʻaʻofa taʻealafakatataua ia mei hotau “Tokotaha Fakahinohino Maʻongoʻonga.”​—ʻAi. 30:​20, NW.

⁶ ʻE maʻu ʻi ʻEpeleli mo Mē ha faingamālie lelei ʻaupito ke vaheʻi ke lahi ange ʻa e taimi ʻi he ngāue fakamalangá. Koeʻuhi ko Mē ʻoku ʻi ai ʻa e ʻaho Tokonaki mo e Sāpate ʻe nima, ʻe kau ai ʻa e tokolahi ki he ngāue taaimuʻa fakataimí. Ko kitautolu kotoa te tau malava ke fokotuʻu ha ngaahi kolo fakafoʻituitui he taimí ni ke fakalahi ʻetau ngāue fakamalangá he lolotonga ʻa e ongo māhina ko iá pea tau loto-māfana ke fakalototoʻaʻi ʻa e tokotaha kotoa pē te tau fetaulaki mo iá ke ne lau ʻa e Ko e Taua Leʻó mo e Awake!