Kau Talavou​—Mou Poto ʻi Hono Tataki Hoʻomou Laká

¹ ʻOku mahuʻingaʻia ʻa Sihova ko ʻetau Tamaí ʻi he laka ki muʻa fakalaumālie ʻa e kau talavoú. ʻI he fanongo fakapotopoto ki heʻene ngaahi fekau anga-ʻofá, ʻoku ʻikai ke ngata pē hono ʻai ʻe he kau talavoú ke fiefia ʻa e loto ʻo e ʻOtuá ka ʻoku nau toe maʻu ai ʻa e langa hake ki honau ngaahi soulú. (Pal. 27:11; Mt. 11:​28-30) ʻOku nau tuku kia Sihova ke ne tokonaki mai ʻa e tataki poto ki heʻenau ngaahi laká.​—Pal. 16:9, PM.

² Naʻe fokotuʻu ʻe Kalaisi Sīsū ʻa e faʻifaʻitakiʻanga ʻi heʻene kei talavoú ko e tokotaha naʻá ne maʻu ʻa e hōifua fakatouʻosi mei he ʻOtuá mo e kau tangata. (Luke 2:52) Ko e kau talavou ʻi he ʻaho ní ʻoku totonu ke nau feinga ke nau fai ʻa e meʻa tatau. Ko e tataki poto ʻo e ngaahi laka ʻa ha taha kei talavou ʻoku totonu ke hā moʻoni ʻi heʻene fetuli ki he ngaahi meʻa fakalaumālié. ʻI he taʻu 12 ʻa Sīsuú, naʻe ʻiloa ia ʻi heʻene holi ke talanoa ki ha niʻihi ʻo kau kia Sihova. (Luke 2:​46, 47) Ko e kau talavou ʻo e ʻaho ní kuo nau fakahā ha holi tatau ke fai ha fakamatala ʻo ʻenau tuí ki ha niʻihi kehe.​—w90 7/1 peesi 29-30; w-TO 3/1/88 p. 21.

³ Ko e hā ʻa e meʻa ʻe malava ke fai ʻe kimoutolu kau talavou he taimí ni kae tautefito lolotonga ʻo e ngaahi māhina hono hokó ke “fai ha fakaʻapaʻapa ki he ʻEiki ʻaki hoʻo koloa”? (Pal. 3:9) Ko e hā ʻoku ʻikai ke fakalahi ai ʻa e taimi ʻokú ke faʻa fakamoleki ki hono fai ʻo e ngāue fakamalangá mo e akoʻi ʻo e ongoongoleleí, ke hoko nai ko ha taaimuʻa fakataimi? Te ke ofo nai ʻi he fakalahi hoʻo fiefiá mo e ngaahi ʻaonga kehe ʻe tafe mai pē ia mei he fakalahi hoʻo kau ki he ngāue fakamalangá. Te ke toe maʻu ai ha faingamālie ke kau ʻi he ngāue fakamalangá mo ha toe tokolahi ange pea mo ha kau malanga kehekehe. Te ke malava nai ke kamata he taimí ni ʻaki haʻo kole ki ha tokotaha malanga taukei ʻe tokotaha pe toko ua ke nau ngāue mo koe ʻi he fakaʻosinga ʻo e uike ní.

⁴ ʻE malava ʻe he ngaahi mātuʻá ke nau fai ha fakalototoʻa mo ha tokoni lahi ʻaupito ki heʻenau fānaú ʻo fakafou ʻi hono teuteu mo ʻahiʻahi ʻa e ngāue ke faí ʻo tānaki atu ki hoʻomou kaungāngāue fakataha mo kinautolu ʻi he ngāue fakamalangá. Ko ha niʻihi kehe matuʻotuʻa ʻi he fakatahaʻangá te nau malava ke nau tokoni ʻaki haʻanau lea ki he kau talavoú ke nau ngāue fakataha ʻi he ngāue fakamalanga fale-ki-he-falé pea pehē ki he toe ʻaʻahi mo fai ʻa e ngāue ako Tohitapú. Ko e feohi vāofi mo e kau malanga ʻoku mālohi fakalaumālié ʻe pau ʻene langa hake ʻa e kau talavoú mo tokoniʻi kinautolu ke nau “tuiaki atu ki he tuʻunga matuʻotuʻá.”​—Hep. 6:1, NW.

⁵ ʻOku fiemaʻu ki he Kalisitiane kotoa pē ke fakaleleiʻi ʻene malava ke faiakó. ʻOku kau ki ai mo e kau talavoú. ʻOku mou teuteu fakamākukanga ʻa kimoutolu ʻa e kau talavoú ki he ngaahi konga kuo vaheʻi atu ko ha monū ke kau ki he Ako Fakafaifekau Fakateokalatí? ʻOku ʻi ai haʻo taimi-tēpile ke fai pau ai ha lau tohi mo ha ako fakafoʻituitui pea pehē foki ke fai ha fakalaulauloto? ʻOkú ke ngāueʻaki ʻa e ngaahi meʻa ko ia kuó ke fakakaukau ki aí? ʻOkú ke teuteu lelei ki he ngaahi fakatahá koeʻuhi ke ke maʻu kakato ʻa e mahino ki ai pea mateuteu ke fai ha fakamatala? ʻOkú ke hiki ʻa e ngaahi poini ʻe ala tokoni ʻa ia ʻoku fakahā ʻi he lolotonga ʻo e ngaahi fakatahá pea ke feinga ke ngāueʻaki ʻa e ngaahi fokotuʻu ko ia ʻoku fakahā ʻi he Ko ʻEtau Ngāue Fakafaifekau ʻo e Puleʻangá?

⁶ ʻOua naʻa liʻaki ʻa e ngaahi faingamālie ke kau ʻi hono fakamaʻa ʻo e Kingdom Hall pea ke tokoni ki he ngaahi tokoua mo e ngaahi tuofāfine ʻoku taʻumotuʻa pe mahamahakí ʻi hono fai ʻa e ngāue ʻi honau ʻapí pe ko ha ngaahi founga ʻaonga kehe ʻe malavá. ʻOua naʻa siʻaki ʻa hoʻo tokoni maʻu pē ki hono tokangaʻi ʻo e fakamole ʻa e Kingdom Hall pea mo e ngāue ʻa Sōsaietí ʻi māmani lahí.

⁷ Kapau te tau ‘leʻohi ʻo fakatatau ki he folofola ʻa Sihová’ pea tuku kiate ia ke ne tataki ʻetau ngaahi laká, te ne tataki kitautolu ki he fiefiá mo fakalahi hotau monū ko e fai ʻo ʻene ngāué.​—Sāme 119:9, NW.