Ko e Taua Leʻó mo e Awake!—Ongo Makasini ʻo e Moʻoní
1 ʻI he tatau ʻo e Taua Leʻo (faka-Pilitania) ʻo Sānuali 1, 1994, peesi 22, ʻokú ne fakamanatu mai kiate kitautolu ʻoku pulusi ʻi heʻetau ngaahi makasiní ʻa e “ngaahi kupu faingatonu ʻoku fakahanga ai ʻa e tokangá ki he ngaahi fie maʻu ʻa e kakaí.” ʻOku tau loto ke tuku atu ke lahi ʻa e ongo makasiní. Ko e ongo makasini ko ʻení ko e tuʻuaki tefito ia ʻi he lolotonga ʻo e māhina ko ʻEpeleli mo Mē, pea pehē ki ha taha ʻo e ngaahi polosiuá.
2 Ko e faingamālie lelei taha ʻoku tau maʻu ki hono tuku atu ʻa e ongo makasini ko ʻení ko e ngāue fale-ki-he-falé. ʻE toe hoko foki ʻa e fakamoʻoni ʻikai ʻi he founga maheni ʻoku ola leleí mo e ngaahi toe ʻaʻahí ʻo tuku atu maʻu ai pē ʻa e ongo makasiní. Ko e ngāue fakamoʻoni ʻi he halá mo e ʻaʻahi ki he ngaahi pisinisi ʻi hotau feituʻú ko e toe ongo founga ola lelei ia ki hono fakalahi ʻa hono tuku atu ʻo e ongo makasiní.
3 Ngaahi Kaveinga ki he Fetalanoaʻakí: Ko e tatau ʻo Maʻasi 1 ʻo e Ko e Taua Leʻó ʻokú ne lave ki he ongo kaveinga “Ko e Hā Hono Fuoloa Te Ke Lava ke Moʻui Ai?” mo e “ʻE Ikuʻi ʻa e “Fili Fakamui”!” Ko e moʻoni ʻoku fehoanaki mālie ʻeni mo e taumuʻa ʻo e makasiní ke fanongonongo ʻa e Puleʻanga ʻo e ʻOtuá. Ko e kupu hono uá ʻoku fakaʻosi ʻaki hono fakahā ʻa e founga ʻe hoko mai ai ʻa e palataisi taʻe ngatá ko ha moʻoniʻi meʻa ʻi he malumalu ʻo e pule ʻa Kalaisi Sīsū.—Luke 23:43.
4 “Ngaahi Tuʻutāmaki Fakaenatulá—Ko e Fakahoko Mai ʻe he ʻOtuá?” ko e fehuʻi ia ʻoku lave ki ai ʻi he tatau ʻo ʻEpeleli 1. Ko e tatau ʻo Mē te ne fakaʻāuliliki ʻo toe lahi ange ʻa e fehuʻi ko e “ʻE Toe ʻOsi Koā ʻa e Ngaahi Taú?” ʻOku totonu ke tau malava ke kamata ha fetalanoaʻaki faingofua mo e kakai kuo nau faʻa fifili ʻo fekauʻaki mo e ongo fehuʻí ni.
5 Fakalahi Ange Hono Tuku Atu ʻo e Ngaahi Makasiní: Ko e tatau ʻo Sānuali 1 ʻi he Taua Leʻo faka-Pilitaniá ʻokú ne fokotuʻu mai ha ngaahi fokotuʻu ʻe fā ke fakalahi ange ai hono tuku atu ʻo e ngaahi makasiní. ʻOku fakalototoʻaʻi mai ai kitautolu (1) ke tau mahuʻingaʻia ʻi heʻetau ngaahi makasiní. ʻI heʻetau lau iá, ʻoku totonu ke tau fakakaukau pe ko e kupu fē ʻe mātuʻaki fakamānako ki he kakai ʻi hotau feituʻú. ʻIkai ko ia pē, kapau te tau toutou toʻo maʻu pē ha ngaahi tatau, te tau malava ke tuku atu ia ki hotau kaungāngāue, kaungāʻapi, kau faiako, kaungāako, pe ko e kakai ʻoku fai ʻenau fakatau.
6 ʻOku fakamanatu mai ai (2) ke ʻai ʻetau fakamatalá ke nounou. Fili ha poini mahuʻinga ʻe taha, pea fakamatala nounou ʻi hoʻo lea pē ʻaʻau. Kapau te ke lava ʻo fakalotoʻi ʻa e toko taha ʻapí ke ne tali ʻa e makasiní, ʻe toki fai ʻe he makasiní ia ʻa e “lea” ki he toko taha ko ia naʻá ke fetaulaki mo iá pe ko ha niʻihi kehe ʻi he ʻapí.
7 Ko e toe fie maʻu ʻe taha ko e (3) ʻai ke maliliungofua. Ko e meʻa lelei ke mateuteu ke ngāueʻaki ha ngaahi kupu kehekehe ke fetalanoaʻaki ki ai—ko e taha ki he kau talavoú, ko e kaveinga ʻe taha ki he kakai tangatá, mo ha toe kaveinga kehe ki he kakai fefiné.
8 Ko hono fakaʻosí, ʻoku fie maʻu ke tau (4) fokotuʻu ha kolo fakafoʻituitui ki he lahi ʻo e ngaahi makasini ʻe tuku atú. Neongo ʻoku ʻikai lava ke fokotuʻu ʻe he fakatahaʻangá ha fika pau, ka ʻe lava ke tau fokotuʻu ha kolo fakafoʻituitui kiate kitautolu. ʻE ʻai nai ʻe he meʻá ni ke tau loto-māfana ʻi hono tuʻuaki ʻa e ngaahi makasiní. Kapau ʻoku ʻi ai ha fika pau ʻo e ngaahi makasini kuo tau ʻotá, ʻe ueʻi ai kitautolu ke tau toe ngāue ke lahi ange.
9 ʻOku tau fie maʻu ʻa e niʻihi kehé ke nau ʻilo ʻo kau ki he Puleʻanga ʻo e ʻOtuá. Ngāuekakatoʻaki ʻa e tokoni lelei ʻoku tokonaki mai ʻe he ngaahi makasiní ʻi hono fakamafola atu ʻa e ongoongo fekauʻaki mo e Puleʻangá.—Mt. 10:7.