Tokoniʻi ʻa e Niʻihi Kehé ke Ako ki he Moʻoní
1 Naʻe haʻu ʻa Sīsū ki he māmaní ke fai fakamoʻoni ki he moʻoní. Naʻá ne akoʻi ʻa ʻene kau ākongá ke nau hoko ko e kau faiako, kae lava ke nau malangaʻi ʻa e moʻoní ki he niʻihi kehé. Naʻá ne fuʻu loto-maʻu te nau lavameʻa ʻi hono akoʻi ʻo e niʻihi kehé ʻo ne ui ai kinautolu ko e kau ‘akonaki.’ (Mt. 13:52) Naʻá ne fakatātaaʻi ʻa e toko taha taki taha ʻo kinautolu ki ha tangata ako ʻokú ne tauhi ha koloa moʻoni ke ne toki ngāueʻaki ia. ʻOku ngāueʻaki ʻe he kau ākonga ʻa Sīsū ʻi he ʻaho ní ʻa e ngaahi tohi kuo pulusi ke fakavaveʻi ʻaki ʻa e ngāue ko hono malangaʻi ʻo e Puleʻangá. Ko e fakatātaá, ʻoku maʻu ʻe he ngaahi fakatahaʻanga lahi ʻa e ngaahi tohi iiki kehekehe ke ngāueʻaki ki hono tokoniʻi ʻo e niʻihi kehé ke nau hoko ko e kau ākonga. ʻE anga-fēfē hono ngāueʻaki ʻa e ngaahi meʻangāue mahuʻinga ko ʻení?
2 Ke kamata ha fetalanoaʻaki ʻe iku ki hano tuʻuaki ʻa e kiʻi tohi ko e “Ko e Ongoongo Leleí ni ʻo e Puleʻanga,” te ke ʻeke nai:
◼ “Kuó ke fifili nai neongo ʻa e ngaahi feinga kotoa pē ʻa e tangatá, ka ko e kahaʻu malú ia ʻoku ngali ʻoku ʻikai ha ʻamanaki lelei ia ki ai? [Tuku ke ne tali.] ʻOku fakamatala ʻi he Tohi Tapú ʻa e ʻuhinga ʻoku ʻikai ke malava ai ʻa e ngaahi feinga lahi.” Lau ʻa e Sāme 146:3, 4, ʻoku totonu ke ke ʻeke: “Ko hai moʻoni ʻokú ne malava ke ne tokonaki mai kiate kitautolu ʻa e maluʻanga tuʻuloá?” Fakatuʻunga pē ʻi he tali ʻa e toko taha ʻapí, te ke fili nai ke fetalanoaʻaki ki he ngaahi poini feʻungamālie mei he palakalafi 41 pe fokotuʻutuʻu ke fai pehē ʻi ha taimi ʻi he kahaʻú.
3 Ko e taha ʻeni ʻo e founga ʻoku malava nai ke ke ngāueʻaki ai ʻa e kiʻi tohi ko e “ʻOku ʻI Ai Ha ʻOtua ʻOku Tokanga Mai?”:
◼ “Kuo ʻeke ʻe he kakai tokolahi ʻa e fehuʻi ʻoku hā ʻi he ʻuluʻitohi ʻi lalo ʻi he ongo fakatātā ko ʻení. [Lau ʻa e fehuʻi ʻi he tafaʻaki ki lalo ʻo e peesi 6 mo e 7, pea tuku ke ne tali.] Pea koeʻuhi ko ha ʻOtua ʻofa ʻoku ʻikai te ne poupouʻi fakatouʻosi ʻa e leleí mo e koví ʻi he taimi tatau pē, ko e hā ʻa hoʻo fakakaukau ki heʻene talaʻofa kuo hiki ʻi he ʻAisea 65:21-24?” Kapau te ke maʻu ha fakamatala ʻoku hā mei ai ha fie fanongo, sio ki he palakalafi 37, pea fakamatala ki he meʻa ʻe fakahoko ʻe he Puleʻanga ʻo e ʻOtuá.
4 ʻI hono tuʻuaki ʻa e kiʻi tohi ko e “Ko e Ongoongo Leleí ni ʻo e Puleʻanga,” ʻoku lava ke ke pehē:
◼ “Ki he tokolahi ko e tuʻunga ʻo e moʻuí kuo hōloa hifo ia ʻo fakataʻelata mo fakafiu he ʻoku tatau pē ʻi he taimi kotoa pē. Ko e hā ʻokú ke fakakaukau ʻoku fie maʻu kae hoko ai ʻa e moʻuí ʻo mohu ʻuhinga ange? [Tuku ki he toko taha ʻapí ke ne fakahā ʻa ʻene fakakaukaú.] ʻOku fakahā ʻi he Tohi Tapú ʻoku ʻi ai ʻa e ngaahi meʻa lelei ange ʻoku tauhi mai ʻe he ʻOtuá maʻatautolu. Sio ki he meʻa ʻokú ne leaʻaki ʻi he Fakahā 21:4, 5.” Kapau ʻoku feʻungamālie, hoko atu ʻa e fetalanoaʻakí ʻi he ngaahi poini mei he palakalafi 43 ʻo e kiʻi tohí.
5 ʻI hono ngāueʻaki ʻa e polosiua ko e “Moʻui Fiefia ʻI He Mamani ʻO Taʻengata!,” ʻe ʻeke nai ʻe ha toko taha malanga kei talavou:
◼ “Te ke saiʻia ke moʻui ʻi ha māmani palataisi ʻoku hangē ko ʻení? [Fakaʻaliʻali ʻa e takafí fakakātoa, pea tuku ke ne tali.] ʻOku ou ʻamanaki atu mo hoku fāmilí ke moʻui ai koeʻuhi ko e lave ki ai ʻa e Tohi Tapú ʻoku hā ʻi he Sione 17:3.” Kapau ʻoku fakatokangaʻi ʻokú ne fie fanongo ʻi he ʻosi hono lau ʻa e Tohi Tapú tuʻuaki ʻa e polosiuá ke tuku ke lau ʻe he toko taha ko iá.
6 Kapau ʻokú ke ngāueʻaki ha ngaahi tohi iiki kehe pe ngaahi polosiua ʻi hoʻo ngāue fakamalangá ʻi he mahiná ni, te ke liliu nai ʻa hoʻo ngaahi lea kamatá mo hoʻo ngaahi tuʻuakí ki he founga ʻo e ngaahi fokotuʻutuʻu ʻi ʻolungá. Manatuʻi ke fuonounou pea ʻai ʻa e ngaahi fakamatalá ke pau mo fakatupu langa hake ke ne langaʻi ʻa e fie fanongo ʻa e toko taha ʻapí.
7 Kuo ʻomai ʻe Sihova kiate kitautolu ʻa e moʻoní. ʻOku totonu ke tau ngāueʻaongaʻaki ʻa e ngaahi faingamālie ʻoku ʻi muʻa ʻiate kitautolú ke ʻoatu ki he niʻihi kehé ʻa e moʻoní, fakatouʻosi ʻi he ngaahi tohi kuo pulusí mo ʻetau ngaahi fetalanoaʻaki mo e kakai ʻoku tau fetaulakí. ʻI he founga ko ʻení ʻoku tau fakamoʻoniʻi ai kitautolu ko e kau faiako ki he lelei taʻe ngata ʻa e niʻihi kehé.—Mt. 28:19, 20.