Te Nau Fanongo Fēfē Kapau ʻOku ʻIkai ke Tau Toe ʻAʻahi Ki Ai?
1 “Pea fefe haʻanau fanongo ʻoka ʻikai ha taha ke malanga?” (Loma 10:14) Ko e moʻoni, ʻe anga-fēfē haʻanau maʻu ʻa e ʻuhinga ʻo e moʻoní kapau ʻoku ʻikai te tau fai ha ngaahi toe ʻaʻahi ola lelei? Ko ha ʻaʻahi pē naʻe malava ke tau fetalanoaʻaki ai mo ha toko taha ʻapi ʻo fekauʻaki mo e pōpoaki ʻo e Puleʻangá ʻoku taau ke fai ha toe ʻaʻahi ki ai. ʻI he mahiná ni ʻe malava nai ke tau toe ʻaʻahi kiate kinautolu naʻa tau fetalanoaʻaki mo kinautolu ki muʻa atú ke ʻoatu kiate kinautolu ha ngaahi fakakaukau mei he Tohi Tapú mei ha kiʻi tohi pē naʻa tau tuku ai, pea ʻe iku atu nai ia ki ha ako Tohi Tapu ola lelei.
2 Kapau naʻá ke tuku ʻa e kiʻi tohi ko e “Ko e Ongoongo Leleí ni ʻo e Puleʻanga,” te ke malava ʻi he founga ko ʻení ke kamata ha fetalanoaʻaki ʻe iku atu ai ki ha ako Tohi Tapu, ʻe malava ke ke ʻeke:
◼ “Te ke fie nofo ʻi ha māmani ʻa ia ʻe fakapapauʻi ai ʻa e maluʻanga ʻo e kahaʻú kiate koe mo ho fāmilí? [Tuku ke ne tali. Pea ke sio ki he palakalafi 26.] ʻOku tau holi kotoa pē ki ai, neongo ko e tokolahi ʻoku nau veiveiua pē ʻe malava koā ia. Heʻikai ke taʻe malava ia, he ko e ʻOtuá naʻá ne talaʻofa te ne fakahoko moʻoni ia.” Lau ʻa e Sāme 37:11, 29 ʻo hangē ko ia ʻoku hā ʻi he palakalafi 26, pe te ke lau ia mei hoʻo Tohi Tapú. Hoko atu ʻa hono fakamatalaʻi kuo ʻi ai ʻa e kakai ʻi māmani lahi kuo nau ʻosi hokosia ʻa e fiefia mo e melino ʻo e fakakaukaú ko e tupu mei hono maʻu ʻa e ʻamanaki papau ki he kahaʻú. Fetalanoaʻaki ki he ngaahi fakakaukau faka-Tohitapu ʻi he palakalafi 1 mo e 2, pea mo fakamatala ki he anga ʻo hono fai ha ako ʻi he kiʻi tohí ʻe malava ke tokoni ki he toko taha ʻapí ke ne ako lahi ange. Kapau ʻoku fie fanongo ʻa e toko taha ko iá, fai ha ngaahi fokotuʻutuʻu ke fai leva ha toe ʻaʻahi ke toe hoko atu ʻa e fetalanoaʻakí.
3 ʻI hoʻo toe ʻaʻahi ʻi he ʻosi ʻa hono tuku ʻa e kiʻi tohi ko e “ʻOku ʻI Ai Ha ʻOtua ʻOku Tokanga Mai?,” mahalo ko ha meʻa ʻe hangē ko ʻení ʻe ola lelei:
◼ “ʻI heʻeku ʻaʻahi mai ki muʻá, naʻá ta fetalanoaʻaki ai ki he fehuʻi, ʻOku ʻI Ai Ha ʻOtua ʻOku Tokanga Mai? ʻOkú ke fakakaukau ʻoku feʻunga ʻa e tokanga mai ʻa e ʻOtuá kiate kitautolú ke ne fakangata ʻa e faingataʻaʻiá mo e fakamālohí? [ʻI he ʻosi ʻa ʻene talí, sio ki he palakalafi 32, pea ke hoko atu.] Kuo talaʻofa ʻe he ʻOtuá ke fetongi ʻa e māmani anga-fulikivanu ko ʻení ʻaki ha māmani foʻou ʻe nofoʻi ʻe he kakai lelei ʻa ia ʻe malava ke nau moʻui melino. [Lau Sāme 37:11.] Te ta malava foki ʻo maʻu ʻa e moʻui ʻi he māmani foʻou ko iá ʻo kapau te ta tui ki he Tohi Tapú mo ngāueʻaki ʻene enginakí.” Fakamatala ki heʻetau fokotuʻutuʻu ke tokoni ki he kakaí ke nau ako ʻa e Tohi Tapú.
4 ʻI hono fai ha toe ʻaʻahi ʻi he ʻosi hono tuku ʻa e polosiua ko e “Vakai! ʻOku Ou Fakafoʻou ʻa e Meʻa Kotoa Pe,” te ke kamata nai ʻaki haʻo fakaʻaliʻali ʻa e fakatātā ʻi he takafí pea ke ʻeke ʻa e fehuʻí ni:
◼ “ʻOkú ke fakakaukau ʻe anga-fēfē ha moʻui ʻi ha māmani haohaoa? [Tokanga ki he fakamatala ʻa e toko taha ʻapí.] Ko e meʻa ko ʻeni ʻokú ke sio ki ai ʻi he fakatātā ko ʻení ʻoku ʻikai ko ha fakasino mai pē ia ʻo ha fakakaukau; ʻoku makatuʻunga ia ʻi he ngaahi talaʻofa papau kuo fakahā ʻi he Tohi Tapú. [Lau ʻa e Fakahā 21:4 mo e Sāme 37:11, 29.] ʻOku ou fie fakamatala atu kiate koe ʻa e founga te ke maʻu ai mo ho fāmilí ʻa e tāpuaki ko ʻení.” Kapau ʻoku hā mei he toko taha ʻapí ha fie fanongo, hoko atu ʻa e fetalanoaʻakí, pea tuʻuaki ha ako Tohi Tapu.
5 ʻI heʻetau ʻilo ʻa e kakai loto-moʻoni ʻoku nau fekumi ki he moʻoní, ʻoku tau fakahāhā ʻa ʻetau ʻofa moʻoní ʻaki ʻetau toe ʻaʻahi ʻo tokoniʻi kinautolu ke nau fai ki he meʻa naʻa nau fanongo ki aí. ʻOku tau ngāueʻaki ʻa e ngaahi moʻoni toputapu kuo tuku mai kiate kitautolu ki he tāpuaki taʻe ngata kiate kitautolu mo kinautolu ʻoku nau fanongo ki aí.—1 Tīm. 4:16.