Te Ke Lava ʻo Toe Kau ki he Tāimuʻa?
1 ʻI he lolotonga ʻa e taʻu ʻe nima kuo ʻosi̇́, ko e toko laui afe ʻo e kau tāimuʻa tuʻumaʻú naʻa nau mavahe mei he ngaue tāimuʻá. Ko ha tokotaha koe ʻo kinautolu? Kapau ko ia, ʻoku ʻikai ha veiveiua naʻe ʻi ai ʻa e ʻuhinga naʻá ke liʻaki ai ʻa e monū ko ʻeni̇́. Mahalo ko ha meʻa naʻe taʻeʻamanekina mo ʻikai te ke lavaʻo puleʻi. ʻOku kei ʻi ai ʻa e ʻuhinga ko iá? Kapau ko e mahaki, ngaahi palōpalema fakaepaʻanga, pe ngaahi fatongia fakafāmili naʻe feʻunga ke ke tuku ai ia, kuo lelei ange ʻa ho ngaahi tuʻunga? ʻOku lava ke ke fai ha ngaahi fokotuʻutuʻu lelei ʻe fakaʻatā ai koe ke ke toe maʻu ʻa e ngaahi tāpuaki ʻo e tāimuʻa tuʻumaʻu? Kuó ke fakakaukau ke toe fai hao kole ki ai?
2 ʻOku hangē ko ia kuó ke ʻilo, ko e fokotuʻutuʻu lelei mo e taimi-tēpile ʻoku fiemaʻu ia kae lavameʻa ko ha tāimuʻa. Neongo ʻoku ʻikai ke faʻa lahi ha taimi ia ki he fakafiefia, ko e ngaahi vahaʻa taimi ʻo e mālōlō kuó maʻu ʻe ha tokotaha tāimua ʻoku faʻa fakamoʻoniʻi ko ha pale mo e fakafiemālie lahi ange. (Pal. 19:17; Ng. 20:35) ʻI he femoʻuekina ʻi he ngāue fakamalanga, kuo maluʻi ai koe mei he tākiekina ʻo e siokita, tuli ki he founga moʻui faingofua mo e fakafiemālie kuo tulimui ki ai ʻa e māmani. Kuo talaʻofa ʻe Sihova te ne ʻai koe ke ke mohu fakalaumālie ʻo kapau te ke moʻui-līʻoa mo fakamuʻomuʻa ʻa e ngaahi meʻa mahuʻinga ʻo e Puleʻanga. Ko e moʻoni te ke maʻu ʻa e fiefia moʻoni mo e fiemālie ʻi hoʻo ʻaufuatō ʻi he ngāue ʻa Sihova.—Pal. 10:22; Kol. 3:23, 24.
3 ʻOku totonu ke sio ki he ngāue fakamalanga taimi-kakato ko ha monū ia ʻoku maʻu pē ia ʻe ha tokosiʻi makehe? ʻIkai. ʻI he vakai ki heʻetau fuakava ke fakatapui ʻa ʻetau moʻui kia Sihova, ʻoku totonu ki he Kalisitiane kotoa pē ke ne fai ha tokanga fakamātoato ki he ngāue taimi-kakato tuku kehe kapau ʻoku ʻikai ke malava ʻi he ngaahi tuʻunga ʻokú ke ʻi ai.—Mk. 12:30.
4 Kapau ʻoku hā mahino mei he anga ʻo hoʻo moʻui mo e ngaahi fatongia faka-Tohitapu ʻoku ʻikai te nau fakaʻatā koe ke ke ngaue tāimuʻa ʻi he taimi̇́ ni, ʻoku lava ke ke fakapapauʻi ʻoku ʻafioʻi mo mahino pē ia kia Sihova. Te ne fakapaleʻi koe ki hoʻo anga-tonu ʻo fakatatau ki hono fakaʻatā koe ʻe ho ngaahi tuʻunga. (1 Kol. 4:2; 2 Kol. 8:12) Kapau ʻoku ngalingali ʻoku faingamālie ʻi he taimí ni kiate koe ke ke toe tāimuʻa, fēfē ke ke ʻalu ki he ʻovasia pule ʻo kole ki ha foomu kole?
5 ʻOku Lava Ke Tokoni ʻi Koe ʻe Ho Fāmili? Naʻá ke tuku nai ʻa e ngāue tāimuʻa koeʻuhi he naʻe fiemaʻu kiate koe ke ke tokanga ki he ngaahi fatongia fakafāmili. ʻOku malava ʻe he ngaahi mēmipa kehe ʻo e fāmili ʻoku nau ʻi ha tuʻunga ʻi he taimí ni ke fai ha tokoni ʻe malava ai kiate koe ke ke toe hū ki he ngāue tāimuʻa? Ki he niʻihi, ko ha tokoni siʻi pē ki hono tokangaʻi ʻa e ngaahi fatongia ʻe niʻihi, ʻoku toe malava ke ala lavaʻi ʻa e tāimuʻa.
6 Ko e fengāueʻaki lelei mo ha feinga siʻi pē mei he ngaahi mēmipa kehe ʻo e fāmili ʻe lava ai ʻa e meʻá ni. Ko e tokoni nai ʻi he meʻa fakapaʻanga pe fefonongaʻaki, pea pehē ke fai ha alea ke ngāue fakataha ʻi he ngāue fakamalanga. ʻOku ngalingali ʻoku ʻi ai mo e ngaahi founga kehe ʻoku lava ke nau tokoni ai. Kapau ʻoku ʻikai ke fakaʻatā ʻe ho ngaahi tuʻunga ke ke toe kau ki he monū ko ʻeni ʻo e ngāue, mahalo ko e ngaahi tokoni pehē ʻe malava ke fai ia ki ha mēmipa ʻe taha ʻo e fāmili ʻoku malava ke ne fai pehē.
7 ʻOku fēfē ke fetalanoaʻaki fakafāmili ki he meʻa ko ʻeni? ʻOku lelei nai ke hoko ha mēmipa ʻo e fāmili ko ha tāimuʻa kapau te mou ʻai ia ko e ngāue fāutaha ʻa e fāmili. Kapau ʻe lava ke kau atu ha tāimuʻa ʻe taha ki he ngāue, ʻoku ongoʻi ʻe he fāmili fakalūkufua ʻoku nau kau ki he ngāue. Ko e loto-fiefoaki pehē ʻe ʻikai ngata pē ʻi hono tānaki atu ki he fakamoʻoni ki he Puleʻanga ʻi he kauhala ka te ne toe tohoaki ʻa e fāmili ke toe vāofi ange fakataha fakalaumālie.—Luke 6:38; Fili. 2:2-4.