Ke Tokanga ki he Makasiní ʻi ʻOkatopa
1 ʻOku ʻi he Taua Leʻó mo e Awake! ha pōpoaki fakafiemālie mo fakalototoʻa ʻo e ongoongo lelei taʻengatá. ʻOku kau ki he tokanga ki he makasiní ʻa hono vaheʻi ha taimi ke lau fakatokanga ai ia pea fakatokangaʻi pe ʻe anga-fēfē ʻa e fakamānako ʻa e ngaahi kupú ki he kakai ʻi hotau feituʻú.
2 ʻUluaki alāanga mo e ngaahi kupu ʻoku fakaeʻa ʻi he takafí. ʻOku faʻa hoko ʻa e ngaahi fakatātā ʻi he takafí ʻo fakatupu tokanga ki he tokotaha ʻapí pea ueʻi ai ia ke ne tali ʻa e makasiní. Fili ʻa e ngaahi kupu ʻokú ke pehē ʻe fakamānako ki he kakai ʻi ho feituʻú. Ko e kakai ʻoku nau ʻi he tui fakalotu pē ʻe taha? Ko e hā ʻoku nau tokanga lahi ki aí? ʻI hoʻo maʻu ʻa e ngaahi fakakaukau ko ʻení, te ke malava ʻo teuteu ha lea kamata ola lelei. Fakatokangaʻi ʻa e fokotuʻu ko ʻeni ʻi laló.
3 Kapau ʻokú ke tuʻuaki ʻa e “Taua Leʻo” ʻo ʻOkatopa 1, te ke fakaʻaliʻali ʻa e kupu “Ko e Lotu Moʻoní Kuó Ke Maʻu Ia?” ʻOku lava ke ke pehē:
◼ “Ko e tokolahi taha ʻo e kakaí ʻoku ʻi ai pē ʻa e lotu ʻoku nau kau ki ai. ʻOku pehē ʻe he tokolahi ʻoku fakalato ʻe heʻenau lotú ʻa e ngaahi meʻa ʻoku nau fiemaʻú.” Pea te ke ʻeke nai ha fehuʻi fakahangatonu, ʻo pehē: “ʻOkú ke fakakaukau te tau maʻu ʻa e lotu moʻoní?” pe “Ko e hā ʻokú ke fakakaukau ʻe tokoni ki he kakaí ke nau ʻiloʻi ai ʻa e lotu moʻoní?” ʻI he ʻosi ʻa e tali ʻa e tokotaha ʻapí, ʻe malava ke ke hoko atu ʻaki ha ngaahi fakamatala ʻoku feʻungá, ʻo hangē ko ʻení: “Ko e fehuʻi mahuʻinga ʻaupito ʻeni. He ʻoku kaunga ia ki heʻetau maʻu ʻa e moʻui taʻengatá. [Lau Sione 17:3.] Ko e kupu ko ʻeni ʻi he Taua Leʻó ʻokú ne fakamatala ki he founga te ke maʻu ai pē ʻe koe ʻa e tali ki he ngaahi fehuʻi ko iá. Te u saiʻia ke tuku ʻa e tatau ko ʻení maʻa u. Kapau te ke mālieʻia ai, ʻi heʻeku ʻaʻahi hono hoko maí te u fakahā atu ʻa e founga ʻe lava ai ke ʻomai maʻu pē ʻa e Taua Leʻo ki ho ʻapí.”
4 ʻI hono ngāueʻaki ʻa e “Taua Leʻo,” ʻo Sepitema 1, te ke saiʻia ʻi ha lea kamata faingofua ʻo hangē ko ʻení:
◼ “Ko e meimei tokotaha kotoa pē ʻoku ʻi ai ʻa e lotu ʻoku kau ki ai. Ko e kupu ko ʻení ʻokú ne langaʻi ʻa e fehuʻi, ‘ʻOku Fakalato ʻe he Lotú ʻa Hoʻo Ngaahi Fiemaʻú?’ Ko e hā ʻa hoʻo fakakaukaú? [Tuku ke ne tali.] Kapau ʻokú ke fieʻilo ki he tali ʻa e Tohi Tapú ki he fehuʻi ko iá, te u fiefia ke tuku ʻa e tatau ko ʻeni ʻo e makasiní maʻa u.” Teuteu ke tuʻuaki ʻa e tuleki Ko e hā ʻOku Tui Ki Ai ʻa e Kau Fakamoʻoni ʻa Sihova? kapau ʻoku saiʻia ʻa e tokotaha ʻapí ia ʻi he meʻa ʻoku fakamatala ʻoku nounou angé.
5 Fai ha feinga ke tuʻuaki ʻa e makasiní ʻi he matapā kotoa pē, neongo kapau ʻoku ʻikai lava ha fetalanoaʻaki ʻi he Tohi Tapú. Ko e tokolahi taha ʻo e kakai ʻoku nau tali ʻa e makasiní ʻoku nau fiefia ke fai ha kiʻi tokoni ki heʻetau ngāue ako Tohi Tapu ʻi māmani lahí.