Ke Lavameʻa ʻa e Ngaahi Toe ʻAʻahí ʻOku Fiemaʻu ʻa e Faiako Ola Lelei
1 Ko e ngaahi toe ʻaʻahí ko e konga mahuʻinga ia mo fakafiefia ʻo ʻetau ngāue fakafaifekaú. Ko e hā ʻoku totonu ai ke tau tōtōivi ʻi he toe foki ki he faʻahinga mahuʻingaʻiá? ʻOku ʻai ʻo ʻiloa ai ʻa e huafa ʻo Sihová pea mo fakalāngilangiʻi ia ʻe he ngāue ngaohi ākonga ko ʻení, pea ʻoku tokoniʻi ai ʻa e faʻahinga manavahē-ʻOtuá ke nau maʻu ʻa e hala ki he moʻuí. (2 Kol. 2:17–3:3) ʻI he ʻiloʻi ʻoku kau fakatouʻosi ki ai ʻa hono fakatāpuhaaʻi ʻa e huafa ʻo Sihová pea mo e ngaahi moʻui ʻa e niʻihi kehé ʻoku totonu ke ne ueʻi kitautolu ke teuteu lelei ki muʻa ke toe fokí.
2 Ko ha faiako lelei te ne tokoniʻi ke langa hake ʻa e tokotaha akó ʻi he makatuʻunga ko ia kuo ʻosi fokotuʻú. Hangē pē ko e langa ʻe he faiako ʻi he ʻapiakó mei he ʻilo ʻoku maʻu ʻe he kau akó ʻi he ʻaho ki he ʻaho, ʻoku totonu ke tau hoko atu maʻu pē ʻi heʻetau ʻuluaki ʻaʻahí mo ha fakamatala lahi ange ʻi he kaveinga tatau. ʻOku hoko leva ʻeni ʻo hokohoko ai pea mo fakalakalaka ʻa e fakakaukaú.
3 ʻI haʻo toe foki hili hono tuku ʻa e polosiua “Vakai! ʻOku Ou Fakafoʻou ʻa e Meʻa Kotoa Pe” te ke ʻilo nai ʻoku ola lelei ʻeni:
◼ “ʻI heʻeku ʻaʻahi mai ki muʻá, naʻá ta fetalanoaʻaki ai ki he “kuonga fakamui” naʻe hā ʻi he Tohitapú pea mo ʻene ʻuhinga kiate kitautolú. Kuó ke fifili nai pe ʻoku anga-fēfē ʻetau ʻilo ʻoku tau moʻui ʻi he kuonga fakamuí. (2 Tīm. 3:1) Naʻe vēkeveke ʻa e kau ākonga ʻa Sīsuú ke maʻu ha tali ki he fehuʻi ko iá. [Lau ʻa e Mātiu 24:3.] ʻI heʻene talí, naʻe fakamatalaʻi ai ʻe Sīsū ʻa e ngaahi tuʻunga ʻa ia ʻoku tau sio ʻoku kau kiate kitautolu ʻi he ʻaho ní. Naʻe kau ki ai ʻa e mamahi mo e fakamālohi kuo teʻeki ai mamata ai ki muʻa.” Tuhu ki he fakatātā mahino ʻo e fakaʻilongá ʻa ia ʻoku fakamatala ki ai ʻi he palakalafi 47 mo e 48 ʻi he peesi 25. Kapau ʻoku hā ngali tali lelei, fakamatalaʻi ange ʻa e founga ʻe ngata ai ʻa e ngaahi faingataʻá ni hangē ko ia ʻoku hā ʻi he palakalafi 49. Talaange te ke foki atu ʻo tali ʻa e ngaahi fehuʻi ʻoku ʻeke ʻi he peesi 30 ʻo e polosiuá.
4 Pe ʻi he foki ki he mahuʻingaʻia ʻi he polosiua “Vakai!” te ke lea nai:
◼ “Kuó u tokanga ʻaupito ke toe hoko atu ʻeta pōtalanoa fekauʻaki mo ʻetau taumuʻa ʻi he moʻuí. ʻOku ou tui ʻokú ta felotoi naʻe taumuʻa ʻa e ʻOtuá kiate kitautolú ke tau moʻui ʻi he māmani ko ʻení ʻi he fiefia mo e ngaahi tuʻunga melino kae ʻikai ko e maveuveu ʻoku tau aʻusia he ʻaho ní. ʻOkú ke fakakaukau te ne fakahoko ʻa ʻene talaʻofá?” Tuku ke ne tali. Lau ʻa ʻAisea 55:11, pea fetalanoaʻaki ʻi he ngaahi fakakaukau ʻi he palakalafi 52 mo e 53 ʻi he peesi 27. Fokotuʻu ange ko ha ako Tohitapu fakafoʻituitui ko e founga lelei taha pē ia ke maʻu ai ha taumuʻa ʻaonga ʻi he moʻuí.
5 Kapau naʻá ke tuku ʻa e polosiua “ʻI he Mate ha Taha ʻOkú Ke ʻOfa Ai,” te ke leaʻaki nai ʻeni:
◼ “ʻI heʻeta talanoa ki muʻá, naʻá ta fetalanoaʻaki ai ki he ʻamanaki papau ki he maté hangē ko ia ʻoku hā ʻi he Tohitapú. Ko e polosiua ko ia naʻá ku tuku atú ʻoku lave ai ki he ngaahi konga Tohitapu kehe ʻokú ne ʻomai ʻa e fiemālié kiate kitautolu. [Lau ʻa e konga tohi ʻe taha pe ua ʻi he puha he peesi 27 ʻo e polosiuá.] Naʻe faʻu ʻa e polosiuá ni ko ha tokoni ki he ako fakafoʻituitui fakafāmili ʻo e Tohitapú. Te u fiefia ke fakahā kiate koe ʻa e founga ʻo hono ngāueʻakí.”
6 Hili ʻa e toe ʻaʻahi taki taha, sivisiviʻi ia mo e fakakaukau ke toe ʻi ha tuʻunga ola lelei ange. ʻEke kiate koe: Naʻe ʻi ai ha meʻa pau ʻi hoku ʻatamaí ke leaʻaki? Naʻá ku hanganaki fakahanga ʻa e tokangá ki he Tohitapú? Naʻá ku langa hake ʻi he makatuʻunga naʻe fakatoka ʻi heʻeku ʻuluaki ʻaʻahí? Naʻe faʻufaʻu ʻeku tuʻuakí ke tataki atu ki ha ako Tohitapu? Ko ha ngaahi tali papau ʻokú ne fakapapauʻi mai ʻokú ke feinga mālohi ke hoko ko ha faiako lelei ʻo e Folofola ʻa e ʻOtuá.