Teuteu mo Fiefia ʻi he Ngaahi Fakataha ʻa e Fakatahaʻangá

¹ ʻI hotau tuʻunga ko ha feohiʻanga ʻo e ngaahi tokouá, ʻoku fakapotopoto ke tau fakatahataha maʻu pē ki heʻetau ngaahi fakataha fakauiké. (1 Tīm. 4:​15, 16) ʻOku lava fēfē ke tau fiefia mo maʻu ʻa e ʻaonga lahi taha mei ai?

² ʻOku totonu ke vaheʻi ha taimi ʻi ha tuʻunga tuʻumaʻu ke teuteu ai ki he ngaahi fakatahá. Ko e niʻihi te nau lava ke fakamoleki ʻa e taimi lahi ange ʻi he teuteú ʻi he niʻihi kehé. Kae kehe, tatau ai pē pe ʻoku tau femoʻuekina fēfē, ʻoku fakapotopoto ke ʻai ha taimi ke teuteu ai ki he ngaahi fakatahá. Teuteu fakataha fakafāmilí ʻoku mātuʻaki ʻaonga ʻaupito.​—ʻEf. 5:​15, 16.

³ Ki he Akoʻanga Fakafaifekau Fakateokalatí: Feinga ke ʻalu tatau mo e fakahokohoko lau Tohitapu fakauiké. (Siōs. 1:8) Lau ʻa e fakamatala ʻe lave ki aí, pea ʻomai mo e ngaahi tohi ʻe fiemaʻú koeʻuhi ke ke muimui ai ʻi he kau malangá. Fakakaukau ʻo fekauʻaki mo e ngaahi founga ʻoku lava ai ke ke ngāueʻaki ʻa e fakamatala ko ʻení ʻi hoʻo ngāue fakafaifekaú.

⁴ Ki he Fakataha Ngāué: Vakaiʻi ʻa e polokalama kuo fakahokohoko ʻi he ʻEtau Ngāue Fakafaifekau ʻo e Puleʻanga. Lau ʻa e ngaahi kupu ʻe fetalanoaʻaki ki aí. Kapau ko e fakamatala mei ha kupu ʻo ha Taua Leʻo pe ha tohi kehe ʻe lave ki aí, kumi ki ai pea lau foki mo ia. Kapau ʻe fakahāhaaʻi ha tuʻuaki ʻi he ngāue fakamalangá, ʻahiʻahiʻi ia ki muʻa koeʻuhi ke ke mateuteu ke ngāueʻaki kinautolu ʻi hoʻo ngāue fakafaifekaú.

⁵ Ki he Ako Taua Leʻo: Lau ʻa e lēsoní ki muʻa, tokangaʻi ʻa e ngaahi tali ki he ngaahi fehuʻí. Kumi ʻa e ngaahi konga Tohitapu ʻoku lave ki aí ʻe tokoni ia kiate koe ke maʻu ha mahino ʻoku lelei angé. Fakakaukauloto ki he kaunga ʻa e lēsoní mo ia kuó ke ʻosi ʻilo ki aí ʻe fakalahi ange ai ʻa hoʻo ʻiló. Palani ke kau ʻi he lolotonga ʻo e akó ʻaki hono teuteu ha fakamatala nounou ʻo ʻikai siʻi hifo ʻi ha palakalafi ʻe taha pe ua. Ko e founga mahuʻinga ʻeni ke fai ai “ae fakaha oe tau tui.”​—Hep. 10:23, PM.

⁶ Ki he Ako Tohi ʻa e Fakatahaʻangá: ʻUluakí, vakaiʻi ʻa e fakamatalá; fakatokangaʻi ʻa e kaveinga ʻo e vahé mo e ngaahi kaveinga tokoní. Hili ia, ʻi hoʻo lau iá, fakatokangaʻi ʻa e ngaahi fakakaukau mahuʻingá. Lau ʻa e ngaahi veesi ʻa ia ko e poupou mei he Tohitapú. Feinga ke tali ʻa e ngaahi fehuʻí ʻi he ngaahi lea pē ʻaʻau. ʻI hoʻo teuteu ʻa e lēsoní, toe fakamanatu ia ʻi ho ʻatamaí. Feinga ke manatuʻi ʻa e ngaahi poini tefitó mo e ngaahi ʻuhingá.​—2 Tīm. 2:15.

⁷ Fiefia ʻi he Ngaahi Fakatahá: Ke kakato ʻa e fiefia ʻi he ngaahi fakatahá, ʻoku mahuʻinga ke haʻu he taimi totonu ke kau ʻi he lotu kamatá, ʻo kole ʻa e laumālie ʻo Sihová. ʻE ʻaonga foki kiate koe ʻa e ngaahi hiva mālie ʻo e Puleʻangá. Kapau ʻoku ʻikai ke ʻi ai haʻo fānau iiki pe ko ha toe ʻuhinga kehe ke nofo ai ʻi mui ʻi he holó, ʻoku ngalingali te ke ʻilo kapau te ke nofo ʻo ofi ki muʻa, ʻe siʻisiʻi ange ai ʻa e ngaahi fakaheleleú pea te ke maʻu ai ʻa e ʻaonga lahi ange mei he polokalamá. Ko e ngaahi mātuʻa ʻoku ʻi ai ʻa ʻenau fānau iikí ʻa ia ʻe fiemaʻu nai ke ʻave ki tuʻa ʻi he lolotonga ʻo e fakatahá ʻe lava ke fakasiʻisiʻi ʻa e fakaheleleú ʻaki ʻenau nofo ofi ki he hala vahaʻa seá ʻo ofi ki muí.

⁸ Feinga ke sio ki he ngaahi konga Tohitapu ʻoku laú. ʻE tokoni ʻeni kiate koe ke manatuʻi ʻa ia ʻokú ke fanongo ki aí. Talanoa ki ho fāmilí mo e ngaahi kaumeʻá ʻo fekauʻaki mo e meʻa ʻokú ke akó ʻe maongo ʻa e fakamatalá ʻi ho ʻatamaí. ʻI hono ngāueʻaki ʻa e ngaahi fokotuʻu ko ʻení ʻe hoko ʻo mohu ʻuhinga ange ai ʻa e ngaahi fakatahá mo fakafiefia ange, pea ko e moʻoni te nau ‘fakaʻaiʻai ʻa kitautolu ki he ʻofa mo e ngaahi ngāue lelei.’​—Hep. 10:​24, 25.