Maʻu ʻAonga Kakato mei he Ngaahi Fakataha ki he Ngāue Fakamalangá
1. ʻE lava fēfē ke tokoniʻi kitautolu ʻe he ngaahi fakataha ki he ngāue fakamalangá?
1 Ko e ngaahi fakataha ola lelei ki he ngāue fakamalangá ʻoku ʻomai ai ʻa e fakalototoʻa moʻoni pea mo e fakahinohino ʻaonga ki muʻa ke tau ʻalu atu ʻi he ngāue fakafaifekaú. ʻOku nau fakaivia ai kitautolu ke tau kau ki ha faifakamoʻoni fakakulupu koeʻuhi ke lava ai ʻo tau ngāue fakataha mo e niʻihi kehé ʻi he fepoupouʻaki mo feakoʻaki. (Pal. 27:17; Koh. 4:9, 10) Ko e hā ʻe lava ke tau fai ke tau maʻu ʻaonga kakato ai mei he ngaahi fakataha ko ʻení?
2. Ko e hā ʻa e ngaahi meʻa ʻe niʻihi ʻe lāulea nai ki ai ʻa e tokotaha ʻokú ne tokangaʻi ʻa e kulupú?
2 Tokotaha Tokangaʻi Kulupú: ʻOku ʻikai ke faʻa fokotuʻutuʻu ki muʻa ha fakamatala pau ia ke lāulea ki ai ʻi he ngaahi fakataha ko ʻení. Ko ia ai, ʻoku fiemaʻu ʻa e teuteu leleí kapau te ke tokangaʻi ʻa e kulupú. ʻOua ʻe tōʻongaʻaki ʻa e lāulea ki he konga tohi fakaʻahó, ka te ke fili nai ke fakakau ia ʻi he lāuleá ʻo kapau ʻoku kaunga fakahangatonu ki he ngāue fakafaifekaú. Fakakaukau fekauʻaki mo ha tokoni ʻaonga te ke lava ke ʻoatu ki he faʻahinga ʻoku nau faifakamoʻoni he ʻaho ko iá. Ko e fakatātaá, te ke saiʻia ke lāulea nai pe fakahāhaaʻi ha tuʻuaki. Te ke loto nai ke fakamanatu ha meʻa mei he tohi Reasoning, tohi Ako Fakafaifekaú, pe ko ha konga mei he Fakataha Ngāue ki muí ni maí. ʻI ha ngaahi taimi kehe, te ke lāulea nai ki he founga ke fakaleleiʻi ai ha palopalema ʻoku malanga hake ʻi ho feituʻú, pe te ke lāulea nai ki he founga ke fakatupulekina ai ha mahuʻingaʻia pea kamata ha ngaahi ako Tohi Tapu, tautefito kapau ʻe fai ʻe he kau malangá ha ngaahi toe ʻaʻahi. Tatau ai pē pe ko e hā ʻoku fai ki ai ʻa e lāuleá, hoko ʻo loto-māfana mo fakakaukau pau.
3. Ko e hā hono lōloa ʻa e fakatahá, pea ko e hā ʻoku totonu ke fakahoko he lolotonga ʻo e taimi ko iá?
3 Kamata ʻa e fakatahá ʻi he taimi totonu, neongo ʻokú ke ʻilo ʻe tōmui nai ha niʻihi. Ngāueʻaki ʻa e fakakaukau fakapotopotó ʻi hono fokotuʻutuʻu ʻa e ngaahi kulupú, pea vaheʻi ʻa e feituʻu ngāué ki he faʻahinga ʻoku nau fiemaʻu iá. ʻOku totonu ke ʻoua ʻe toe laka hake ʻi he miniti ʻe 10 ki he 15 pe toe siʻi hifo ai ʻa e lōloa ʻo e fakatahá, kapau ʻe hoko atu ai ha fakataha ʻa e fakatahaʻangá. Ki muʻa ke ke fakaʻosi ʻa e fakatahá, ʻoku totonu ke ʻilo ʻe he tokotaha kotoa ʻa hono hoa ngāué pea mo e feituʻu ke nau ngāue aí. ʻOku totonu ke fakaʻosi ʻa e fakatahá ʻaki ʻa e lotu.
4. Ko e hā ʻe lava ke ne tokoniʻi ʻa e tokotaha kotoa ke maʻu ʻaonga kakato mei he ngaahi fakataha ki he ngāue fakamalangá?
4 ʻE Lava Ke Mou Tokoni: Hangē ko e ngaahi fakataha ʻa e fakatahaʻangá, ʻoku tau fakahā ʻa e fakaʻapaʻapa kia Sihova mo e fakaʻatuʻi ki he niʻihi kehé ʻaki ʻa e aʻu tōmuʻa ki he ngaahi fakatahá. Kau ki he fetalanoaʻakí. Te mou tuku nai ʻa e tokotaha ʻokú ne tokangaʻi ʻa e kulupú ke ne fili ʻa e tokotaha ke mou ngāué, pe te mou fai nai ʻa hoʻomou ngaahi fokotuʻutuʻú ki muʻa ʻi he fakatahá. Kapau ʻoku mou loto ke fai hoʻomou ngaahi fokotuʻutuʻu pē ʻa kimoutolu, feinga ke “fano” atu ʻaki ʻa e ngāue fakataha mo ha kau malanga kehekehe, kae ʻikai ko e ngāue pē ʻi he taimi kotoa mo e ngaahi kaumeʻa ofí. (2 Kol. 6:11-13) ʻI hono fakaʻosi ʻa e fakatahá, fakaʻehiʻehi mei hono liliu ʻa e ngaahi fokotuʻutuʻú, pea mavahe leva ki he feituʻu ngāué.
5. Ko e hā ʻa e taumuʻa ʻa e ngaahi fakataha ki he ngāue fakamalangá?
5 ʻOku taumuʻa tatau pē ʻa e ngaahi fakataha ki he ngāue fakamalangá mo e ngaahi fakataha kehe ko ia ʻa e fakatahaʻangá. ʻOku fokotuʻutuʻu ia koeʻuhi ke lava “ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei.” (Hep. 10:24, 25) Kapau te tau feinga ke maʻu ʻaonga mei he ngaahi fakataha ko ʻení, ʻe tokoniʻi ai kitautolu ke tau fakahoko ʻetau ngāue fakafaifekaú—ko ha “ngaue lelei” moʻoni!