Puha Fehuʻi
◼ Ko e hā ʻa e fakamatala ʻoku totonu ke ʻoatu ʻi he ngaahi fakataha ki he ngāue fakamalangá?
Ko e taumuʻa ʻo ha fakataha ki he ngāue fakamalangá ke tokoniʻi kitautolu ke tau tokangataha ki he ngāue ko ʻení—ʻa e ngāue fakafaifekaú. Ko ia ai, ʻoku totonu ke teuteu lelei ʻa e tokotaha faiakó pea mateuteu ke ne ʻomai ha meʻa ʻoku fakalototoʻa, pau mo ʻaongá. Kapau ʻoku fekauʻaki fakahangatonu ʻa e konga tohi ʻo e ʻahó mo e ngāue fakamalangá, ʻe lau nai ia pea fakamatalaʻi nounou. Kae kehe, ʻoku totonu ke fakatefito pē ʻa e fakatahá ʻi he ngāue fakafaifekaú, ʻo tokoniʻi ʻa e faʻahinga kotoa ʻoku nau ʻalu atu ʻi he ngāue fakaefakamoʻoní ke nau mateuteu lelei ange ai ke fakahoko ʻa e ngāue fakafaifekau ʻo e ʻaho ko iá.—2 Tim. 4:5.
ʻE fakamatalaʻi nai ha ngaahi poini feʻungamālie mei he ʻEtau Ngāue Fakafaifekau ʻo e Puleʻanga ke ʻilo ʻe he tokotaha kotoa pē ʻa e tohi ki he tuʻuaki lolotongá pea mo e founga ke fakahoko aí. ʻI he ʻAho Makasiní ko ha tuʻuaki mei he “Meʻa ke Leaʻaki Fekauʻaki mo e Ngaahi Makasiní” ʻe lava ke fakahāhaaʻi. ʻI he ngaahi feingangāue kehé, ko ha talateu ʻe taha pe ua ʻi he kiʻi tohi ko e Kamata mo Hoko Atu ʻa e Fetalanoaʻaki ʻa ē ʻoku feʻungamālie ki he feituʻu ngāue fakalotofonuá ʻe fakaeʻa nai. ʻE fakamatalaʻi nai pe fakahāhaaʻi ha tafaʻaki ʻo e ngāue fakafaifekaú, hangē ko e founga ke ngāueʻaki ai ʻa e Tohitapú ʻi he matapaá, founga ke fakaleleiʻi ai ha hoko ha taʻofiʻanga ʻo e fetalanoaʻakí, founga ke tuʻuaki ai ha ako Tohitapu, pe founga ke fai ai ha toe foki ki he kau mahuʻingaʻiá.
Ko e ngaahi fakataha ki he ngāue fakamalangá ʻoku totonu ke ʻoua ʻe toe laka hake ia ʻi he miniti ʻe 10 ki he 15, ʻa ia ʻoku kau ai ʻa e fokotuʻutuʻu ʻo e ngaahi kulupú, vaheʻi ʻo e feituʻu ngāué pea mo hono fai ha lotu. ʻI he taimi ʻo e mātuku atú, ʻoku totonu ke ʻilo ʻe he faʻahinga kotoa pē ʻoku ʻi aí ʻa hono hoá pea mo e feituʻu te nau ʻalu ʻo ngāue aí, pea ʻoku totonu ke nau mavahe leva he vave tahá ki he feituʻu ngāué. ʻI he vakai atu ki he nounou ʻa e fakatahá, ʻoku mahuʻinga ki he tokotaha kotoa pē ke ne aʻu taimi totonu ki ai. ʻI he taimi ʻoku hoko mai ai ha fakataha ki he ngāue fakamalangá ʻi he hili ha fakataha ʻa e fakatahaʻangá, hangē ko e Ako Taua Leʻo, ʻoku totonu ke nounou ange. ʻOku ʻikai fiemaʻu ke lāulea ki he konga tohi ʻo e ʻahó, koeʻuhi he kuo ʻosi fai ha fetalanoaʻaki Fakatohitapu lelei ia.
ʻOku totonu ke vaheʻi ki muʻa ha fanga tokoua ʻosi papitaiso taau ke nau tataki ʻa e fakataha taki taha ki he ngāue fakamalangá. Kapau ʻoku ʻikai ha taha ʻe ala maʻu ke ne tokangaʻi ha ʻaho pau, ʻoku totonu ki he kau mātuʻá ke nau fili ha fanga tuofāfine ʻosi papitaiso ʻe lava ke nau fai ia ʻi he taimi ʻoku malanga hake ai ha fiemaʻú. ʻI he lolotonga ʻo e kei tangutú, ʻe kamata nai ʻe he tuofefiné ha fetalanoaʻaki fakakulupu ʻi he konga tohi ʻo e ʻahó pe ko ha ngaahi poini kehe ʻoku felāveʻi mo e ngāue fakamalangá, ʻo tauhi ke nounou ʻa ʻene ngaahi fakamatalá. Te ne tui ha pūlou.
Ko e ngaahi fakataha ki he ngāue fakamalangá ko ha ngaahi faingamālie lelei ia kiate kitautolu ke tau loto-toʻa pea mateuteu ai ke kau ʻi he ngāue fakafaifekaú. Ko e lelei ange ʻa e teuteu ʻa e tokotaha faiakó, ko e lahi ange ia ʻa e lelei ʻe maʻu ʻe he tokotaha kotoa pē.