Tuʻuaki ʻa e Tohi Ko ʻEku Tohi ʻo e Ngaahi Talanoa Faka-Tohitapú
1 Naʻa tau fiefia ʻi he taimi naʻe tukuange mai ai ʻa e tohi foʻou ko e Ko ʻEku Tohi ʻo e Ngaahi Talanoa Faka-Tohitapú! ʻOku faʻú ke tokoni ki he kakaí ke nau maʻu ʻa e mahino ki he ngaahi talanoa ʻi he Tohitapú. ʻI Tīsemá te tau tuʻuaki ai ʻa e tohi ko ʻení ʻi hotau feituʻú. Ko e hā ʻoku lava ke tau leaʻaki ke langaʻi ʻa e mahuʻingaʻiá?
2 Ko ha tuʻuaki ʻeni ʻe fakamānako nai ki ha tokotaha kuo hoko ʻo vaivai ʻene tui ki he ʻOtuá:
◼ “Ko e kakai tokolahi naʻa nau tupu hake ʻo nau tui ki he ʻOtuá, ka ʻi he taimí ni ʻoku nau ʻilo ko ʻenau tuí ʻoku ʻikai ke kei mālohi ʻo hangē ko ia ki muʻá. Ko e hā ʻa hoʻo fakakaukau ki he ʻuhinga nai ʻo e meʻa ko iá? [Tuku ke ne tali.] Ko ʻetau tui ki he ʻOtuá ʻoku hoko ʻo mālohi ia ʻi hono fakatokangaʻi ʻa e ngaahi meʻa fakaofo ʻo e ʻuniveesí. [Lau Sāme 19:1.] Ko e Tokotaha ko ia ʻoku ʻaʻana ʻa e ngaahi lao ʻokú ne puleʻi ʻa e ngaahi meʻa fakahēvani ko ʻení kuó ne tokonaki mai foki ha fakahinohino mahuʻinga kiate kitautolu. [Lau Sāme 19:7-9.] ʻOku fakamamafaʻi ʻe he ngaahi veesi ko ʻení ʻa e mahuʻinga ke ako ʻa e meʻa kotoa pē te tau lavá ʻo fekauʻaki mo e ʻOtuá mo ʻene ngaahi taumuʻá. [Fakahanga ʻa e tokangá ki he fakatātā ʻi he Talanoa 71 pea fakamatala ki he taumuʻa ʻa e ʻOtuá ki ha palataisi ʻi he kahaʻú.] Kapau ʻokú ke loto ke ke maʻu ha ʻaonga mei he ʻilo ko ʻení, te u fiefia ke tuku ʻa e tohi ko ʻení maʻau.”
3 ʻI he ʻi ai ha ngaahi ongoongo fakamamahi ki muí ni ʻi hoʻo fakakaukaú, te ke pehē nai:
◼ “Ngalingali kuó ke fanongo ʻo fekauʻaki mo e [lave ki he meʻa ʻoku hokó]. Kuó ke fifili pe ʻoku tokanga moʻoni mai ʻa e ʻOtuá ʻo fekauʻaki mo e fakamaau taʻetotonu mo e faingataʻaʻia ʻa ia ʻoku tau faʻa sio ki ai ʻi hotau ʻātakaí pea ʻoku toe faʻa hoko foki kiate kitautolú? [Tuku ke ne tali.] ʻOku fakapapauʻi mai ʻe he Tohitapú kiate kitautolu ʻoku ʻofaʻi ʻe he ʻOtuá ʻa kitautolu pea te ne tokoniʻi kitautolu ʻi he ngaahi taimi faingataʻá.” Lau ʻa e ngaahi konga ʻo e Sāme 72:12-17. Fakaava ʻa e tohí ki he Talanoa 26 pea fakahā ko e talanoa ko ʻení ʻoku fekauʻaki ia mo e meʻa naʻe hoko kia Siopé ʻokú ne tali ʻa e fehuʻi kuo ʻeke ʻe he laui miliona, Ko e hā ʻoku fakangofua ai ʻe he ʻOtuá ʻa e faingataʻá? “Te ke ʻilo ʻoku fakafiemālie ʻaupito ʻa e tali ʻa e Tohitapú ki he fehuʻi ko iá. ʻOku ou loto ke tuku ʻa e tohi ko ʻení maʻau koeʻuhi ke ke lava ʻo lau ʻo fekauʻaki mo ia.”
4 Kapau te ke feʻiloaki mo ha mātuʻa, te ke fakahanga nai ki he fāmilí:
◼ “ʻOku loto tatau ʻa e ngaahi mātuʻa tokolahi taha ʻoku lahi ʻa e ngaahi palopalema ʻi feinga ke tauhi maʻu ha fāmili fiefiá. Ko e hā ʻokú ke fakatokangaʻi ko e ngaahi fakafaingataʻaʻiaʻanga mamafá? [Tuku ke ne tali.] Ko e tokolahi taha ʻo kitautolu ʻoku tau fai ʻa e lelei taha ʻoku tau malavá, ka ʻoku tau faʻa houngaʻia ʻi ha tokoni ʻe tokoniʻi ai kitautolu ke maʻu ha ngaahi ola lelei ange. ʻOku ʻomai ʻe he Tohitapú ʻa e fakahinohino lelei ʻaupito. [Lau ʻa e ngaahi konga ʻo e Kolose 3:12, 18-21.] Ko e tohi ko ʻení ʻoku tokoni ia ki he ngaahi mātuʻá ke akoʻi ki he fānaú ʻa e ngaahi talanoa tefito mei he Tohitapú. ʻOku ou fakapapauʻi te ke fiefia ʻi hoʻo lau ia mo kinautolú.”
5 Kapau ʻokú ke saiʻia ke fuonounou, te ke ʻahiʻahi nai ʻeni:
◼ “Kuó ke faʻa fifili nai ki he ʻuhinga ʻoku tau fakaʻau ai ʻo motuʻa pea maté? Ko e Talanoa 4 ʻi he tohi ko ʻení ʻoku fakamatala ki he tupuʻanga ʻo e maté pea ko e Talanoa 115 ʻokú ne fakahā ʻa e founga ʻe toʻo atu ai ia ʻe he ʻOtuá. ʻOku talamai ʻe he Tohitapú kiate kitautolu kuo talaʻofa ʻe he ʻOtuá ʻa e moʻui taʻengatá kiate kinautolu ʻoku nau ʻofa kiate iá. [Lau Sione 17:3.] Kapau ʻokú ke fie lau ʻo fekauʻaki mo e meʻá ni, te ke ʻilo ʻoku fakatupu ʻilo ʻaupito ʻa e tohí ni.”
6 Kapau ʻoku tau mateuteu lelei, te tau malava nai ʻo ngāueʻaki ʻa e tohí ni ke ‘vete ʻa e Tohi tapú’ ki he niʻihi kehé ʻi ha founga ʻe hoko ai kiate kinautolu ha fiefia lahi!—Luke 24:32.