Hanganaki Leaʻaki ʻa e Moʻoní
1 Naʻe fakahā ʻe he ongo ʻaposetoló: “He ʻe ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” (Ng. 4:20) ʻI he ʻahó ni ko kitautolu foki kuo pau ke tau hanganaki leaʻaki ʻa e moʻoní. Neongo ko hono tufaki ʻo e Taua Leʻo mo e Awake! ko ha ʻuhinga ia ke maʻu ai ha faʻahinga te nau fiefanongo, kuo pau ke tau toe foki kapau ʻoku tau fiemaʻu ke akoʻi lahi ange ʻa e moʻoní ki he faʻahinga mahuʻingaʻiá.
2 ʻI he toe foki hili ʻa hono tuku ʻa e Awake! makehe ʻo ʻEpeleli ʻoku ʻi ai ʻa e kupu “Taimi ʻE ʻIkai ke Toe ʻI Ai ha Tau,” ʻe lava ke ke kamata ha ako Tohitapu ʻaki hono ʻeke ange:
◼ “ʻI he taimi fakamuimuí, naʻá ta talanoa ai ʻo kau ki he ngaahi tau ʻa e ngaahi puleʻangá pea mo e kaunga ki ai ʻa e lotú. Kuó ke fakatokangaʻi ko e ngaahi meʻa pehē ʻoku hokó ʻoku hā mahino ai ʻoku tau lolotonga moʻui ʻi he taimi ʻoku ui ʻe he Tohitapú ko e ngaahi ʻaho fakaʻosí? [Fakaʻaliʻali ʻa e tohi ko e ʻIló. Lau ʻa e ʻuluaki palakalafi ʻi he vahe 11, pea fakamatalaʻi ʻa e puha ʻi he peesi 102.] Ko e tohí ni ʻokú ne fakamatalaʻi ʻa e kaveinga ko ʻení fakataha mo e kaveinga kehe ʻe 18 ʻoku hiki heni ʻi he fakahokohokó. [Fakahā ʻa e peesi 3.] Kapau ʻe lava nai, te u saiʻia ke fakahāhaaʻi ʻa e founga ʻe lava ai ʻe he tohí ni ke tokoniʻi koe ke maʻu ha mahino ki he ngaahi meʻa faka-Tohitapu ko ʻení.” Kapau te ne tali, kamata ha ako Tohitapu ʻi he peesi 6.
3 Kapau naʻá ke talaʻofa ke toe foki ange ʻo fakamatalaʻi ʻa e founga ʻe malava ke fiefia ai ʻi ha moʻui malu he taimí ni, ʻe lava ke ke leaʻaki nai ha meʻa hangē ko ʻení:
◼ “ʻI heʻeta ʻuluaki fetaulakí, naʻá ku fakahā atu ai kiate koe ha konga mei he Tohitapú ʻa ia ʻokú ne ʻomai kiate kitautolu ʻa e ʻuhinga ke tau fakatuʻamelie atu ai fekauʻaki mo e kahaʻu ʻo e tangatá. ʻI he ʻahó ni te u saiʻia ke fakahanga hoʻo tokangá ki he meʻa ko ia ʻoku fakahā ai ʻa e tokotaha ko ia ʻe lava ke ne ʻomai kiate kitautolu ha ongoʻi malu he taimi ní.” Lau ʻa e Sāme 4:8. Huke ki he peesi 168 ʻi he tohi ko e ʻIló pea lau ʻa e palakalafi 19. Pea ʻeke ange foki: “Te ke fiefia ʻi ha ako Tohitapu taʻetotongi ʻi ʻapi ʻa ia ʻe fakahaaʻi lelei ai ʻa e founga ʻe lava ke ke maʻu ai ʻe koe foki ʻa e faʻahinga maluʻanga ko ʻení ʻi hoʻo moʻuí?” Kapau ʻe tali ʻio, huke ki he vahe 1.
4 ʻE lava ke ke fai ha tuʻuaki fakahangatonu ʻo ha ako ʻi he toe ʻaʻahí ʻaki ʻa e pehē:
◼ “ʻOku mau tufaki ʻemau ngaahi makasiní ʻi māmani lahi ke fakahā ki he kakai ʻi he feituʻu kotoa pē ʻo fekauʻaki mo e meʻa ʻoku akoʻi ʻe he Tohitapú. Kapau ʻoku houngaʻia ʻa e tokotaha tāutaha ʻi he meʻa ʻoku nau akó, ʻoku mau tuʻuaki ha ako Tohitapu taʻetotongi ʻi ʻapi. ʻOku mau ngāueʻaki ʻa e tohí ni, ʻIlo ʻA Ia ʻOku Taki Atu ki he Moʻui Taʻengatá, ko ha tataki. Tuku ke u fakahā nounou atu ʻa e founga ʻo hono fai ha ako.”
5 Kapau te tau hanganaki leaʻaki ʻa e moʻoní, ʻe lava ke tau fakapapauʻi ʻe ʻi ai ha niʻihi te nau fiefanongo pea tali lelei.—Mk. 4:20.