Ngāueʻi Fakaʻāuliliki Ho Feituʻú
1 ʻI he ngaahi feituʻu nofoʻangá ʻoku tau ʻilo ai mei he taimi ki he taimi ha kiʻi feituʻu fakapisinisi, hangē ko ha falekoloa, falekai, pe falekoloa fakamovetevete. Kapau ʻoku pau ke ngāueʻi kotoa ʻa e ngaahi feituʻú ni fakataha mo e toenga ʻo e feituʻú ni, ʻoku totonu ke ke ʻaʻahi kiate kinautolu ʻi he tuʻunga tatau pē mo e ngaahi nofoʻangá.
2 ʻE lava ke ke ngāueʻaki ha lea kamata faingofua mo nounou, ʻo pehē nai: “ʻOku ʻi ai ha meʻa te u saiʻia ke fakahā atu kiate koe.” Kapau ʻoku hā ngali femoʻuekina ʻa e tokotaha pulé ʻi he taimi ko iá, te ke tuʻuaki pē nai ha tuleki peá ke pehē: “Te u toe foki mai ʻi he taimi ʻoku ʻikai te ke fuʻu femoʻuekina aí. Te u saiʻia ke ʻilo pe ko e hā hoʻo fakakaukau ki he tulekí ni.”
3 ʻOku ʻikai ke ʻi ai ha fiemaʻu ke ongoʻi manavasiʻi ai fekauʻaki mo hono fai ʻo e ngāue ko ʻení. Naʻe fakamatala ʻe ha tokotaha malanga ʻe taha: “Naʻá ku ʻamanekina ʻe taʻefakafiemālie ʻa e talí. Kae kehe, naʻá ku ʻohovale, ko e tali ki he pōpoaki ʻo e Puleʻangá naʻe mātuʻaki kehe ʻaupito. Naʻa nau anga-fakaʻapaʻapa mo anga-fakakaumeʻa moʻoni pea naʻe meimei tuku maʻu pē ʻa e ngaahi makasiní.”
4 Naʻe fakaafeʻi ʻe ha fefine ʻoku ngāue ʻi ha kautaha fakatau ʻapi ha ongo Fakamoʻoni ki hono ʻōfisí. Naʻá ne tali ʻa e ngaahi makasiní pea fakahā ʻa e mahuʻingaʻia ke fai ha ako Tohitapu. Naʻe fakaʻaliʻali kiate ia ʻa e tohi ko e ʻIlo, pea naʻe kamata leva ha ako, ʻi he taimi pē ko iá ʻi hono ʻōfisí!
5 Ko hono vaheʻi ke ngāueʻi fakaʻāuliliki ho feituʻú ʻoku kau ki ai ʻa e ʻaʻahi ki he faʻahinga tāutaha ʻoku nau fakalele ʻa e ngaahi pisinisi takatakaí. (Ng. 10:42) Fokotuʻutuʻu ke ʻaʻahi ki he ngaahi matapaá ni ʻo hangē pē ko ia ʻi he ngaahi ʻapi tāutahá. ʻOku ʻikai ngata pē ʻi hono ngāueʻi fakaʻāuliliki ange ai ho feituʻú ka ʻe fakapaleʻi nai ai koe ʻi ha ngaahi meʻa fakafiefia naʻe hokosia!