Ongoongo Lelei ʻi he ʻInitanetí

ʻI hotau kuonga fakatekinolosiá, ʻoku maʻu ʻe he kakai ʻe niʻihi ʻa e fakamatala mei he ngaahi matavai fakaʻilekitolōnika, kau ai ʻa e ʻInitanetí. Ko ia, kuo ʻai ʻe he Sōsaietí ki he ʻInitanetí ʻa e fakamatala totonu ʻe niʻihi fekauʻaki mo e tui mo e ngāue ʻa e Kau Fakamoʻoni ʻa Sihová.

Ko ʻetau tuʻuʻanga Web ʻInitanetí kuo ʻi ai ʻa e tuʻasila http://www.watchtower.org pea ʻoku ʻi ai ʻa e ngaahi tulekí, ngaahi polosiuá, pea mo e ngaahi kupu ʻo e Taua Leʻo mo e Awake! kuo fili ʻi he faka-Pilitānia, Siaina (Faingofua), Siamane, Lūsia, mo e faka-Sipeini, pehē foki ki he ngaahi lea kehé. Ko e ngaahi tohi ʻoku ʻi he tuʻuʻanga Web ko ʻení ʻoku ʻosi ala maʻu ia ʻo fakafou ʻi he ngaahi fakatahaʻangá pea ʻoku ngāueʻaki ia ʻi he ngāue fakamalangá. Ko e taumuʻa ʻo ʻetau tuʻuʻanga Web, ʻoku ʻikai ko hano tuku ange mai ha ngaahi tohi foʻou, ka ko hono ʻai ke ala maʻu ʻa e fakamatalá ʻe he kakaí ʻo fakafou ʻi he faʻunga fakaʻilekitolōniká. ʻOku ʻikai ke ʻi ai ha fiemaʻu ki ha tokotaha tāutaha ke ne teuteu ha fakamatala ʻi he ʻInitanetí fekauʻaki mo e Kau Fakamoʻoni ʻa Sihová, ko ʻetau ngaahi ngāué, pe ko ʻetau ngaahi tuí. Ko ʻetau tuʻuʻanga fakapuleʻangá ʻokú ne tauhi ha fakamatala totonu ki ha taha pē ʻokú ne fiemaʻu ia.

Neongo ko hotau tuʻuʻangá kuo ʻikai te ne tokonaki mai ha pōpoaki fakaʻilekitolōnika (E-mail), ʻoku fakahokohoko ai ʻa e ngaahi tuʻasila fakaemeili ʻo e ngaahi vaʻa takatakai ʻi he kolopé. Ko ia, ʻe lava ʻa e kakaí ʻo tohi ke maʻu ha fakamatala lahi ange pe ke maʻu ha tokoni fakafoʻituitui mei he Kau Fakamoʻoni fakalotofonuá. Ongoʻi tauʻatāina ke vahevahe ʻa e tuʻasila Fakaʻinitaneti ʻi ʻolungá mo ha niʻihi ʻoku nau hehema nai ke kamata ke ako ʻa e moʻoni ʻo e Tohitapú mei he faʻunga ko ʻení.