ʻOku Ongo Hoʻo Pulí!
1 Mei he taimi ki he taimi, ʻoku tau liʻaki nai ai ha fakataha ʻe taha pe lahi ange ʻa e fakatahaʻangá, ʻo fakakaukau ʻe ‘ʻikai ha taha ia te ne ongoʻi ʻeku pulí; heʻikai te nau fakatokangaʻi ʻe kinautolu ʻoku ʻikai te u ʻi ai.’ ʻOku ʻikai ke moʻoni ia! Hangē pē ko ha mēmipa ʻo hotau sino fakakakanó, ko kitautolu taki taha ʻoku tau fakahoko ha ngafa mahuʻinga ʻi hono ngāueʻi ʻa e fakatahaʻangá. (1 Kol. 12:12) Ko ʻetau liʻaki mei ha fakataha fakauike ʻe lava ke uesia ʻa e moʻui-lelei fakalaumālie ʻa e niʻihi kehe ʻoku nau ʻi aí. Kapau ʻoku ʻikai te ke ʻi ai, fakapapauʻi—ʻoku ongo hoʻo pulí!
2 Ko e Ngafa Mahuʻinga ʻOkú Ke Fakahokó: Naʻe fakaʻamu ʻa Paula ke feohi mo hono ngaahi tokouá. ʻOku fakamatalaʻi ʻa e ʻuhingá ʻe he Loma 1:11, 12 (PM): “Koeuhi keu atu kiate kimoutolu ha foaki fakalaumalie . . . Koeuhi ke tau fiemalie fakataha mo kimoutolu, i he tui be taha a moutolu mo au.” Pehē foki, ʻi heʻetau ngaahi talí, ko ʻetau ngaahi konga ʻi he fakatahá, pea mo ʻetau ʻi aí, ʻoku lahi ai ʻa e meʻa ʻoku tau faí ke felangahakeʻaki ke hokohoko atu ʻi he ʻalunga anga-tonú.—1 Tes. 5:11.
3 ʻIkai ʻokú ke fakatuʻotuʻa atu ke sio ki he niʻihi kehé ʻi he ngaahi fakataha ʻa e fakatahaʻangá? ʻOkú ke fanongo lelei ai ki heʻenau ngaahi talí pea houngaʻia ʻi heʻenau fakahāhaaʻi ʻa e tuí. Ko ʻenau ngaahi meʻaʻofa fakalaumālié ʻoku tānaki atu ia ki ho langa haké. Kapau ʻoku ʻikai te nau ʻi he fakatahá, te ke ongoʻi kuo puli atu ha meʻa mahuʻinga. ʻOku ongoʻi tatau pē ʻe ho ngaahi tokouá mo e tuofāfiné fekauʻaki mo koe kapau ʻoku ʻikai te ke ʻi ai.
4 Ko e Ngafa Mātuʻaki Mahuʻinga ʻOku Fakahoko ʻe he Ngaahi Fakatahá: Naʻe ʻi ai ha fakamatala ʻa e Taua Leʻo ki he founga ʻoku mātuʻaki mahuʻinga ai ʻa e ngaahi fakatahá ki hotau fakahaofi fakalaumālié, ʻo pehē: “ʻI he māmani fekeʻikeʻi, mo anga-kovi ko ʻení, ko e fakatahaʻanga Kalisitiané ko ha hūfangaʻanga fakalaumālie moʻoni ia . . . , ko ha mālōlōʻanga ʻo e melino mo e ʻofa. Ko ia ai, hoko ko ha tokotaha maʻu fakataha maʻu pē ʻi he kotoa ʻo hono ngaahi fakatahá.” (w93-E 8/15 11) ʻI he ʻaho taki taha, ʻoku tau hokosia ai ʻa e ngaahi tuʻunga ʻokú ne fakaongosiaʻi fakalaumālie kitautolu. Kapau ʻoku ʻikai te tau tokanga, te tau hoko ʻo nōfoʻi ʻi heʻetau ngaahi loto-moʻua pē ʻatautolú ʻo mole ai meiate kitautolu ʻetau vakai ki he meʻa fakalaumālie mahuʻinga angé. Ko kitautolu kotoa ʻoku fakafalala ʻi he fefakalototoʻaʻaki ʻoku tau fiemaʻú koeʻuhí ke tau tuʻumaʻu fāʻūtaha mo faivelenga ʻi he ngāue ʻa e ʻOtuá.—Hep. 10:24, 25.
5 Ko ʻetau maʻu ʻa e ngaahi fakatahá ʻoku mātuʻaki mahuʻinga. Ko e mahamahakí pe ha meʻa taʻeʻamanekina te ne ʻai nai ai kitautolu ke tau liʻaki he taimi ki he taimi. Kae kehe, tau fakapapauʻi maʻu pē ʻoku fakakau kitautolu ʻi he lotolotonga ʻo e kakai tokolahi ʻoku nau fakahīkihikiʻi fakataha ʻa Sihová!—Sāme 26:12.