Fakahā ʻa e Fakaʻapaʻapa ki he Feituʻu Faiʻanga Lotu kia Sihová
1 ʻI he taimi ʻoku tau hoko ai ko ha tokotaha ʻaʻahi ʻi ha ʻapi ʻo ha taha, ʻoku tau fakahā ʻa e fakaʻapaʻapa ki he koloa ʻa e tokotaha ko iá, ʻo ʻikai ko hono fai ha meʻa ke maumauʻi ai ia, pea ʻoku ʻikai te tau fakameleʻi ʻa e fokotuʻutuʻu maau ʻo e falé. ʻOku totonu ke lahi fēfē ʻa ʻene moʻoni ʻeni, ʻi he taimi ʻoku tau hoko ai ko e kau ʻaʻahi ʻa Sihová! ʻOku tau moʻuaʻaki ke ʻiloʻi ʻa e founga ke tau ʻulungaangaʻaki ʻi hono falé. (Sāme 15:1; 1 Tim. 3:15) Pe ko ʻetau fakataha faka-Kalisitiane ʻoku fai ʻi he Fale Fakatahaʻangá, ʻi ha ʻapi, pe ko ha fale maʻá e kakaí, ko e tokolahi taha ʻo kitautolú ʻoku tau fakahā maʻu pē ʻa e fakaʻapaʻapa ki heʻetau faiʻanga lotú ʻo hangē pē ko ha fale ia ʻo Sihová, ʻa ia “ko hoʻóna langilangi pe ʻoku fotu ʻi he fonua mo e langi.”—Sāme 148:13.
2 Ko e ngaahi tokoua ʻe niʻihi ʻoku ʻikai te nau fakahā ha fakaʻapaʻapa ʻi he ngaahi fakatahá ʻaki ʻenau longoaʻa pe fai ha meʻa ʻo hangē ʻoku ʻikai ke mahuʻinga ʻa e fakamatala ia ʻoku fakahoko maí. Ko ha kakai lalahi tokosiʻi ʻoku nau fai ha ngaahi fetalanoaʻaki noaʻia ʻi he hala vahaʻa lokí, loki hūʻangá, fale mālōloó, pe ʻi tuʻa ʻi he Fale Fakatahaʻangá lolotonga ia ʻoku fai ʻa e fakatahá. ʻI he taimi ʻoku mavahe ai ha tama lahi ke tokangaʻi ha tama kei siʻi, ʻi he taimi ʻe niʻihi ko e toko ua ko ʻení ʻokú na vaʻinga ʻo maʻu pē ai ha ʻaonga siʻi mei he polokalamá. Ko e kau talavou ʻe niʻihi kuo fakatokangaʻi ʻi tuʻa ʻi he Fale Fakatahaʻangá he hili ʻa e ngaahi fakatahá, ʻoku nau vaʻinga, hoko ʻo fuʻu longoaʻa, naʻa mo hono fai ʻo e fetauʻakaʻaki hangē ha tau kalaté. ʻI he ngaahi founga ʻe niʻihi, ʻoku nau fakahohaʻasi ai ʻa e ngaahi kaungāʻapí pe fakafaingataʻaʻiaʻi ai ʻa e ngaahi meʻalele ʻi he tauʻanga meʻalelé pe ʻi he halá.
3 Founga ke Fakaʻehiʻehi Ai mei he Hoko ʻo Taʻefakaʻapaʻapá: Ko hono fakahoungaʻi ʻa e ngeia mo e toputapu ʻo ʻetau lotú, ʻoku ʻikai ha veiveiua ʻoku ʻikai te tau fiemaʻu ke fakahohaʻasi ʻa e niʻihi kehé ʻaki ha fanafana, kai, lamu pululole, fakangahaha pepa, ko hono fai ha ʻalu noaʻia ki he fale mālōloó, pe tōʻongaʻaki ʻa e haʻu tōmui ki he ngaahi fakatahá. Ko e ngaahi mātuʻa fakaʻapaʻapa mo houngaʻiá ʻoku ʻikai te nau fakaʻatā ʻenau fānaú ke nau fakaʻuliʻi ʻa e kāpetí, meʻa ʻufiʻufí, pe holisi ʻo e Fale Fakatahaʻangá pe ko e ʻapi ʻoku fai ai ʻa e ako tohí. Pea ʻoku ʻikai ha veiveiua ko e kotoa ʻo kitautolú ʻoku tau loto-tatau ʻoku ʻikai taau ke ʻi ai ha faʻahinga tōʻonga fakamā, talanoa fakasesele, pe hua fakalielia ʻi heʻetau ngaahi fakatahá.—Ef. 5:4.
4 Kapau te tau manatuʻi maʻu pē ʻa e taumuʻa ʻo ʻetau ngaahi fakataha faka-Kalisitiané, te tau fakapapauʻi ai ko kitautolu mo ʻetau fānaú ʻoku tau fakahā ʻa e fakaʻapaʻapa totonu ki he lotu kia Sihová ʻi he feituʻu ʻoku tau “fili ke tuʻu aí.”—Sāme 84:10, NW.