“Tūtuuʻi ʻa e Tenga ʻo e Puleʻangá” ʻi he Ngaahi Tufaʻanga Makasini Paú
1 Ko e hiva 133 ʻi he lea faka-Pilitāniá Sing Praises to Jehovah ʻoku fakakaveinga ko e “Tūtuuʻi ʻa e Tenga ʻo e Puleʻangá.” ʻOku makatuʻunga ia ʻi he talanoa fakatātā ʻa Sīsū ʻa ia ʻokú ne fakatatau ai ʻa e ngāue ngaohi-ākongá ki hono tūtuuʻi ʻo e tengá. (Mt. 13:4-8, 19-23) Ko e taʻanga ʻo e hivá ʻoku pehē: “Ko e lahi ʻo hoʻo tenga ʻoku tō ki he kelekele leleí/ʻE faʻa fakatuʻunga lahi pē ia ʻiate koe.” ʻE lava fēfē ke tau fakatupulekina ʻa e tuʻunga ola lelei ʻo ʻetau ngāue fakafaifekaú? Ko e founga ʻe taha ko hono fokotuʻu pea tauhi maʻu ha tufaʻanga makasini pau.
2 Ko e ngaahi taumuʻa ʻe niʻihi ʻe lava ke maʻu fakafou ʻi ha tufaʻanga makasini pau. (1) Ko e ʻaʻahi maʻu pē ʻi he uike ua kotoa pē ʻe lava ke ke langa hake ai ha vahaʻangatae anga-fakakaumeʻa mo e tokotaha mahuʻingaʻiá. (2) Te ke hanganaki tokonaki maʻu pē ki he tokotaha ko iá ha fakamatala fakahaofi moʻui ʻoku maʻu ʻi he Taua Leʻo mo e Awake! (3) Fakafou ʻi hoʻo ngaahi fetalanoaʻakí te ke tokoniʻi nai ai ʻa e tokotahá ke ne holi ki he moʻoni Fakatohitapú, ʻa ia ʻe lava ke taki atu ai ki ha ako Tohitapu.—1 Pita 2:2.
3 Founga ke Kamata Ai ha Tufaʻanga Makasini Pau: ʻI he fakahā pē ʻe ha taha ʻa e mahuʻingaʻia ʻi he ngaahi makasiní, fakamatalaʻi ʻa e ngaahi kupu tuʻu-ki-muʻa ʻoku hā ʻi he tatau kotoa, pē pea te ke loto-lelei ke ʻoatu kinautolu ʻi he uike ua kotoa pē. ʻI he hili hono tuku aí, tohiʻi ʻa e hingoa ʻo e tokotahá mo e tuʻasilá, ko e ʻaho ʻo e ʻaʻahí, ko e ʻaho ʻo e ngaahi tatau naʻe tukú, ko e kupu naʻe fakaeʻa aí, pea mo e ngaahi tuʻunga-lea naʻe mahuʻingaʻia tefito ai ʻa e tokotahá.
4 Te ke lava ke kamata ha tufaʻanga pau ki ha kakai tokosiʻi pē ʻe kau ki aí. Pea ngāue ke fakatupulekina hake ia ʻaki hono tānaki atu mo ha niʻihi kehe ʻa ia ʻokú ke tufa ki ai ʻa e ngaahi makasiní. ʻI he tupulaki hoʻo tufaʻanga paú, ʻe lava ke ke fokotuʻutuʻu maau fakaefeituʻu ia koeʻuhí ʻe faingofua ange ai hono ngāueʻí. Tauhi ha lēkooti lelei ʻo e ngaahi tatau naʻe tuku ʻi he ʻaʻahi taki taha pea mo e taimí. Tānaki atu ki ai ha ngaahi fakamatala fekauʻaki mo hoʻomo fetalanoaʻakí pea fekauʻaki mo e founga ke hokohoko atu ai ʻa hono fakatupulekina ʻa e mahuʻingaʻia ʻa e tokotahá ʻi he moʻoní ʻi he ʻaʻahi hono hokó.
5 Fakakau Atu ʻa e Feituʻu Pisinisí mo e Kakai Maʻu Lakangá: ʻOku hā mei he meʻa naʻe hokosiá ko e kau tauhi-koloá mo e kau maʻu lakanga kehe ʻoku ngalingali ʻoku nau tali ʻetau ngaahi makasiní ʻi ha tuʻunga tuʻumaʻu. Naʻa mo e tokotaha mātuʻa ʻe taha naʻá ne maʻu ha pule-kolo ʻi hono koló ko ʻene tufaʻanga makasini paú ia. Naʻe kamata ʻe ha tokotaha malanga ha ako mo ha tokotaha taʻu 80 ko ha pule ia ʻo ha kautaha tokonaki naunau-langa hili ia ʻene ʻave ʻa e ngaahi makasiní kiate ia ʻi he taʻu hokohoko ʻe hongofulu!
6 Ko ha tuofefine tāimuʻa naʻá ne hū atu ki ha falekoloa peá ne fetaulaki ai mo ha ongo meʻa mali ʻa ia naʻe ʻikai te na fuʻu talitali loto-māfana ia. Kae kehe, koeʻuhi ko ʻena tali ʻa e ngaahi makasiní, naʻá ne fakakaukau ai ke tānaki atu ki heʻene tufaʻanga makasini paú ʻa e ongo meʻa malí. ʻI he faai mai ʻa e taimí, naʻe fiemaʻu ai ʻe he tuofefiné ke taʻofi ʻene ʻaʻahi kiate kinauá koeʻuhí he naʻe ʻikai te na fuʻu anga-fakakaumeʻa pea ʻikai ke na loko lea ange, naʻa mo e taimi naʻá ne ʻeke ai ha fehuʻi fakatupunga fakakaukau. Ka naʻe lotu ʻa e tuofefiné fekauʻaki mo e meʻá pea faai atu pē ʻo tuku ʻa e tohi Moʻui Taʻengata ʻi he ongo meʻa malí. ʻI he hili hono lau iá, naʻe fakamatalaʻi ʻe he uaifí: “Faifai atu pē, naʻá ku maʻu ʻa e moʻoní!” Naʻe kamata ha ako Tohitapu, pea ki mui maí naʻe papitaiso ʻa e ongo meʻa malí. Ko hono moʻoní, ko e kītaki ʻa e tokotaha tāimuʻá naʻe maʻu ai ʻa e fua lelei.
7 Ko Hono Fai ʻa e Ngaahi Toe ʻAʻahí: ʻI he taimi ʻokú ke maʻu ai ha makasini foʻou, lau ʻa e kupu kotoa pē. Vakai ki ha ngaahi poini ʻa ia ʻe fakamānako ki he tokotaha taki taha ʻi hoʻo tufaʻanga paú. Pea ʻi hoʻo toe foki atú, te ke lava ʻo pehē: “ʻI heʻeku lau ʻa e kupu ko ʻení, naʻá ku fakakaukau mai kiate koe pea mo e founga ʻe mahuʻinga nai ai ia kiate koé.” ʻE lava ke fiefia ʻa e kau malanga ʻo e ngaahi taʻumotuʻa kotoa pē ke maʻu ha tufaʻanga makasini pau. Naʻa mo ha kiʻi tamasiʻi ʻe lava ke ne pehē: “Te u fiefia ke ta toe feʻiloaki. Kuo aʻu mai ʻa hoʻo ngaahi tatau fakamuimui ʻo e Taua Leʻo mo e Awake! ʻOku ou fakakaukau te ke saiʻia ʻi he kupu ʻoku fakakaveinga ko e . . . ”
8 Langaʻi ʻa e fakatuʻamelie atu ki he ngaahi kupu hoko maí ʻaki hono fakahanga ʻa e tokangá ki he puha ʻoku fakakaveinga “ʻI Heʻemau ʻĪsiu Hoko Maí.” ʻI he taimi ʻoku hā ai ha ngaahi kupu ʻoku fakakongokonga, ʻohake ia pea fakalototoʻaʻi ʻa e tokotaha lautohí ke ʻoua naʻá ne liʻaki ha konga pē ʻo ia. ʻOua naʻa ngalo ko e taimi taki taha te ke ʻave ai ʻa e ngaahi makasiní ki ha taha ʻoku ʻi hoʻo tufaʻanga makasini paú, ʻe lava nai ke lau ia ko ha toe ʻaʻahi. Pea hiliō aí, manatuʻi ko ʻetau taumuʻá ko e fakatupulekina ʻa e ngaahi ʻaʻahi ko iá ki ha ngaahi ako Tohitapu.
9 ʻAʻahi ki he Kakai ʻi Hoʻo Tufaʻanga Makasini Paú ʻi ha Tuʻunga Tuʻumaʻu: ʻE lava ke ke ngāueʻi ʻa hoʻo tufaʻanga makasini paú ʻi ha faʻahinga taimi pē ʻoku leleí—ʻi he pongipongi ʻo e ʻaho ʻo e uiké, ʻi he hoʻatā efiafí, ʻi he kei efiafí, ʻi he fakaʻosinga ʻo e uiké he hili ʻa e taimi ngāue fale-ki-he-falé. Kapau ʻoku ʻikai te ke malava ke ngāueʻi ʻa hoʻo tufaʻanga paú koeʻuhí ko e hoko ʻo puke pe mamaʻo ʻi ha mālōlō ʻeveʻeva, kole ha tokotaha malanga ʻe taha ʻi ho fāmilí pe ʻi he fakatahaʻangá ke ne ngāue maʻau ʻi hono ʻave ʻa e ngaahi makasiní. ʻI he founga ko iá, ko e faʻahinga ʻi hoʻo tufaʻanga paú ʻe ʻikai te nau tō mei hono maʻu taimi totonu ʻa e ngaahi makasiní.
10 Ko e founga ke tō ai ʻa e tenga ʻo e Puleʻangá ko hono ʻave maʻu pē ʻa e Taua Leʻo mo e Awake! kiate kinautolu kotoa pē ʻi hoʻo tufaʻanga makasini paú. ʻI hoʻo akoʻi kiate kinautolu ʻa e moʻoni Fakatohitapú, te nau maʻu ai ʻa e anga ʻo e lea ʻo e Puleʻangá pea ʻe faai atu pē ʻo nau fakatupulekina ha fua ʻo e Puleʻangá fakataha mo koe.—Mt. 13:8, 23.