Fakaleleiʻi ʻEtau Pōtoʻi ʻi he Ngāue Fakafaifekaú—Fokotuʻu ha Tufaʻanga Makasini Pau

ʻUhinga ʻOku Mahuʻinga Aí: ʻOku fiefia ʻa e kakai tokolahi ʻi hono lau ʻetau makasiní ka ʻoku ʻikai te nau saiʻia ke ako ʻa e Tohi Tapú mo kitautolu. Mahalo ʻoku nau fiemālie pē ʻi he lotu ʻoku nau ʻi aí pe ʻoku nau ongoʻi ʻoku ʻikai ha taimi ke nau ako ai. Kae kehe, ʻi heʻenau lau tuʻumaʻu ʻetau makasiní, ʻoku nau fakatupu nai ai ha holi ki he Folofola ʻa e ʻOtuá. (1 Pita 2:2) ʻE maongo nai ha kupu ki honau lotó pe ʻoku liliu nai honau ngaahi tuʻungá. Ko e ngaahi ʻaʻahi nounou kae tuʻumaʻú te ne ʻai ai kinautolu ke nau ongoʻi fiemālie ange pea tokoniʻi ai kitautolu ke tau ʻiloʻi ʻa e ngaahi meʻa ʻoku nau mahuʻingaʻia mo hohaʻa ki aí. ʻE faai atu pē ʻo kamata nai ha ako Tohi Tapu.

Founga Hono Fai Iá:

ʻI he māhina taki taha, vaheʻi ha taimi ke ʻave ki ai ʻa e ngaahi tatau fakamuimui taha ʻo e Ko e Taua Leʻo mo e Awake! Mahalo pē ʻe lava ke ke ʻaʻahi ʻi ha ngaahi taimi kehe ʻi he lolotonga ʻo e māhiná ke fakatupulekina ʻene holi ke lau ʻa e kupu ʻi he ngaahi makasini naʻá ke tuku mo iá pe ko hono tuʻuaki ʻa e tohi ʻoku tuʻuaki ʻi he māhina ko iá. Tauhi ha ngaahi lēkooti lelei.—Sio ki he Ko ʻEtau Ngāue Fakafaifekau ʻo Sanuali 2014 p. 3.
Teuteu lelei ki he ʻaʻahi taki taha. ʻI he ʻikai ko hono tuku pē ʻa e makasiní, fakakau ʻa e tokotaha-ʻapí ʻi he fetalanoaʻakí pea feinga ke langa hake ha vahaʻangatae lelei mo ia koeʻuhí ke ke lava ʻo fakatupulekina ai ʻene mahuʻingaʻiá.
Tokanga ki ha ngaahi faingamālie ke kamata ai ha ako. Kapau ʻoku ʻeke atu ʻe ha taha ʻi hoʻo tufaʻanga makasini paú ʻa e meʻa ʻoku leaʻaki ʻe he Tohi Tapú ʻo kau ki ha kaveinga tefito, ʻoange kiate ia ʻa e tohi ako ʻoku maʻu ai ʻa e talí pea lāulea fakataha mo ia. Ki muʻa ke ke mavahé, ʻohake ha fehuʻi ʻoku felāveʻi mo e kaveingá pea lāulea ki ai ʻi he ʻaʻahi hokó. Kapau ʻokú ke fai ha ngaahi fetalanoaʻaki tuʻumaʻu mo hokohoko lelei kae nounou ʻo ngāueʻaki ʻa e Tohi Tapú pe ko e taha ʻi heʻetau ʻū tohi akó, ʻokú ke fai ai ha ako Tohi Tapu. Kuó ke tuʻuaki ki he tokotaha-ʻapí ʻa e polosiua Ongoongo Lelei pea fai ha ako Tohi Tapu nounou? Kuó ke fakaʻaliʻali kiate ia ʻa e foʻi vitiō Ko e Hā ke Ako Ai ʻa e Tohi Tapú? mo e Ko e Hā ʻOku Fai ʻi ha Ako Tohi Tapu? Kapau kuo teʻeki ai ke ne tali ha ako ʻi he kuohilí, ʻoku liliu ʻa e ngaahi tuʻungá. ʻE lelei nai ke ke toe feinga?

ʻAhiʻahiʻi Eni ʻi he Lolotonga ʻa e Māhiná:

ʻAi ha lisi ʻo e faʻahinga ʻoku lava ke nau hoko ko ha tufaʻanga makasini pau. Tuʻuaki kiate kinautolu ʻa e makasini lolotongá pea tala ange te ke haʻu mo e makasini hokó.