Ngaahi Tufaʻanga Makasini Pau—ʻAonga ke Kamata ha Ngaahi Ako Tohi Tapu
1. Ko e hā ʻa e ʻuhinga naʻe fuoloa ai hono fakalototoʻaʻi ʻe he kautaha ʻa Sihová ʻa e kau malangá ke fokotuʻu ha tufaʻanga makasini pau?
1 ʻOku ʻikai hehema ʻa e kakai tokolahi ke ako ʻa e Tohi Tapú mo kitautolu, ka ʻoku nau saiʻia ʻi hono lau ʻetau makasiní. Ko ia ai, kuo fuoloa hono fakalototoʻaʻi ʻe he kautaha ʻa Sihová ʻa e kau malangá ke fokotuʻu ha tufaʻanga makasini pau. ʻI hono lau maʻu pē ʻe he kakaí ʻetau makasiní, ʻoku faʻa ueʻi ʻiate kinautolu ha holi ki he Folofola ʻa e ʻOtuá. (1 Pita 2:2) Faai atu pē, ko ha meʻa naʻa nau lau naʻe lava ke fakamānako ʻo ueʻi ai kinautolu ke tali ha ako Tohi Tapu.
2. ʻE anga-fēfē nai ʻetau fakatupulekina e mahuʻingaʻia ʻa e faʻahinga ko ia ʻi heʻetau tufaʻanga makasini paú?
2 ‘Fuʻifuʻi’ ʻa e Tenga ʻo e Moʻoní: ʻI he ʻikai tuku atu pē ʻa e makasiní, fakakau ʻa e tokotaha-ʻapí ʻi he fetalanoaʻakí pea feinga ke maheni mo ia. ʻE tokoniʻi heni koe ke ke ʻiloʻi hono ngaahi tuʻungá, mahuʻingaʻiá, mo e tuí ʻa ia ʻe malava ai ke ke lea fakataha mo e ʻiloʻilo. (Pal. 16:23) Mateuteu ki he toe ʻaʻahi taki taha. Kapau ʻe malava, fakamatalaʻi nounou ha poini pea lave ki ha konga Tohi Tapu mei he makasiní, ʻa ia ko hono fuʻifuʻi ia ha tenga pē ʻo e moʻoní ki hono lotó. (1 Kol. 3:6) Hiki ʻa e ʻaho ʻo e toe ʻaʻahi taki taha, ko e tohi naʻe tukú, pehē ki he kaveingá mo e ngaahi konga Tohi Tapu naʻe fai ai ʻa e fetalanoaʻakí.
3. ʻOku totonu ke tuʻo fiha ʻetau foki ʻo ʻaʻahi ki he faʻahinga ʻi heʻetau tufaʻanga makasini paú?
3 ʻE Tuʻo Fiha ʻa e Toe ʻAʻahí? ʻOku totonu ke ke toe ʻaʻahi tuʻo taha ʻi he māhina ke ʻave ʻa e makasini fakamuimui tahá ki he faʻahinga ʻi hoʻo tufaʻanga makasini paú. Kae kehe, ʻe makatuʻunga ʻi ho ngaahi tuʻungá mo e mahuʻingaʻia ʻa e tokotahá, te ke fili nai ke toutou ʻaʻahi ki ai. Ko e fakatātaá, ʻi ha uike ʻe taha pe ua hili hono tuku ʻa e makasiní, ʻoku lava ke ke toe foki ʻo tala ange, “ʻOku ou afe nounou mai heni ke fakahaaʻi atu ha meʻa mahuʻinga mei he makasini naʻá ku tuku atú.” ʻE ʻai heni ʻa e tokotahá ke ne fie lau ha kupu pau. Kapau kuó ne ʻosi lau ia, ʻe lava ke ke ʻeke kiate ia ʻa e anga ʻene fakakaukau fekauʻaki mo e kupú pea lāulea nounou ki ai. Pe kapau ʻoku saiʻia ʻa e tokotaha ko iá ʻi hono lau ʻetau ʻū tohí te ke toe foki nai ʻo fakaʻaliʻali kiate ia ha tuleki, polosiua, pe tohi ʻoku tau tuʻuaki ʻi he māhina ko iá.
4. ʻI he taimi ʻe niʻihi, ko e hā ʻe lava ke tau fai ke fakapapauʻi pe ʻoku loto-lelei nai ʻa e faʻahinga ʻi heʻetau tufaʻanga makasini paú ke ako ʻa e Tohi Tapú?
4 ʻOua ʻe tali ki he tokotaha-ʻapí ke ne toki kole atu ki ha ako. Tamuʻomuʻa koe. Neongo kapau naʻe fakafisi ke ako Tohi Tapu ʻi he kuohilí, ʻi he taimi ʻe niʻihi ʻe lava ke ke fakaʻaliʻali mei he Taua Leʻo ʻa e kupu “Tali ʻo e Ngaahi Fehuʻi Fakatohitapú” pea vakai pe ʻokú ne loto-lelei ke lāulea ki ai. Mahalo ʻe lava ke ke kamata ha ako ʻi he matapaá. Kae kehe kapau ʻoku ʻikai malava ke ke kamata ha ako, ʻe lava ke ke hokohoko atu hono ʻave kiate ia ʻa e makasiní ke fakatupulekina ʻene mahuʻingaʻiá.