ʻOku Ou Fiemaʻu ha Ako Tohitapu!
1 Kuo fakahāhaaʻi ʻe he tokolahi ʻo kitautolu ha holi ki ha ako Tohitapu, pea ki he ʻuhinga lelei. Ko e ngāue ako Tohitapú ʻoku tau fakahoko ai ʻetau taumuʻa ko hono ngaohi ha kau ākonga foʻou. (Mt. 28:19, 20) Pea neongo ia, ko e tokolahi ʻo kitautolú kuo faai atu ʻi he ngaahi māhina, mo e ngaahi taʻu nai, mo e ʻikai pē aʻusia ʻa e fiefia makehe ʻa ia ʻoku hoko mai mei hono akoʻi ki ha taha ʻa e moʻoní. Ko e hā ʻe lava ke tau fai fekauʻaki mo e meʻá ni he lolotonga ʻo Nōvemá? Koeʻuhi ko e tohi ʻIlo ʻoku tuʻuaki ʻi he māhina ní, ʻe lava ke tau fai ha feinga makehe ke ngāueʻaki ia ke kamata ha ngaahi ako Tohitapu foʻou.
2 Tuku Mavahe ha Fakaʻosinga ʻo e Uiké ʻe Taha pe Lahi Ange: ʻOku tau fakalototoʻaʻi ʻa e tokotaha kotoa pē ke tuku mavahe ha taimi ʻi he māhiná ni ke tokangataha ai ki hono kamata ha ako Tohitapu foʻou. ʻOku totonu ke filifili ʻe he kau faiako Ako Tohi ʻa e Fakatahaʻangá ʻa e (ngaahi) fakaʻosinga ʻo e uiké, ke ngāueʻaki fakahangatonu ki he taumuʻa ko ení, pea fokotuʻutuʻu leva ʻenau ngaahi kulupú ke fai ha feinga fakataha ʻi he ngāue toe ʻaʻahí.
3 Haʻu mo hoʻo ngaahi lēkooti toe ʻaʻahí ki he ngaahi fakataha ko eni ki he ngāué. Pea ʻaʻahi foki ki he faʻahinga kotoa ko ia kuo nau fakahāhā ʻa e mahuʻingaʻiá, ʻave ʻa e ngaahi tohí, pe haʻu ki he ngaahi fakatahá. Fai ʻa e ʻaʻahi taki taha fakataha mo e taumuʻa fakahangatonu ʻo hono kamata ha ako.
4 Fakahāhaaʻi ʻo ha Ako Tohitapu: ʻI he ngaahi fakataha kuo filifili ki he ngāué, ʻoku totonu ke fai ai ha fakahāhā kuo ʻosi teuteuʻi lelei, ʻo fakahā ai ʻa e anga ʻo hono kamata ha ako Tohitapu ʻi ha toe ʻaʻahi. Te ke pehē nai: “Tokolahi ʻa e kakai ʻoku ʻi ai ʻenau Tohitapu, ka ʻoku ʻikai te nau ʻiloʻi ʻoku ʻi ai ʻa e ngaahi tali ki he ngaahi fehuʻi mahuʻinga ʻoku tau fehangahangai kotoa mo ia ʻi he moʻuí. [Fakahaaʻi ʻa e tēpile ʻo e meʻa ʻi loto ʻi he tohi ʻIlo, pea lau ʻa e ʻuluʻi kaveinga ʻo e vahe 3, 5, 6, 8, mo e 9.] ʻI hono ngāueʻaki ʻo e tokoni fakaeako ko ení ʻi ha houa ʻe taha pe ofi ki ai ʻi ha uiké, ʻe lava ke ke maʻu ai ha mahino tefito ki he Tohitapú ʻi ha ngaahi māhina siʻi pē. Kapau te ke saiʻia ke filiʻi ha taha ʻo e ngaahi tuʻunga-lea ko ení, te u fiefia ke fakahaaʻi kiate koe ʻa e anga ʻo hono fai iá.” Kapau ʻoku toumoua ʻa e tokotahá ke ako koeʻuhi ko ʻene maʻu ha taimi-tēpile moʻumoʻua, fakamatalaʻi ange ʻoku toe ʻi ai foki mo haʻatau polokalama fakanounou. Fakaʻaliʻali ʻa e polosiua Fiemaʻu, pea tuʻuaki ange ke ako ha lēsoni nounou ʻe taha ʻi he uike, ʻi ha miniti ʻe 15-30.
5 Kapau te tau fai kotoa ha feinga fāʻūtaha ke kamata ha ngaahi ako, pea kapau ʻoku tau lotu ki he tāpuaki ʻa Sihová ʻi heʻetau feingá, te tau maʻu moʻoni ai ha ngaahi ako foʻou! (1 Sione 5:14, 15) Kapau ʻokú ke fiemaʻu ha ako Tohitapu, ko ho faingamālie nai eni ke kamata ai ha taha.