Takimuʻa ʻa e Kau ʻOvasiá—Ko e ʻOvasia ʻo e Akoʻanga Fakafaifekau Fakateokalatí
1 Ko e ʻovasia ʻo e Akoʻanga Fakafaifekau Fakateokalatí ko ha tangata matuʻotuʻa ange fakalaumālie ia, ʻa ia ʻoku ngāue mālohi ʻi he leá mo e faiakó pea ʻoku taau mo ʻetau fakaʻapaʻapaʻí mo e ngāue fakatahá. (1 Tim. 5:17) Ko e hā ʻa hono ngaahi fatongiá?
2 Ko e laipeli ʻa e Akoʻanga Fakafaifekau Fakateokalatí ʻi he Fale Fakatahaʻangá ʻokú ne tokangaʻi. ʻOkú ne mahuʻingaʻia loto-vēkeveke ʻi hono fakalototoʻaʻi ʻa e faʻahinga kotoa ʻoku taau ke kau ʻi he akó. ʻOkú ne fakapapauʻi ke tauhi ha lēkooti totonu koeʻuhi ke fai ʻa e ngaahi kongá ʻi ha founga maau ʻo ʻikai siʻi hifo he uike ʻe tolu ki muʻa ʻi he konga ako taki taha. ʻOku fiemaʻu ke ne ʻiloʻi lelei ʻa e fakatahaʻangá, ʻo ʻi heʻene fakakaukaú ʻa e tokotaha ako taki taha mo ʻene ngaahi malavá. Neongo ʻokú ne maʻu nai ha tokoua ʻe taha ʻoku tokoni kiate ia ʻi hono teuteuʻi ʻa e taimi-tēpile ʻo e akó, ko hono vaheʻi ʻo e ngaahi kongá ʻoku feʻunga pē ia ki he ʻovasiá ke ne tokangaʻi fakafoʻituitui.
3 Koeʻuhi ke akoʻi ola lelei ʻa e akoʻangá, kuo pau ke teuteu tōtōivi ʻa e ʻovasiá ʻi he uike taki taha, ʻo fai hano ako fakaʻāuliliki ʻo e fakamatala kuo vaheʻí. ʻOku ʻai ʻe he meʻá ni ke ne malava ai ʻo tauhi ʻa e loto-māfana ʻi he fakatahaʻangá fekauʻaki mo e ngaahi lēsoni ʻo e akó, ke fakapapauʻi pe ʻoku ʻosiki totonu ʻa e fakamatala kuo vaheʻí, pea ke fakaeʻa ʻa e ngaahi poini mahuʻinga ʻe fakakau ʻi he ngaahi fakamanatu tohinimá.
4 ʻI he muimui ki he malanga ʻa e tokotaha ako taki taha, ʻe fakaongoongoleleiʻi ʻe he ʻovasiá ʻa e tokotaha akó pea fakamatalaʻi ʻa e ʻuhinga naʻe lelei ai ha anga papau ʻo e leá pe ʻuhinga ʻoku fiemaʻu ai ke fakaleleiʻí. ʻI he taimi ʻoku fiemaʻu ai ki ha taha ke toe fakalahi atu ʻa hono akoʻi ia ke teuteu ʻa ʻene ngaahi konga ʻoku vaheʻi ki he akó, ko e ʻovasiá pe ko ha taha kuó ne vaheʻi ʻe lava ke ne fai ha tokoni fakafoʻituitui.
5 Koeʻuhi ke maʻu ʻa e ʻaonga kakato mei he ngāue mālohi ʻa e ʻovasia ʻo e Akoʻanga Fakafaifekau Fakateokalatí mo ha kau faiako ʻoku toe tānaki atu ki ai ʻa ia ʻoku nau ngāue ʻi he malumalu ʻo ʻene tatakí, ʻoku totonu ke tau maʻu maʻu pē ʻa e akó. ʻOku toe totonu foki ke tau fakahoko ʻetau ngaahi konga kotoa pē pea ngāueʻaki ʻa e akonaki ko ia ʻoku tau maʻú, pehē foki ki he akonaki ko ia ʻoku fai ki he kau ako kehé. ʻI he foungá ni, te tau fakalakalaka ai ʻi hono fakaleleiʻi ʻetau malava ke tuʻuaki fakahāhā ʻa e pōpoaki ʻo e Puleʻangá pea mei he fale ki he fale.—Ng. 20:20; 1 Tim. 4:13, 15.