Founga ʻOku ʻAonga Ai ʻa e Ako Fakafaifekau Fakateokalatí kia Kitautolú
1 Ko e kakai ʻa Sihová ʻoku nau maʻu ʻa e monū makehe ʻo hono maʻu ʻa e ako fakateokalatí. (Ai. 54:13; Sione 6:45) Kae kehe, ko e lahi ʻo ʻetau maʻu ʻaonga mei aí, ʻoku makatuʻunga lahi pē ia ʻi he feinga ʻoku tau faí. ʻOku lava ke ke ʻiloʻi ʻa e ola lelei ʻoku ʻomai ʻe he Ako Fakafaifekau Fakateokalatí ki hoʻo tuʻunga fakalaumālié?
2 Ngaahi Fakamatala Lelei: ʻOku tokolahi ʻa e kau ʻovasia ako kuo nau fakatokangaʻi ko hono ako fakamākukanga ko ia ʻa e ngaahi tuʻunga ʻo e leá kuo ʻai ai ke fakalakalaka ʻa e ola lelei ʻo e ngāue fakamalanga ʻa ʻenau ngaahi fakatahaʻangá. Tānaki atu ki ai, ko e ʻovasia ako ʻe taha kuó ne fakatokangaʻi ʻa e ola ko ia ʻo e fokotuʻutuʻu ke kau mai ʻa e kau fanongó ʻi he ngaahi meʻa mahuʻinga mei he lau Tohi Tapú, ʻoku tokolahi ange ai ʻa e faʻahinga ʻoku nau tauhi maʻu ki he taimi-tēpile ʻo e lau Tohi Tapú. Fekauʻaki mo e Konga Fika 2, ʻoku tokolahi ʻa e fanga tokoua kuo nau fai ʻa e ngaahi fakamatala lelei ki he ngaahi ʻaonga ʻo e tokangataha ki he fakamatalá ʻo ʻikai fai ha teuteu ʻo ha talateu pe ha fakaʻosi. Ko e faʻahinga ko ia ʻoku vaheʻi ki ai ʻa e kongá ni ʻoku tāfataha lahi ange ʻenau tokangá ki hono ʻai ke fakalakalaka ʻenau pōtoʻi lautohí.—1 Tim. 4:13.
3 ʻE Lava ke Maʻu ʻAonga Kotoa: Ko e tali ʻi he ngaahi fakatahá ʻe lava ke hoko ʻo fakafiefia. (Pal. 15:23) Ko hono maʻu tōmuʻa ko ia ʻo e ngaahi fehuʻi fakamanatú ʻoku ʻai ai kitautolu ke tau malava ʻo teuteu pea kau ki he fakamanatú. Tānaki atu ki ai, kamata ʻi he ʻīsiu ʻo e Taua Leʻo ki Sanuali 1, 2004, kuo hā ʻa e ngaahi meʻa mahuʻinga mei he ʻū tohi ʻo e Tohi Tapú ʻa ia ʻoku fehoanakimālie mo ʻetau lautohi ʻoku vaheʻi mai ʻi he Ako Fakafaifekau Fakateokalatí. Ko e ngaahi kupu ko ení kuo tokoniʻi ai ʻa e tokolahi ke nau fai ʻa e ngaahi fakamatala fakatupu langa hake lolotonga ʻa e konga ʻo e ngaahi meʻa mahuʻinga mei he lau Tohi Tapú.
4 ʻOku maʻu ʻe he tokotaha kotoa ʻoku kau ki he akó ʻa e monū makehe ke teuteuʻi pea mo fakahoko ʻa e ngaahi kongá. Ko e kotoa ʻo kitautolu ʻe lava ke tau maʻu ʻaonga mei he ngaahi fakaongoongolelei ʻoku fai ʻe he ʻovasia akó mei he peletifōmú. Ko e kau akó tāutaha ʻoku nau maʻu ʻaonga lahi ange mei he ngaahi poini ʻo e akonakí te na lāulea fakaekinaua pē nai ki ai ʻi he hili ʻa e fakatahá. Ko e ngaahi meʻa ke fai fekauʻaki mo e ngaahi tuʻunga ʻo e leá ʻi he ngataʻanga ʻo e vahe kotoa pē ʻi he tohi Maʻu ʻAonga mei he Ako Fakafaifekau Fakateokalatí ʻoku toe tānaki mai ai ʻa e tokoni.
5 ʻI hono ʻomi ki hoʻo tokangá ha ngaahi fakakaukau ʻaonga mo Fakatohitapu ʻi he lolotonga mo e hili ʻa e akó, hikiʻi ha nouti ʻo e ngaahi meʻá ni ʻi hoʻo tatau ʻo e tohi Ako Fakafaifekau. Fakalaulauloto ki he meʻa kuó ke akó, pea fakakaukau ki he founga ʻoku tokoniʻi ai koe ʻe he tafaʻaki ko eni ʻo e ako fakaʻotuá ke ke fakalakalaka ʻi ho tuʻunga fakalaumālié.