Ko Hono Maʻu ʻa e ʻAonga Kakato mei he Ako Fakafaifekau Fakateokalatí
1 Kuo tokoni ʻa e Ako Fakafaifekau Fakateokalatí ke akoʻi kitautolu ke tau hoko ʻo “pōtoʻi ʻi hono akoʻi,” koeʻuhi ke ola lelei ʻa e founga ʻoku tau ngāueʻaki ke fakahā atu ʻa e ngaahi moʻoni mei he Tohi Tapú ki he faʻahinga kehé. (2 Tīm. 4:2, NW) ʻOku tau maʻu ʻa e ʻiloʻilo ʻoku mātuʻaki mahuʻinga ki he ngaahi tuʻunga lea kehekehe mei he Tohi Tapú ʻi he uike taki taha. ʻE lava fēfē ke tau fakapapauʻi ʻoku tau maʻu ʻa e ʻaonga kakato taha mei he fakahinohino mātuʻaki mahuʻinga ʻoku tokonaki mai ʻe he ako ko ʻení?
2 Fanongo tokanga ki he ngaahi fakamatala ʻoku kamata ʻaki ʻe he ʻovasia ʻo e akó ʻi heʻene fakaeʻa ʻa e ngaahi meʻa fakatupu tokanga ʻe niʻihi te ke lava ke ako ki ai ʻi he lolotonga ʻa e fakatahá. Fakakaukau ki he ngaahi fehuʻi te ne langaʻi hake naí pea mo e founga te ke ngāueʻaki ai ʻa e ngaahi talí ʻi hoʻo kau ki he ngāue fakamalangá.
3 Ko e malanga fika ʻuluakí ʻoku ʻikai ko e toe vakai pē ki he fakamatala kuo pulusí. ʻOkú ne fakahanga ʻa e tokangá ki he ʻaonga ʻo e fakamatalá pea mo e founga ʻe hoko ai ʻo ʻaonga kiate koe tonú. Ko e teuteu ki muʻá ʻe tokoni ia kiate koe ke ke fakahangataha lelei ange hoʻo tokangá ki he ngaahi meʻa tefitó pea ke kau ki he fakamanatu ʻoku fai ʻi he ngataʻanga ʻo e kongá ni.
4 Ko hono fai tuʻumaʻu ʻa e lau Tohi Tapu fakauiké te ne ʻai ke loloto ange ai hoʻo houngaʻia ki he Folofola ʻa e ʻOtuá. Ko hono toe fai ha fekumi lahi angé ʻe maʻu ai ʻa e ngaahi meʻa foʻoú mo fakatupu tokanga lahí ʻa ia ʻe ʻai ai ke lelei ange hoʻo mahino ʻo kau ki he moʻoní. ʻOku kau ʻa e meʻa lahi ange ki he ngaahi meʻa mahuʻinga mei he Tohi Tapú ʻo ʻikai ko e toe vakai pē ki he fakamatala ʻi he Tohi Tapú. ʻI he hili hono fai ha toe vakai fakalūkufua mo nounou ki ai, ʻe fakaeʻa ʻe he toko taha malangá ʻa e ngaahi meʻa tefito ʻoku tuʻu-ki-muʻa ʻi he konga kuo vaheʻí pea mo fakahā hono kaunga ki heʻetau moʻuí mo e lotú. ʻAi ke fanongo tokanga koeʻuhi ke ke ako ʻa e founga ke ngāueleleiʻaki ange ai ʻa e fakahinohino mei he Tohi Tapú.—Sāme 119:105.
5 Kapau ʻe vaheʻi kiate koe ha malanga, fakatokangaʻi ʻa e poini ʻokú ke lolotonga ngāue ki aí. Lau ʻa e ngaahi fokotuʻu ʻoku hā ʻi he School Guidebook fekauʻaki mo e anga ko ia ki he leá, pea feinga ke ngāueʻaki ʻa e ngaahi fokotuʻu ko iá. ʻI hoʻo filifili ha fakamatala ke fakakau ki hoʻo malangá, feinga ke fakamamafaʻi ʻa e ngaahi meʻa ʻe lava ke ngāueʻaki ʻi he ngāue fakamalangá.—sg p. 96-99.
6 Kapau ko ha tuofefine koe kuo vaheʻi ke ke fai ʻa e Malanga Fika 3 pe Malanga Fika 4, feinga ke fakahā atu hoʻo fakamatalá ʻaki ha fokotuʻutuʻu ʻo hangē ko ia ʻoku faʻa hoko ʻi he ngāue fakamalangá. Ko ho hoa ki he lesoní te ne loto nai ki he meʻa kotoa pē te ke leaʻakí pe ʻikai; feinga ke fakahā ʻa e founga te ke tokoni ai ki he toko tahá ke ʻai ke fakatupu ʻene fakakaukaú ʻo maʻu ʻa e mahino ʻo kau ki he ngaahi tefitoʻi moʻoni ʻo e Tohi Tapú. (sg p. 153-158) ʻOku tokoni ʻeni ki he kau fanongó ke nau sio ki he founga ʻe lava ke nau lavaʻi ai ʻa e loto-kehe meimei tatau ʻa ia ʻoku nau fehangahangai mo ia ʻi he ngāue fakamalangá. Teuteu lelei ki muʻa pea ke toki fai ʻa e malangá, pea ʻai ke tomuʻa ʻahiʻahi hoʻo malangá mo e toko taha kuo vaheʻi ke hoa mo koé. ʻOku ʻikai totonu ke toe fie maʻu ke ʻahiʻahi ʻa e malangá ʻi he hili ʻa e kamata ʻa e fakatahá.
7 ʻOku fakalototoʻaʻi ʻa e faʻahinga kuo vaheʻi ke nau fai ha malangá ke nau tangutu ʻi muʻa ʻi he holó. ʻI hono fai ʻa e meʻa ko ʻení ʻe ʻikai ke fakamoleki ai ʻa e taimi lahi pea ʻoku tokoni ia ki he ʻovasia ʻo e akó ke ne fai ʻene akonakí. ʻOku maʻu ʻe he faʻahinga kotoa pē ha ʻaonga mei he ngaahi fokotuʻu mavahe mo anga-ʻofa ʻokú ne fai ʻo makatuʻunga ʻi he School Guidebook. ʻE ʻikai te ne muimui nai ki he ngaahi anga ʻo e hokohoko ʻo e leá ʻa ia ʻoku hā ʻi he laʻi pepa ko e Akonakiʻi he Leá; te ne filifili ha meʻa ke akonakiʻi koe ʻo fakatuʻunga ki he meʻa ʻoku lolotonga fie maʻu kiate koé koeʻuhi ke fai ʻa e laka ki muʻa lelei tahá.
8 Ko e ngaahi ʻuhinga lelei ʻeni ke tau teuteu ai pea mo maʻu ʻa e Ako Fakafaifekau Fakateokalatí ʻi he uike kotoa pē. ʻE tokoniʻi kitautolu ʻe he fakahinohino ʻoku tau maʻú ke tau hoko ʻo poto mo pōtoʻi ange ʻi heʻetau kau ki he ngāue fakamalangá.—Pal. 1:5.