Vēkeveke Malangaʻi ʻa e Ongoongo Leleí
1 “ʻOku ou holi ke feʻiloaki mo kimoutolu . . . ʻI heʻene pehe, ko e anga [“vēkeveke,” NW] leva ʻo hoku loto oʻoku ke malangaʻaki ʻa e Kosipeli kiate kimoutolu foki.” Ko e anga ʻeni ʻo e fakahaaʻi ʻe he ʻapositolo ko Paulá ʻa ia tonu ʻi he kamataʻanga ʻo ʻene tohi ki he ngaahi tokoua ʻi Lomá. Ko e hā naʻe vēkeveke ai ʻa Paula ke ʻaʻahi kiate kinautolú? Naʻá ne pehē: “Ko ʻeku feinga ke ai haku fua ʻiate kimoutolu foki . . . He talaʻehai ʻoku ou māʻi ʻa e Kosipeli: he ko e ivi ia ʻo e ʻOtua ʻoku ngaue ki he fakamoʻui.”—Loma 1:11-16.
2 Naʻe tapua atu ʻe Paula ʻa e vēkeveke tatau ko ʻení ʻi heʻene lea ki he kau tangata taʻumotuʻa ʻo ʻEfesoó. Naʻá ne fakamanatu kiate kinautolu: “Talu mei he ʻuluaki ʻaho o ʻeku hoko ki Esia . . . ; naʻe ʻikai te u taetae ha meʻa . . . mo ʻeku akoʻaki kiate kimoutolu ʻi he ʻao ʻo e kakai, pea ʻi he fale taki taha; ʻo u talatalatonu ki he Siu mo e Kalisi fakatouʻosi.” (Ng. 20:18-21) ʻI he kotoa ʻo hono feituʻu ngāue kuo vaheʻi angé, naʻe nōfoʻi ʻa Paula ki hono fakamafola atu ʻa e ongoongo lelei ʻo e fakamoʻuí mo hono maʻu ʻa e fua ʻo e Puleʻangá. Ko ha laumālie lelei ē ke faʻifaʻitaki ki ai!
3 Te tau ʻeke nai kiate kitautolu: ‘ʻOku ou fakahā ʻa e vēkeveke tatau ko iá ʻi hono talaki atu ʻa e ongoongo leleí ʻi hoku koló? ʻI he ʻikai ke vakai ki he ngāue fakamalangá ko ha fatongia peé, ʻoku ou vēkeveke ke vahevahe atu ʻa e ongoongo leleí ki he kakai tokolahi taha ʻe malavá? ʻOku ou fakakaukau faʻa lotu ki hoku ngaahi tuʻunga fakafoʻituituí? Kuó u fakatotoloʻi ʻa e ngaahi malava kotoa pē ʻoku ʻi homau feituʻú, hangē ko e malanga mei he matapā ki he matapaá, ʻi he halá, ʻi he ngaahi feituʻu pisinisí, ʻaki ʻa e telefoní, mo e founga ʻikai anga-mahení?’
4 Kau Vēkeveke he Lolotonga ʻo ʻEpelelí: Ko e māhina ko ʻEpelelí ko ha taimi lelei ia ke fakalahiʻi ai ʻetau kau fakafoʻituitui ki he ngāue fakamalangá. Ko e fakasiʻisiʻi ʻo e houa ʻoku fiemaʻú ʻoku totonu ke ne ʻai ke malava ʻa e tokolahi ange ke tāimuʻa tokoni. Mahalo pē ko ho ngaahi tuʻungá te ne fakaʻatā koe ke ngāue ko ha tāimuʻa tokoni he lolotonga ʻo ʻEpeleli mo Meé. Pea te ke malava nai ke hoko ko ha tāimuʻa tuʻumaʻu, ʻi he vakai atu ki he liliu ʻo e houa ʻoku fiemaʻú. Kapau ko ha tokotaha malanga koe ʻo e fakatahaʻangá, ʻe lava ke ke fakamoleki ha taimi lahi ange ʻi he taimi anga-mahení ʻi he malangá ʻi he māhiná ni mo e hoko maí, ʻo tokoni ki he faʻahinga ʻoku nau malava ke tāimuʻá? ʻE ʻai ʻe he meʻa ko iá ʻa e loto ʻo Sihová ke fiefia!
5 Hangē ko Paulá, ʻoku totonu ki he kau malanga ʻo e Puleʻangá ke nau hokohoko atu hono fakahāhā ha vēkeveke ʻaki ʻa e kakapa atu ki he ngāue fakamalangá. Ko hono fai ʻa e kotoa te tau malava ʻi he ngāue fakafaifekaú te ne ʻomai kiate kitautolu ʻa e fiefia moʻoni. Naʻe maʻu ʻe Paula ʻa e fiefia ko ʻení ʻi heʻene ngāue toputapú. ʻOku totonu ke tau faʻifaʻitaki ki heʻene faʻifaʻitakiʻanga leleí.—Loma 11:13; 1 Kol. 4:16.