ʻOku Akoʻi Kitautolu ʻe Sihova
1 ʻI he malumalu ʻo e tataki fakaʻotuá ʻoku fakalele ai he taimí ni ha polokalama ako fakavahaʻapuleʻanga ʻi he ngaahi fonua ʻe 233. ʻOku ʻikai ha meʻa ʻe ʻomai ʻe he māmani ko ʻení ʻe lava ke fakahoatatau mo ia. Ko hotau Tokotaha-Fakatupu Maʻongoʻongá, ʻa Sihova, ʻokú ne akoʻi kitautolu ki he founga ke tau maʻu ai ʻa e ʻaonga he taimí ni ʻi heʻene akoʻi kitautolu ki he moʻui taʻengatá.—Ai. 30:20; 48:17.
2 Ngaahi Akoʻanga ʻo e Ako Fakaʻotuá: Fakakaukau ange ki he ngaahi akoʻanga ʻoku fai he taimí ni maʻá e kakai ʻa Sihová. Ko e Ako Fakafaifekau Fakateokalatí, ʻoku fai fakauike ia ʻi he ngaahi fakatahaʻanga ʻe 87,000 nai, ʻoku akoʻi ai ʻa e kau malanga ʻo e Puleʻangá ʻe laui miliona ke nau hoko ko e kau faifekau ola lelei ʻo e ongoongo leleí. Kuó ke kau ki ai? ʻOkú ke ʻi he lotolotonga ʻo e laui afe naʻa nau kau ki he Ako Ngāue Tāimuʻa uike ʻe uá? Mahalo ko e fakasiʻisiʻi ʻo e houa ʻoku fiemaʻu ki he kau tāimuʻa tuʻumaʻú ʻe malava ai ki he tokolahi ange ke tāimuʻa pea taau ke kau ki he ako ko ʻení. Ko e Akoʻanga Ako Fakafaifekau māhina ʻe uá, ʻoku fai ia he taimí ni ʻi he ngaahi lea tefito ʻi he māmaní takatakai, ʻoku teuʻi ai ʻa e kau mātuʻa mo e kau sevāniti fakafaifekau teʻeki malí ke nau fua ʻa e ngaahi fatongia fakateokalati lahi ange. ʻI he taimi ki he taimi, ʻoku maʻu ai ʻe he kotoa ʻo e kau mātuʻá mo e kau sevāniti fakafaifekaú ʻa e fakahinohino tefito ʻi he Akoʻanga Fakafaifekau ʻo e Puleʻangá.
3 Ko e ngaahi fale ʻi he Senitā Fakaeako ʻo e Taua Leʻó ʻi Patterson, New York, ʻoku ngāueʻaki ia ke fai ai ʻa e ako makehe ʻe tolu, ʻa ia ʻoku tokonaki mai ai ʻa e ako fakateokalati fakalakalaka. Ko e ako māhina ʻe nima ʻa e Akoʻanga Tohitapu Taua Leʻo ʻo Kiliatí ʻoku teuteuʻi ai ʻa e kau faifekau ki he ngāue fakamisinale ʻi he ngaahi malaʻe mulí. Ko e ngaahi mēmipa ʻo e Kōmiti Vaʻá mei he māmaní takatakai naʻa nau kau ki ha ako māhina ʻe ua ki hono fokotuʻutuʻu maau ʻo e vaʻá. ʻI Mē 1999 ko ha ako māhina ʻe ua foʻou ki he kau ʻovasia fefonongaʻakí ʻoku kamataʻaki ia ha kalasi ʻo e kau ako ʻe toko 48 mei he ʻIunaite Seteté mo Kānata. Ko e kotoa ʻo e kau sevāniti ʻa Sihová ʻoku nau maʻu ʻo lahi ai ʻa e ngaahi ʻaonga lelei mei he ako ʻoku tokonaki mai ʻe Sihová ʻo fakafou ʻi he ngaahi akoʻanga kehekehe ko ʻení.
4 Ako ki he Taumuʻa ko e Hā? Naʻe pehē ʻe ha mēmipa ʻo e Kulupu Pulé: “Ko ʻetau polokalama fakaeako he lolotonga ní ʻoku faʻufaʻu ia ke ne ʻomai ʻa e kotoa ʻo e kakai ʻa Sihová ʻi he feituʻu kotoa pē ki he tuʻunga lelei ʻo e matuʻotuʻa ʻoku fakamatalaʻi ʻi he Palovepi 1:1-4.” ʻOfa ke hokohoko atu ʻe Sihova hono ʻomai ki he tokotaha taki taha ʻo kitautolu ʻa e “ʻelelo ʻo e tama ako.”—Ai. 50:4.