Puha Fehuʻi

◼ Ko e hā ʻa e ngaahi tohi ʻoku totonu ke tau ako mo e faʻahinga foʻoú ki muʻa ke nau papitaisó?

Ki muʻa ke malava ha tokotaha ke fakatapui ʻene moʻuí kia Sihova pea hoko ʻo papitaisó, kuo pau ke ne maʻu ʻa e ʻilo totonú. (Sione 17:3) Te ne maʻu ʻa e fakamatala ʻokú ne fiemaʻú ʻaki hono ako fakatouʻosi ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? pea mo e tohi ʻIlo ʻA Ia ʻOku Taki Atu ki he Moʻui Taʻengatá. ʻI he ngaahi tuʻunga lahi tahá ʻe tomuʻa ako ʻa e polosiua Fiemaʻu. Kae kehe, kapau naʻe kamata ʻa e akó ia ʻi he tohi ʻIlo, ʻoku totonu ke ako ʻa e polosiua Fiemaʻu ʻi he hili ʻa e ʻosi ʻa e tohí. Ko e hā hono ʻuhinga ʻoku fiemaʻu ai ʻení?

ʻOku tokonaki mai ʻe he polosiua Fiemaʻu ha fakanounou ʻo e ngaahi akonaki tefito ʻa e Tohitapú. Kapau ʻoku tomuʻa ako ia, ʻe ʻoange ai ki he tokotaha akó ha mahino tefito ki he ngaahi fiemaʻu ki hono fakahōifuaʻi ʻa Sihová. Kapau ʻoku fakamuimui, ʻe hoko ia ko ha fakamanatu lelei ʻo e meʻa naʻe ʻosiki ʻi he tohi ʻIlo. ʻI ha tuʻunga pē, fakaʻaiʻai ʻa e tokotaha akó ke ne sio ki he ngaahi konga Tohitapu ʻoku poupou ki aí pea ke fakalaulauloto kiate kinautolu. Fakapapauʻi ke fakaeʻa ʻa e ngaahi fakatātaá, he ko e ngaahi tokoni fakafaiako ola lelei ʻaupito kinautolu.​—Sio ki he Watchtower ʻo Sanuali 15, 1997, peesi 16-17.

ʻI hono fakakakato ʻe ha tokotaha ako Tohitapu ha ako ʻo e ongo tohí fakatouʻosi, te ne malava nai ke tali ʻa e ngaahi fehuʻi kotoa ʻe fakamanatu ʻe he kau mātuʻá mo ia ʻi he teuteu ki he papitaisó. Kapau ko ia, ʻe ʻikai nai toe fiemaʻu ke fai ha ako anga-maheni mo ia ʻi ha toe tohi kehe, neongo ia ʻoku totonu ke hokohoko atu ʻa e mahuʻingaʻia ʻa e tokotaha faiakó ʻi heʻene laka ki muʻá.​—Sio ki he Taua Leʻo ʻo Fepueli 1, 1996, peesi 14, 17.