Tokoniʻi ʻa e Faʻahinga ʻIkai ke Taukeí ke Nau Maʻu ʻa e Mahinó

¹ ʻI he ngāue ngaohi-ākongá, ʻoku tau akoʻi ai ʻa e niʻihi kehé ki he meʻa ʻoku fiemaʻu ʻe he ʻOtuá meiate kinautolú. (Mt. 28:​19, 20) Ko ha feinga lahi ʻaupito ke fai iá ʻoku fakahoko ia ʻi māmani lahi ʻe he Kau Fakamoʻoni ʻoku laka hake ʻi he nima milioná. Ko e lavameʻá ʻoku ʻikai ke fakatuʻunga ia ʻi he lahi ʻo e ngaahi houa ʻoku fakamoleki aí, ko e ngaahi tohi ʻoku tukú, pe ko e ngaahi ako Tohitapu kuo kamatá. ʻOku tau lavaʻi ʻetau taumuʻá ʻi he taimi ʻoku maʻu ai ʻe he kakaí ʻa e mahinó pea ngāueʻi ʻa e meʻa ʻoku nau akó.

² Ko hono tokoniʻi fakalaumālie ʻa e niʻihi kehé ʻoku kau ki ai “ʻa hono ʻai ke maʻu ʻa e mahinó ʻe he faʻahinga ʻikai ke taukeí.” (Sāme 119:​130, NW) Kuo aʻu ki he lotó pea kuo ueʻi ai ʻa e kakaí ʻi he taimi pē ʻoku nau “ʻilo” ai iá. (Mt. 15:10) ʻI he fakalahi atu pea mo tupu ʻetau ngāué, ʻoku tau hoko ai ʻo houngaʻia lahi ange ʻi he fiemaʻu ke tau lea pea faiako ʻi he founga faingofua. Ko e ʻuhinga ia kuo pulusi ai ʻe he Sōsaietí ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻOku ʻi ai ʻa e ako fakalūkufua ʻa ia ʻokú ne kāpui ʻa e ngaahi akonaki tefito ʻa e Tohitapú. ʻOku nounou ʻa e ngaahi lēsoní, ʻoku faingofua ʻa e leá, pea ko e fakahinohinó ʻoku faingofua ke makupusi, ʻo manakoa ai hono tufa atu ʻo e polosiuá.

³ ʻE tuʻuaki ʻa e polosiua ko ʻení fakataha mo e ngaahi makasiní ʻi he lolotonga ʻo e māhina ko ʻEpeleli mo Meé. ʻOku fokotuʻu atu ko e taimi ko ia ʻokú ke palani ai ki hoʻo ngāue fakamalanga fakauiké, te ke fokotuʻutuʻu ai ke tuʻuaki ʻa e ngaahi makasiní ʻi he Tokonakí kae tuʻuaki ʻa e polosiuá ʻi hoʻo ngāue fakafaifekaú he lolotonga ʻo e toenga ʻo e uiké. ʻAve ʻa e polosiuá ki he kakai naʻa nau talitali lelei ʻa e ngaahi tohí ʻi he kuohilí. Manatuʻi ʻe lava ke tautefito ʻene ʻaongá ʻi hono akoʻi ʻa e fānaú, ko e kakai ʻoku nau lea ʻi he lea mulí, pea mo e faʻahinga ʻoku fakangatangata pē ʻenau pōtoʻi lautohí.

⁴ Ngāueʻaki ha Fakalea Faingofua: ʻI hono tuʻuaki ʻa e polosiua Fiemaʻu, lave ki he peesi 2, ʻa ia ʻoku fakamatalaʻi ai “ʻoku faʻufaʻu ʻa e polosiuá ni ki ha ako ʻo e Tohitapú.” Tuhu ki he palakalafi 3 ʻi he peesi 3 ke fakahaaʻi ʻa e ʻuhinga ʻoku fiemaʻu ai ki ha tokotaha ke ako ʻa e Tohitapú. Langaʻi ʻene mahuʻingaʻiá ʻaki ha niʻihi ʻo e ngaahi kaveinga ʻo e lēsoní ʻokú ne fakahaaʻi ha ngaahi moʻoni faka-Tohitapu faingofua. Fakahāhaaʻi ʻa e founga ʻoku ʻai ai ʻe he polosiua ko ʻení ʻa e akó ke fakafiefiá, pea talaange te ke fai ha tokoni fakafoʻituitui kiate ia.

⁵ Fai ha Ako Fakalakalaka: Ko ʻetau taumuʻá ke ʻoua ʻe ngata pē ʻi hono fai pē ha ngaahi akó​—ʻoku tau fiemaʻu ke tau ngaohi ha kau ākonga te nau hoko ko e kau poupou mālohi ki he lotu moʻoní. ʻOku lava ke ako ʻa e polosiuá ʻi ha ngaahi uike pea ʻoku totonu ke taki atu ia ki ha ako ʻo e tohi ko e ʻIlo. (Sio ki he fakamatala ʻi lalo he peesi 31.) Kamata pē mei he kamataʻangá, tokoniʻi ʻa e tokotaha akó ke ne ʻilo ʻa e kautaha ʻa Sihová. (Sio ki he tohi Reasoning, peesi 283-284.) Fakamamafaʻi ʻa e mahuʻinga ʻo e ngaahi fakataha ʻa e fakatahaʻangá, pea fakamatalaʻi ange ko hono maʻu kinautolú, ʻokú ne ʻomai ai ha mahino fakalūkufua ki he founga ʻo hono fai ʻa e lotu moʻoní.​—Hep. 10:​24, 25.

⁶ Ko ha kau kakato ki he ngāue makehe ko ʻení ʻi he lolotonga ʻo ʻEpeleli mo Meé ʻoku fakapapauʻi te ne ʻomai kiate kitautolu ʻa e fiefia ʻoku maʻu mei hono tokoniʻi ʻa e faʻahinga loto-moʻoní ke nau “maʻu ʻa e mahinó” ʻa ia ʻoku taki atu ki he moʻuí.​—Pal. 4:5, NW.