Ako Fakaʻatamaí mo Hoʻo Ngaahi Taumuʻa Fakalaumālié
1 Ko hono maʻu ha ako tefito lelei ʻi he taimi ʻokú ke kei siʻi aí ʻe lava ke tokonaki mai ai ha ngaahi pōtoʻi fakaeako ʻa ia ʻoku fiemaʻu kiate koe ke ke lautohi pea tohi lelei ai, pea ke maʻu ha mahino fakalūkufua ki he siokālafí, hisitōliá, fiká, mo e saienisí. ʻI he lolotonga iá, ʻoku lava ai ke ke ako ki he founga ke fakakaukau lelei, sivisiviʻi ha ngaahi moʻoniʻi meʻa, solova ha ngaahi palopalema, pea fakatupu ha ngaahi fakakaukau ola lelei. ʻE ʻaonga kiate koe ʻa e ako peheé ʻi he kotoa ʻo hoʻo moʻuí. ʻOku anga-fēfē ʻa e kaunga hoʻo ako fakaʻatamaí ki hoʻo ngaahi taumuʻa fakalaumālie ʻi he moʻuí pea mo hono tokoniʻi koe ke ke maʻu ha “poto ʻaonga mo e malava fakaefakakaukaú”?—Pal. 3:21, 22, NW.
2 Hoko ʻo ʻAonga ʻi he Ngāue ʻa e ʻOtuá: ʻI he lolotonga ʻo hoʻo ʻi he ʻapiakó, tokanga ʻi he kalasí pea fai lelei hoʻo homueká. Kapau te ke lavaʻi ʻa e ʻulungaangaʻaki ʻa e lautohi leleí mo e akó, ʻe faingofua ange ai hoʻo malava ke sivisiviʻi ʻa e Folofola ʻa e ʻOtuá pea tauhi koe ke mālohi fakalaumālie. (Ng. 17:11) Ko e ʻilo fakalūkufuá te ne tokoniʻi koe ke ke lea ki he kakai ʻo e ngaahi ʻātakai, ngaahi mahuʻingaʻia, mo e ngaahi tui kehekehe ʻi hoʻo fetaulaki mo kinautolu ʻi he ngāue fakafaifekaú. Ko e ako ʻokú ke maʻu ʻi he ʻapiakó ʻe ʻaonga ia ʻi hono fakahoko ho ngaahi fatongia faka-Kalisitiane ʻi he kautaha ʻa e ʻOtuá.—Fakafehoanaki mo 2 Timote 2:21; 4:11.
3 Ako ke Poupouʻi Pē Koe: Kapau te ke tokanga, te ke toe lava ʻo ako ʻa e ngaahi pōtoʻi ʻoku fiemaʻu ke ke maʻu ai ha moʻui hili ʻa e akó. (Fakafehoanaki mo 1 Timote 5:8.) Filifili fakalelei hoʻo ngaahi lēsoní. ʻI he ʻikai ke hangataha ki ha malaʻe ʻoku fakangatangata ai ʻa e ngaahi faingamālie ki ha ngāué, fakakaukau ke ako ha ngāue pe ko ha pōtoʻi ʻe malava ke ke maʻu ai ha ngāue feʻungamālie ʻi ha feituʻu pē. (Pal. 22:29) Ko e ako peheé te ke malava ai ke poupouʻi koe kapau te ke fili ke ngāue ʻi ha feituʻu ʻoku lahi ange ai ʻa e fiemaʻú.—Fakafehoanaki mo Ngāue 18:1-4.
4 Ko hono maʻu ha ako tefito lelei lolotonga ʻa hoʻo ʻi he ʻapiakó ʻe malava ai ke ne tokoniʻi koe ke fakalahi atu hoʻo ngāue fakafaifekaú. Ngāue mālohi ke ke maʻu ʻa e pōtoʻi ʻoku fiemaʻu ke poupouʻiʻaki koé he lolotonga hoʻo laka ki muʻa ʻi he ngāue ʻa Sihová. Ko ia, ko hoʻo akó ʻe hoko ia ʻo tokoni kiate koe ke ke aʻu ki hoʻo ngaahi taumuʻa fakalaumālié.