“Ke Nau Nimahomo ʻo Mateuteu ke Vahevahe Atu”
1 ʻI he ngaahi senituli ki muʻa atú, naʻe fakahinohinoʻi ai ʻe he ʻapositolo ko Paulá ʻa Tīmote ke fakalototoʻaʻi ʻa e kaungātuí “ke nau ngāue ʻaonga, ke nau koloaʻia ʻi he ngāue lelei, ke nau nimahomo ʻo [“mateuteu ke vahevahe atu,” NW].” (1 Tim. 6:18) Naʻe toe fakamanatu ʻe Paula ki he kau Kalisitiane Hepeluú ke ʻoua ʻe ngalo ʻa e “fai lelei, moe foaki.” (Hep. 13:16, PM) Ko e hā naʻá ne hiki ai ʻa e ngaahi fakahinohino ko ʻení? Koeʻuhí he naʻá ne ʻiloʻi ʻe ʻi ai ʻa e “langilangiʻia mo e fakamalo mo e tuʻumalie mo ʻonautolu taki taha ʻoku ngaue lelei.”—Loma 2:10.
2 Koeʻuhi ko hono tuʻunga ko e Tokotaha-Fakatupú, ko Sihova ko e ʻOtuá ʻa e Tokotaha ʻoku ʻaʻana ʻa e ngaahi meʻa kotoa pē. (Fkh. 4:11) ʻOku tau houngaʻia moʻoni ʻi he meʻa ʻokú ne fai maʻatautolu ʻaki ʻene ngaahi koloá. Neongo ʻa e fakakaukau taʻehoungaʻia ʻa e tokolahi ʻo e faʻahinga ʻo e tangatá, ʻoku hokohoko atu ʻa e Fungani Māʻolungá ke fakaʻatā ʻa e faʻahinga kotoa pē ke nau maʻu ʻa e ʻaonga mei heʻene ngaahi tokonaki nima-homo ki hono fakatolonga ʻo e moʻuí. (Mt. 5:45) Naʻe aʻu ʻo ne foaki hono ʻAlo ʻofaʻanga lahi tahá ko ha feilaulau koeʻuhí ke tau lava ai ʻo maʻu ʻa e moʻui taʻengatá. ʻIkai ʻoku totonu ke hanga ʻe he ʻofa ko ia kuo fakahā mai kiate kitautolú ʻo ueʻi kitautolu ke tau fakamoʻoniʻi ʻetau fakamāloó ʻaki ʻa e hoko ʻo nima-homo ki he kaungā faʻahinga ʻo e tangatá?—2 Kol. 5:14, 15.
3 Ko e Hā ʻe Lava Ke Tau Vahevahe Atú? ʻOku feʻungamālie ke tau ngāueʻaki ko e hā pē ʻa e ngaahi koloa ʻoku tau maʻú ʻi ha founga ko ia ʻoku fakahōifua ʻi he ʻafio mai ʻa e ʻOtuá. ʻOku pau, ʻoku tau loto ke poupouʻi ʻa e ngāue ʻo e Puleʻangá ʻi māmani lahí ʻi ha founga fakamatelie mo fakalaumālie. Ko e moʻoni, ko e ongoongo leleí ʻa e koloa mahuʻinga taha ʻoku lava ke maʻu ʻe ha tokotaha, koeʻuhí he ko e “malohi ia oe Otua ki he fakamoui.” (Loma 1:16, PM) ʻI hono ngāueʻaki nima-homo hotau taimí mo e ngaahi koloá ʻi he māhina kotoa pē ke kau ʻi he ngāue fakamalangá mo e faiakó, te tau malava nai ai ke vahevahe atu ʻa e koloa fakalaumālie ko ʻení ki he niʻihi kehé, ʻo taki atu ai ki heʻenau maʻu ʻa e moʻui taʻengatá.
4 ʻOku mātuʻaki hōifua mai ʻa Sihova ʻi he taimi ʻoku tau tokoniʻi ai ʻa e faʻahinga ʻoku nau masivá. ʻOkú ne talaʻofa mai ʻa e ngaahi tāpuaki, pea ʻokú ne toe fakamanatu mai kiate kitautolu: “ʻOku ʻikai ʻaonga ʻa e koloa ʻi he ʻaho ʻo e houhau: ka ko e faitotonu ʻoku ne fakahaofi kita mei he mate.” (Pal. 11:4; 19:17) Ko hono poupouʻi fakamatelie ʻa e ngāue ʻo e Puleʻangá pea mo e kau kakato ki hono malangaʻi ʻo e ongoongo leleí ʻa e ongo founga fakaofo ʻoku lava ai ke tau fakahāhā ʻoku tau nima-homo moʻoni, ʻo mateuteu ke vahevahe atu.