“Koloaʻia ʻi he Ngāue Lelei”
1 Lolotonga ʻa e ngaahi taʻu fakaʻosi ʻo ʻene ngāue fakafaifekau faivelengá, naʻe ngāue vāofi ai ʻa e ʻapositolo ko Paulá mo Tīmote pea mo Taitusi. Naʻá ne tohi kiate kinaua taki taha ha ngaahi lea fakalototoʻa tatau. Naʻá ne tala kia Taitusi ko “kinautolu kuo tui ki he ʻOtua” ʻoku totonu “ke nau tokanga ke nofo ki he ngaahi ngaue lelei.” (Tai. 3:8) Naʻá ne tala kia Tīmote ko e faʻahinga ʻoku tuku ʻenau ʻamanakí ʻi he ʻOtuá ʻoku totonu “ke nau koloaʻia ʻi he ngāue lelei.” (1 Tim. 6:17, 18) Ko e akonaki lelei ʻaupito ʻeni kiate kitautolu kotoa! Ka ko e hā te ne ueʻi kitautolu ke tau fakahoko ha ngaahi ngāue lelei ʻi heʻetau moʻuí? Pea ko e hā ha ngāue pau te tau fakahoko nai ʻi he ngaahi ʻaho ʻi he kahaʻú?
2 Ko e fakaueʻiloto ki he hoko ʻo koloaʻia ʻi he ngaahi ngāue totonú ʻoku tupu ia mei heʻetau tui mo e ʻofa kia Sihová pea mei he ʻamanaki fakaofo kuó ne ʻomai kiate kitautolú. (1 Tim. 6:19; Tai. 2:11) Tautautefito ʻi he lolotonga ʻo e taimi ko ʻeni ʻo e taʻú, ʻoku fakamanatu mai ai kiate kitautolu naʻe fekau mai ʻe Sihova ʻa hono ʻAló ki he māmaní koeʻuhi ke lava ʻe Sīsū ʻo fakatonuhiaʻi ʻa ʻene Tamaí pea tokonaki mai ʻa e hala ki he moʻuí maʻá e faʻahinga taau kotoa ʻo e tangatá. (Mt. 20:28; Sione 3:16) ʻE mātuʻaki fakamahinoʻi ʻeni ʻi he kātoanga Fakamanatu ʻo e pekia ʻa Kalaisí ʻi Maʻasi 28. ʻI he tali ki he ʻamanaki ʻoku tau maʻu ki hono aʻusia ʻa e moʻui taʻengatá, ʻikai ʻoku ueʻi kitautolu ke fai ʻa e meʻa kotoa te tau malavá ke “koloaʻia ʻi he ngāue lelei”? Ko e moʻoni ʻoku tau pehē! Ko e hā ʻa e ngaahi ngāue te tau fakahoko nai he taimi ní?
3 Ngaahi Ngāue Lelei ke Fai ʻi Maʻasi ʻo Faai Atu Ai: Ko hono moʻoní, te tau maʻu ʻa e Fakamanatú—ʻa e meʻa mahuʻinga taha ʻo e taʻú ki he Kau Fakamoʻoni ʻa Sihova ʻi māmani lahí. (Luke 22:19) Ka ʻoku tau fiemaʻu ke vahevahe ʻa e fiefia ʻi he kātoanga ko iá mo e tokolahi taha ʻe malavá. Vakai ki he līpooti ngāué ʻi he Yearbook 2002, pea te ke sio ai ʻi he taʻu kuo ʻosí ʻi he ngaahi fonua lahi takatakai ʻi he māmaní, naʻe liunga tolu, fā, nima, pe lahi ange ai ʻa e kau maʻu Fakamanatú ʻi he tokolahi ʻo e kau malangá. Ko e moʻoni ʻoku fiemaʻu ʻa e feinga tōtōivi ʻi he tafaʻaki ʻa e tokotaha kotoa ʻi he ngaahi fakatahaʻangá ke fai hano tufaki lahi ʻa e ngaahi tohi fakaafe ki he Fakamanatú ʻi honau feituʻu ngāué kotoa. Ko ia ai, ʻoku tau fiemaʻu ke fakamoleki ʻa e taimi lahi ange te tau malavá ʻi he vahaʻa atu ko ʻení ki Maʻasi 28 ʻi hono fakaafeʻi ʻa e kakaí ki he Fakamanatú, tokoniʻi kinautolu ke nau ako fekauʻaki mo e ʻamanaki ʻo e fakamoʻuí.
4 ʻI he aʻu ki ʻEpelelí, te tau kamata nai ai ke maʻu ha ngaahi ʻaho loloa ange pea mo ha ʻea lelei ange. ʻE lava fēfē ke tau ngāueleleiʻaki ʻa e ngaahi taimi lelei ko ʻení ʻi he “koloaʻia ʻi he ngāue lelei”? ʻAki ʻa e hokohoko atu ʻi he kau loto-māfana ki he ngāue ko hono malangaʻi ʻa e ongoongo leleí, ʻo “fai velega ae gaahi gaue lelei.” (Tai. 2:14, PM; Mt. 24:14) Kapau naʻe ʻikai lava ke ke tāimuʻa tokoni ʻi Maʻasi, ʻe lava ke ke fai pehē ʻi ʻEpeleli mo/pe Mē? Kapau ʻokú ke ngāue tāimuʻa ʻi Maʻasi, ʻe lava ke ke hokohoko atu?
5 ʻOku ʻilo ʻe he niʻihi ʻoku ngāue fakamāmaní ʻe lava ke nau fakamoleki ha houa ʻe taha pe ua ʻi he faifakamoʻoni ʻi he ʻalu ki he ngāué, ʻi he faifakamoʻoni he halá pe ʻi he ʻaʻahi ki he kakai ʻoku ngāue ʻi he ngaahi pisinisi ʻoku ava pongipongiá. ʻOku fakataimitēpileʻi ʻe he niʻihi ha konga ʻo ʻenau houa kai hoʻataá ke faifakamoʻoni ai. Kuo ʻilo ʻe he niʻihi ʻoku malava ke fai ha ako Tohitapu he lolotonga ʻo e vahaʻa taimi ko iá mo ha kaungāngāue. Ko e fanga tuofāfine tokolahi ʻa ia ko e kau tauhi-ʻapí, kuo malava ke nau vaheʻi ha taimi ki he malaʻe fakafaifekaú he lolotonga ʻa e ʻi he akó ʻa ʻenau fānaú. ʻI he tuʻu pongipongia hake ʻi he ngaahi ʻaho ʻe niʻihi ke fai ai ʻenau ngaahi ngāue fakaʻapí, ʻoku nau maʻu ai ha taimi lahi ange he lolotonga ʻo e ʻahó ki he ngāue fakamalangá mo fakafaiakó.—Ef. 5:15, 16.
6 Naʻa mo e taimi ʻoku ʻikai malava ai ke ke tāimuʻa tokoní, mahalo pē ʻe lava ke ke fokotuʻutuʻu ha taimi-tēpile fakafoʻituitui ke ke kau lahi ange ai ʻi he ngāue fakafaifekaú, ʻo fai ʻa e meʻa kotoa te ke malavá “ke ngāue ʻaonga, ke koloaʻia ʻi he ngāue lelei, ke nimahomo ʻo angafietokoni [“vahevahe atu,” NW]” ʻa e moʻoní ki he niʻihi kehé.—1 Tim. 6:18.
7 Manatuʻi ʻa e Ngāue Lelei ko e Ngaohi-Ākongá: ʻI he taʻu taki taha ʻoku ʻi ai ʻa e faʻahinga mahuʻingaʻia ʻoku nau haʻu ki he Fakamanatú. ʻE lava ʻe ha niʻihi ʻi he fakatahaʻangá ke fai ha tokanga ki he faʻahinga ʻoku nau haʻu ka ʻoku ʻikai ke nau ako he taimi ní? ʻE lava ke fai ha ngaahi toe ʻaʻahi kiate kinautolu fakataha mo ha vakai atu ke tokoniʻi kinautolu ke nau fai ha laka ki muʻa fakalaumālie? Mahalo pē nai ko e niʻihi ʻo e kau maʻu Fakamanatu ko ʻení ko e ngaahi kāinga ʻo e Kau Fakamoʻoní. Ko e niʻihi ko ha faʻahinga tāutaha nai naʻa nau ako ʻi he kuohilí pea ʻoku nau fiemaʻu ha fakalototoʻa ke toe ako ai mo maʻu ʻa e ngaahi fakatahá ʻi ha tuʻunga tuʻumaʻu. Ko ha fiefia ē ʻe hoko kiate kitautolu ʻi he sio kia kinautolu ʻoku nau hoko ko e kau sevāniti longomoʻui ʻa Sihova fakataha mo kitautolú!
8 ʻI he kau lahi ange ki he ngāue fakafaifekaú he lolotonga ʻo Maʻasí ʻo faai atu ai, ʻoku mātuʻaki ngalingali te tau maʻu ai ha kakai mahuʻingaʻia tokolahi ange ke tau toe foki ki ai. Feinga ke tuku kiate kinautolu ha fehuʻi. Pea palōmesi ange te ke tala ange ʻa e talí ʻi he ʻaʻahi hono hokó. ʻI heʻetau fai ʻení, ʻe teuteuʻi ai ha founga faingofua ki ha toe ʻaʻahi. Ko e vave ange ʻo e lava ke tau fai ʻa e toe ʻaʻahí, ko e lelei angé ia. Kapau ʻoku ʻikai lava ke tau kamata ha ako ʻi he ʻuluaki ʻaʻahí, ʻoku fiemaʻu ke tau feinga ke kamata ha ako ʻi he ʻaʻahi hoko maí pē ʻo kapau ʻe malava.
9 ʻI he taimi ʻoku tau kau ai ʻi he faifakamoʻoni he halá, ʻoku totonu ke tau tokanga fekauʻaki mo e feinga ke kamata ha ngaahi fetalanoaʻaki mo e kakaí. Kuo ʻoange ki he kau malanga tokolahi ha ngaahi hingoa, ngaahi tuʻasila mo e ngaahi fika telefoni ʻe he kakai mahuʻingaʻia kuo nau fetaulaki mo ia he lolotonga hono fai ʻa e ngāue he halá. Kapau ko e tokotaha kuo fai ʻa e fetaulaki mo iá ʻoku ʻikai ke nofo ʻi ho feituʻu ngāué, ʻomai ha foomu Please Follow Up (S-43) mei he Fale Fakatahaʻangá, ʻo fakafonu pea ʻoange ia ki he sekelitali ʻo e fakatahaʻangá, ʻa ia te ne ʻave ia ki he fakatahaʻanga ʻi he feituʻu ngāue ʻoku nofo ai ʻa e tokotahá. Kapau ʻoku ʻikai lava ke fai ia ʻe he sekelitalí, te ne ʻave ia ki he ʻōfisi vaʻá ke nau fai ʻa e ngāué. ʻI he founga ko ʻení, ʻe lava ke fakatupulekina ai ʻa e mahuʻingaʻiá.
10 Kapau ko ha fika telefoni ʻoku maʻú kae ʻikai ko ha tuʻasila, fai leva ha toe ʻaʻahi ʻaki ʻa e telefoni ki he tokotahá. Teuteu ki muʻa ʻa e meʻa ʻokú ke saiʻia ke lāulea ki aí. ʻAi ke ala maʻu ʻa e tohi Reasoning ki ha lave vave ki ai. ʻOku maʻu ʻe ha niʻihi ha lavameʻa lelei ʻi he ako mo ha faʻahinga tāutaha ʻi he telefoní, kau ai ʻa e faʻahinga naʻe faingataʻa ke maʻu atu kinautolu ki honau ʻapí. Naʻe kamata ʻeke ʻe ha tuofefine ha ngaahi fika telefoni mei ha kau fefine mahuʻingaʻia ʻa ia naʻá ne fetaulaki mo kinautolu ʻi he ngāue matapā-ki-he-matapaá, pea ko hono olá naʻe malava ai ke ne kamata ha ako Tohitapu ʻe ua.
11 Ngāue Fakataha mo e Kau Mātuʻá ʻi Hono Tokoniʻi ʻa e Faʻahinga ʻIkai Longomoʻuí: ʻOku mahuʻingaʻia ʻaupito ʻa e kau mātuʻá ʻi hono fai ha tokanga anga-ʻofa ki he faʻahingá ni. Ko e tokolahi ʻo e faʻahinga peheé, kuo nau kamata ʻia kinautolu pē ke toe maʻu ʻa e ngaahi fakataha ʻa e fakatahaʻangá. ʻOku nau ʻiloʻi ʻa e fiemaʻu ke kumi ke feohi vāofi mo e kautaha ʻa Sihová koeʻuhi ke maʻu ai ʻa e maluʻanga fakalaumālie naʻe fakamatalaʻi ʻi he Sāme 91. Ko e niʻihi ʻo e faʻahingá ni ʻoku nau mateuteu he taimí ni ke toe kau ki he malaʻe ngāué. Kapau ʻoku maʻu ʻe ha niʻihi kehe ʻoku ʻikai longomoʻui ʻa e Fakamanatu he māhina ní, te nau talitali lelei nai ke fai ha ako Tohitapu fakafoʻituitui mo kinautolu. Kapau ʻe pehē ʻa e tuʻungá, ʻe fokotuʻutuʻu ʻe he kau mātuʻá ha taha ke ako mo e faʻahinga ko ia ʻoku nau fiemaʻu ha tokoní. Kapau ʻoku fakaafeʻi koe ke ke tokoni ʻi he founga ko ʻení, ʻe fakahoungaʻi lahi ʻa hoʻo poupouʻi ʻa e ngāué ni.—Loma 15:1, 2.
12 Hanganaki “Tokaga ke Fai ae Gaahi Gaue Lelei”: Ko e tokolahi kuo nau kau ʻi he ngāue tāimuʻa tokoní ʻi ha māhina ʻe taha pe lahi ange kuo nau ʻilo ko ʻenau ngāue fakamalangá kuo tupulaki ʻi he ngaahi māhina hoko maí. Naʻa nau fetaulaki mo ha kakai mahuʻingaʻia ʻa ia naʻa nau ongoʻi ʻa e fiemaʻu ke toe ʻaʻahi ki ai. Naʻe ueʻi ai heni kinautolu ke nau fai ha feinga makehe ke ʻalu ʻi he malaʻe ngāué ʻo toe lahi ange koeʻuhi ke toe feʻiloaki ai mo e faʻahinga mahuʻingaʻiá. Naʻe kamata ʻe he niʻihi ha ngaahi ako, pea naʻe tokoniʻi ai kinautolu ke nau toe kau lahi ange ki he ngāue fakafaifekaú.
13 ʻOku kei maʻu ʻe he niʻihi ʻa e fiefia lahi ʻi hono fai ʻa e meʻa lahi ange ʻi he ngāue fakamalangá mo e ngaohi-ākongá ʻo ueʻi ai kinautolu ke sivisiviʻi ʻenau ngaahi meʻa ʻoku muʻomuʻá. Ko hono olá, ʻoku malava ai ʻe ha niʻihi ke fakasiʻisiʻi ʻa e ngāue fakamāmaní kae hoko ko e kau tāimuʻa tokoni hokohoko. Kuo malava ai ʻa e niʻihi ke hū ki he ngāue tāimuʻa tuʻumaʻú. Naʻe malava ai ke tuku ʻenau ʻamanakí ke toe kakato ange ki he ʻOtuá kae ʻikai ki he ngaahi meʻa ʻoku tuʻuaki mai ʻe he māmaní. ʻOku nau ʻilo ko e hoko ʻo “nimahomo ʻo vahevahe atú,” kuo ʻomai ai ʻa e ngaahi tāpuaki lahi meia Sihova pea ʻai ai ke mālohi ʻenau ʻamanaki ko hono maʻu ʻa e “moʻui moʻoni.” (1 Tim. 6:18, 19) Ko e moʻoni, ʻi he kau ʻa e tokolahi ange ki he ngāue tāimuʻá, ʻoku maʻu ʻaonga ai ʻa e fakatahaʻangá fakakātoa. ʻOku hehema ʻa e kau tāimuʻá ke talanoa fekauʻaki mo e ngaahi meʻa ʻoku nau hokosiá pea fakaafeʻi ʻa e niʻihi kehé ke kau fakataha mo kinautolu ʻi he ngāue fakafaifekaú, pea ʻoku fakatupu heni ha ʻatimosifia fakalaumālie lelei lahi ʻi he fakatahaʻangá.
14 ʻOfa ke tau hoko kotoa ʻo “koloaʻia ʻi he ngāue lelei” he lolotonga ʻo e faʻahitaʻu Fakamanatu ko ʻení ʻo faai atu ai ʻaki hono fakalahi ʻetau kau ki he ngāue fakafaifekau faka-Kalisitiané. ʻAi ke tau fakahaaʻi ʻetau houngaʻia ki he meʻa kuo fai ʻe Sihová ʻi hono ʻomai kiate kitautolu ʻa e ʻamanaki ʻo e moʻui taʻengata ʻi ha māmani foʻou māʻoniʻoní.—2 Pita 3:13.