“Ngāue ki he Meʻa ʻOku Lelei ki he Kakai Kotoa Pē”
1 “Malanga Kakato ʻAki ʻa e Folofola ʻa e ʻOtuá” pea “Koloaʻia ʻi he Ngāue Lelei” ko e ongo kaveinga ia naʻe ngāueʻaki ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Fepueli mo Maʻasi 2002. (Kol. 1:25; 1 Tim. 6:18) ʻI he ongo ʻīsiu ko iá naʻe fakalototoʻaʻi ai kitautolu ke tau fai ha feinga makehe ke tokoniʻi ʻa e faʻahinga mahuʻingaʻiá ke nau maʻu ʻa e Fakamanatú, ke tokoniʻi ʻa e faʻahinga ʻikai longomoʻuí ke nau toe feohi mo e fakatahaʻangá, pea ke tokoniʻi ʻetau fānaú mo e kau ako Tohitapu tāú ke nau kamata ʻa hono malangaʻi ʻo e ongoongo leleí. ʻOku ʻikai ha veiveiua ʻoku tau maʻu nai ha lavameʻa ʻa ia ko e ola ia ʻo ʻetau feinga tōtōiví. ʻI he taimi ní, “lolotonga ʻoku tau maʻu ʻa e taimi lelei ki aí, tau [hokohoko atu ke] ngāue ki he meʻa ʻoku lelei ki he kakai kotoa pē.”—Kal. 6:10, NW.
2 Fakaafeʻi Kinautolu Ke Nau Toe Haʻu: ʻI he feituʻu vaʻa ʻo Nuʻu Silá, laka hake ʻi he kakai ʻe toko 12,000 ʻoku ʻikai ko e malanga ʻo e ongoongo leleí ʻoku nau maʻu ʻa e Fakamanatú ʻi he taʻu taki taha. Koeʻuhi ʻoku fakahaaʻi ʻe heʻenau ʻi aí ha tuʻunga mahuʻingaʻia, ko e hā kuo pau ke tau fai ke ueʻi ai ʻa e faʻahinga ʻoku nau “hehema totonu ki he moʻui taʻengatá” ke nau hoko ko e “kau tui”? (Ng. 13:48, NW) Fakaʻaiʻai kinautolu ke nau toe foki ki he ngaahi fakataha ʻa e fakatahaʻangá ʻi he vave taha ʻe ala lavá.
3 Fēfē ke fakaafeʻi ha tokotaha mahuʻingaʻia ke ne maʻu ʻa e Ako Tohi ʻa e Fakatahaʻangá ke maʻu ai ha fakamatala mahuʻinga fekauʻaki mo e kikite ʻa ʻAiseá? Kapau ko ha kāinga koe pe ko ha maheni ʻo e tokotahá pea kuó ke fakataimi-tēpileʻi ke fai ha malanga ʻi he Ako Fakafaifekau Fakateokalati ka hoko maí, te ke fakaafeʻi nai ʻa e tokotaha ko iá ke haʻu ʻo fanongo ki hoʻo malangá. Toutou fakahā ange kiate ia ʻa e ngaahi kaveinga ʻo e ngaahi malanga maʻá e kakaí ʻa ē ʻe fai ʻi he ngaahi uike ka hoko maí. (ʻOku totonu ke fakapipiki ʻi he papa fakahinohinó ha taimi-tēpile totonu.) Vakaiʻi ha faʻahinga faingamālie ke fakaʻaaki ʻaki ʻa e holi ʻa ha tokotaha ke lotu kia Sihova. Pea ko ia ai, kapau ʻoku teʻeki ai ke ne ako ʻa e Tohitapú mo ha taha ʻi he fakatahaʻangá, ʻe lava ke ke tuʻuaki anga-ʻofa ange kiate ia ha ako.
4 Hanganaki Fakalototoʻaʻi ʻa e ʻIkai ke Longomoʻuí: Ko e tokolahi ʻo e faʻahinga ʻoku nau maʻu ʻa e Fakamanatú kuo nau ʻosi fai ha fakatapui kia Sihova. Kae kehe, ʻi ha tuʻunga naʻa nau taʻofi ai ʻenau malangaʻi longomoʻui ʻa e ongoongo leleí. Ka, naʻe enginaki mai ʻa Paula kia kitautolu ke “ngāue ki he meʻa ʻoku leleí . . . tautefito ki he faʻahinga ko ia ʻoku felāveʻi mo kitautolu ʻi he tuí.” (Kal. 6:10, NW) Ko ia ai, ʻoku totonu ke fai ha tokanga tefito ki he faʻahinga ʻoku ʻikai ke longomoʻuí.
5 Mahalo kuo ʻosi tali ʻe ha niʻihi ʻa e fakalototoʻa mei he kau mātuʻá pea mo ha niʻihi kehe ke toe kau atu ki he ngāue fakafaifekaú. Kapau ʻoku vaheʻi koe ʻe he kau mātuʻá ke ke ngāue mo ha tokotaha malanga naʻe toe fakalongomoʻuiʻi, ʻiloʻi ko hoʻo ʻofa tonu kia Sihová pea ki he malaʻe fakafaifekaú ʻe langa hake ai ha loto-maʻu ʻi he tokotaha ko iá. Fakahaaʻi kiate ia ʻa e founga ʻokú ke kau ai ki he ngaahi tafaʻaki kehekehe ʻo e ngāue fakafaifekaú koeʻuhí ke ne lava ai ʻo maʻu ha fiefia mei ai, ʻo kītaki ʻi he ngāue fakamalangá, pea maʻu nai ai ʻa e ngaahi tāpuaki ʻa Sihová.
6 Tuku ki he Kau Malanga Foʻoú ha Kamata Lelei: ʻI he taimi naʻe ʻiloʻi ai ʻe ha fefine mahuʻingaʻia foʻou kuó ne maʻu ʻa e kautaha moʻoni ʻa e ʻOtuá, naʻá ne loto ke kamata leva ʻi he ngāue fakamalangá. Hili ʻa hono ako ʻa e meʻa naʻe fiemaʻu kiate iá, naʻá ne pehē: “Te u fai leva ia.” Kapau ʻoku tali he taimí ni ha taha ʻokú ke ako Tohitapu mo ia ke kamata kau ki he malaʻe ngāué, tokoniʻi ia ke ne sio ki he fiemaʻu ke “fai leva iá,” pea ko ia ai, tuku ki he tokotaha malanga foʻoú ha kamata lelei. Tokoniʻi ia ke fakatupulekina ha founga-tuʻumaʻu ʻo e teuteu pea kau maʻu pē ki he malaʻe fakafaifekaú ʻi he uike taki taha.
7 Kapau ko hoʻo kiʻi tama pē ʻaʻau kuo hoko ko ha tokotaha malanga teʻeki papitaisó, ngāue fakataha mo ia ke ne fai ha laka ki muʻa ʻo fakatatau ki hono taʻumotuʻá mo ʻene malavá. ʻI ha kiʻi tokoni siʻisiʻi meiate koe, te ke ʻohovale nai ʻi he founga ʻokú ne lava ai ke fakakau ha taha ʻi he fetalanoaʻakí, lau mei he Tohitapú, pea tuʻuaki ha tohi. ʻI he taimi ʻokú ne maʻu ai ha tokotaha fiefanongo ʻi he malaʻe ngāué, akoʻi ia ke ne fai ha toe ʻaʻahi pea tokanga ki he mahuʻingaʻiá.
8 Fakalahi Hoʻo Ngāue Fakafaifekaú Tonu: ʻOku fakaʻatā koe ʻe hoʻo ngaahi tuʻungá ke ke fakalahi ʻa hoʻo kau ki he ngāue fakaʻevangelioó naʻa mo e hili atu ʻa e faʻahitaʻu Fakamanatú? ʻE lava ke ke tānaki atu ha houa ʻe taha pe ua ʻi he uike taki taha ki he taimi ʻokú ke faʻa fakamoleki ʻi he ngāue fakamalangá? ʻOkú ke vakai ki muʻa ʻi he tohimāhiná ki he taimi te ke lava ai ke ke toe tāimuʻa tokoní? Pe ʻe lava ke ke fokotuʻutuʻu hoʻo founga moʻuí ke kau ki he ngāue fakafaifekau taimi-kakató? Ko e feinga kotoa ʻoku tau tuku ki he ngāue fakafaifekaú ʻe tokoni nai ia ki ha taha ke ne tali ʻa e moʻoní! (Ng. 8:26-39) ʻI heʻetau hanga atu ki he ngaahi ʻaho mei muʻá, ʻai ke tau “tuli ai pe ki he meʻa ʻoku lelei maʻá e taha, pea maʻá e kakai kotoa pe.”—1 Tes. 5:15.
[Puha ʻi he peesi 3]
Hokohoko Atu ke Tokoni:
□✔ Kau maʻu fakamanatú
□✔ Kau malanga naʻe toe fakalongomoʻuiʻí
□✔ Kau malanga foʻou teʻeki papitaisó