“Tau ʻa e Tau Lelei ʻo e Tui”
1 Naʻe enginakiʻi ʻe he ʻapositolo ko Paulá ʻa Tīmote ke ne “tau ʻa e tau lelei ʻo e tui.” (1 Tim. 6:12) Naʻe moʻui ʻa Paula tonu ʻo fakatatau ki he ngaahi lea ko iá. Ki mui mai ʻi heʻene moʻuí, naʻá ne lea ʻaki ʻa e fakapapau ʻo pehē ko iá naʻá ne tau fakafoʻituitui ʻaki ha tau lelei. (2 Tim. 4:6-8) ʻI he founga kotoa pē, naʻá ne tulimui ki he ngāue fakafaifekaú ʻaki ʻa e taʻemanavahē, loto-toʻa, mo e kātaki. ʻI he faʻifaʻitaki ki heʻene faʻifaʻitakiʻangá, ʻoku lava ke tau maʻu ai ha fakapapau tatau ʻi loto ʻo pehē te tau fai ʻa e lelei taha ʻo ʻetau malavá ʻi heʻetau faitau ki he tui faka-Kalisitiané.
2 Fiemaʻu ke Ngāueaʻaki ʻa e Feingá: Naʻe ngāue mālohi ʻa Paula ʻi he ngāue fakafaifekaú. (1 Kol. 15:10) ʻOku pehē pē mo kitautolu ʻi heʻetau kumi ke maʻu ʻa e kotoa ʻo e faʻahinga taau ʻi hotau feituʻú. (Mt. 10:11) Ke aʻu ki ha niʻihi ʻo kinautolu, ʻoku ʻuhinga nai iá ke tuʻu pongipongia hake ke faifakamoʻoni ki he faʻahinga ʻoku tau fetaulaki ʻi he halá. Pe ʻoku ʻuhinga iá ko e ngāue ʻi he hoʻatā efiafí pe ko e efiafí ke fetaulaki ai mo e kakaí ʻi he hili ʻenau foki ki honau ngaahi ʻapí.
3 ʻOku fiemaʻu heni ʻa e akonakiʻi-kita mo ha taimi-tēpile lelei ke maʻu ai ʻa e taimi ki he fakataha mo ʻetau kulupu ako tohí ki he ngāue fakamalangá. Ko e fakatātaá, ko e niʻihi ʻo e ngaahi mēmipa ʻo e fāmili Pētelí ʻoku nau fononga ʻo aʻu ki he miniti ʻe 60 ʻi he fononga taki taha ke kau ki he ngāue fakafaifekaú fakataha mo ʻenau ngaahi fakatahaʻanga kuo vaheʻi ki aí ʻi he ngaahi fakaʻosinga ʻo e uiké. ʻIkai ko ia pē, ʻoku tau fakatumutumu nai ʻi he kau malanga ʻe niʻihi pea mo e ngaahi fāmili ʻi heʻetau fakatahaʻangá ʻoku nau fononga mamaʻo mai ka ʻoku nau maʻu mai pē ʻa e taimí. Ko e ngaahi faʻifaʻitakiʻanga ʻo e tōtōivi mo e fokotuʻutuʻu fakafoʻituitui peheé ʻoku taau ke faʻifaʻitaki ki ai.
4 ʻOku totonu ke ueʻi kitautolu ke tau toe foki ki he kotoa ʻo e mahuʻingaʻia naʻa tau maʻú. Naʻa mo e taimi ʻoku tufa ai ʻa e ngaahi makasiní ʻi he halá pea ʻi he ngaahi fokotuʻutuʻu ʻikai ʻi he founga anga-mahení, ʻoku fiemaʻu ke fai ha feinga ke maʻu ʻa e tuʻasila ʻo e tokotahá pe ko e fika telefoní. Pea, tau ʻaʻahi leva kiate ia ke fakatupulekina ʻa e mahuʻingaʻiá pea feinga ke kamata ha ako Tohitapu.
5 Kau Tuʻumaʻu ʻi he Ngāué: Naʻe huʻufataha mo fakaʻāuliliki ʻa Paula ʻi he malangá. (Loma 15:19) Fēfē koe? ʻOkú ke kau maʻu pē ʻi he ngāue fakafaifekaú? Kuó ke kau ʻi he ngāue fakamalangá ʻi he māhiná ni? ʻOku mahuʻingaʻia ʻa e kau faiako ʻo e Ako Tohi ʻa e fakatahaʻangá ʻi he sio ko e tokotaha kotoa pē ʻi heʻenau kulupú ʻoku nau kau ʻi he ngāue fakafaifekaú he lolotonga ʻo ʻAokosí. Te nau tokoniʻi koe ke ke fai pehē.
6 ʻI he faʻifaʻitaki ki he faʻifaʻitakiʻanga ʻa Paula ʻi hono poupouʻi kakato ʻa e ongoongo leleí, te tau hokohoko atu ai ke “tau ʻa e tau lelei ʻo e tui.”