Ngāueʻaki ʻa e Ngaahi Meʻa ʻOku Lolotonga Hokó Ke Ne Langaʻi ʻa e Mahuʻingaʻiá
1 Te ke saiʻia ke maʻu ha tokoni hokohoko ʻo e ngaahi fakakaukau lelei te ne tauhi hoʻo ngāue fakafaifekaú ke foʻou pea langaʻi ʻa e mahuʻingaʻia ʻa e kakaí ʻi he pōpoaki ʻa e Tohitapú? Peʻi ngāueʻaki leva ʻa e meʻa ʻoku hoko ʻi he māmaní pea ʻi ho feituʻú ke kamata ha ngaahi fetalanoaʻaki. ʻOku lava ke ke fakahanga ʻa e tokangá ki he ngaahi meʻa ʻoku hoko fakafeituʻu mo fakafonua lolotongá pe ki he ngaahi ongoongo fakavahaʻapuleʻangá. ʻOku liliu maʻu pē ʻa e ngaahi meʻa ko ʻení. (1 Kol. 7:31) Fakakaukau ange ki he ngaahi fakatātā hoko haké.
2 Ko e ngaahi palopalema fakaʻekonōmiká mo e fakamole ʻi he nofó ko e ongo meʻa ia ʻoku loto-moʻua moʻoni ki ai ʻa e kakaí. Ko ia, te ke pehē nai:
◼ “Naʻá ke fanongo ʻi he ongoongó [lave ki he meʻa ko iá] ki hono toe hiki hake ʻa e ngaahi totongí?” Pe te ke fakamatala nai fekauʻaki mo e taʻemaʻu ngāué kapau kuo fakanofo ʻe ha kautaha lahi ha kau ngāue tokolahi. Fakatuʻunga ʻi he founga ʻokú ke saiʻia ke fakahokoʻaki ʻa e fetalanoaʻakí, te ke lava ke hoko atu ʻaki hoʻo ʻeke ange ha taha ʻi he ongo fehuʻi ko ení “Kuó ke fifili pe ko e hā ʻoku fuʻu faingataʻa ai ke maʻu ha moʻuí?” pe “ʻOkú ke fakakaukau ʻe faingataʻa maʻu pē ke tokonaki ki he anga ʻo e nofó?”
3 Ko e ngaahi līpooti ʻo e fakamālohí, hangē ko e ngaahi meʻa fakamamahi ʻi he ngaahi fāmilí pe ʻi he lotolotonga ʻo e fānau akó, ʻoku tokonaki mai ai ha makatuʻunga ki ha toe fetalanoaʻaki ʻe taha. ʻE lava ke ke ʻeke ange:
◼ “Naʻá ke lau ʻi he nusipepá [lave ki he meʻa fakamamahi ʻi he koló]?” ʻEke ange leva ha taha ʻi he ongo fehuʻi ko ení “ʻOkú ke fakakaukau ko e hā ʻa e tupuʻanga ʻo e fakamālohi lahi fau ʻi he māmaní?” pe “ʻOkú ke fakakaukau ʻe ʻi ai ha taimi te tau malava ai ʻo ongoʻi malu?”
4 Ko e ongoongo ʻo e ngaahi lōmaki fakaʻauha, ngaahi mofuike, pe ko e taʻemanonga fakalotofonua ʻi he ngaahi tapa kehekehe ʻo e māmaní ʻokú ne toe ʻoatu ha fakamatala ʻa ia ʻoku langaʻi ai ʻa e mahuʻingaʻiá. Ko e fakatātaá, te ke ʻeke nai:
◼ “ʻOku fakatupunga ʻe he ʻOtuá ʻa e [lave ki he fakatamaki fakanatulá]?” Pe te ke lave ki he hoko fakamuimui taha ʻa e taʻemanonga fakalotofonuá peá ke pehē: “Kapau ʻoku fiemaʻu ʻe he tokotaha kotoa pē ʻa e melinó, ko e hā ʻoku fuʻu faingataʻa ai ke maʻú?”
5 Hanganaki tokanga ki he ngaahi meʻa lolotonga ʻoku hokó ʻa ia te ke lava ʻo ngāueʻaki ʻi hoʻo lea kamatá. ʻOku maʻu ʻa e ngaahi fokotuʻu ʻaonga ʻi he “Current Events,” ʻi he peesi 10-11, ʻi he tohi Reasoning. Kae kehe, fakaʻehiʻehi mei he kau ki ha tafaʻaki ʻi he ngaahi fekīhiaki fakapolitikalé pe fakasōsialé. ʻI hono kehé, fakahanga ʻa e tokangá ki he ngaahi Konga Tohitapú pea mo e Puleʻanga ʻo e ʻOtuá ko e fakaleleiʻanga tuʻuloa pē ia ki he ngaahi palopalema ʻa e faʻahinga ʻo e tangatá.