Hoko ko ha Tokotaha Fanongo Lelei
1 ʻOku fiemaʻu ʻa e akonakiʻi-kita ke te fanongo tokanga. ʻOku toe fiemaʻu ha holi ʻi he tafaʻaki ʻa e tokotaha fanongó ke ne ako pea maʻu ʻa e ʻaonga mei he meʻa ʻokú ne fanongo ki aí. Ko ia ai, naʻe fakamamafaʻi ʻe Sīsū ʻa e fiemaʻu ke “tokanga ki he anga ʻo hoʻomou fanongo.”—Luke 8:18, fakaʻītali ʻamautolu.
2 ʻOku ngāueʻaki tefito ʻeni ki he taimi ʻoku tau maʻu ai ʻa e ngaahi fakataha ʻa e fakatahaʻangá, ngaahi ʻasemipilií, pea mo e ngaahi fakataha-lahí. Ko e ngaahi taimi ʻeni kuo pau ke tau fanongo tokanga aí. (Hep. 2:1) Ko e ngaahi poini ʻeni ʻe niʻihi ʻa ia ʻe tokoni kiate koe ke ke hoko ai ko ha tokotaha fanongo lelei ʻi he ngaahi fakatahataha faka-Kalisitiane ko ʻení.
◼ Houngaʻia ʻi he mahuʻinga ʻo e ngaahi fakatahá. Ko ha founga tefito kinautolu ʻa ia ʻoku ‘akoʻi ai ʻe Sihova’ kitautolu fakafou ʻi he “tauhi agatonu.”—Ai. 54:13; Luke 12:42, PM.
◼ Teuteu ki muʻa. Fakamanatu ʻa e fakamatala ʻoku ʻamanaki ke fai ki ai ʻa e lāuleá, pea fakapapauʻi ke toʻotoʻo mai hoʻo Tohitapú pea mo e tatau fakafoʻituitui ʻo e tohi ʻoku fai ai ʻa e akó.
◼ ʻI he lolotonga ʻo e ngaahi fakatahá, fai ha feinga makehe ke tokangataha. Ko e talanoa mo e faʻahinga ʻoku tangutu fakataha mo koé pea pehē foki ki he sio takai holo ki he meʻa ʻoku fai ʻe he niʻihi kehe ʻi he kau fanongó ʻoku totonu ke fakaʻehiʻehi mei ai. Feinga ke ʻoua ʻe fakahohaʻasi koe ʻe he fakakaukau fekauʻaki mo e meʻa te ke fai ʻi he hili ʻa e fakatahá pe fekauʻaki mo ha ngaahi meʻa fakafoʻituitui kehe.
◼ Sivisiviʻi ʻa e meʻa naʻe fakahoko maí. ʻEke hifo kiate koe: ‘ʻOku anga-fēfē ʻene kaunga ʻeni kiate aú? Te u ngāueʻaki ia ʻafē?’
◼ Hikiʻi ha nouti nounou ʻo e ngaahi poini tefitó pea mo e ngaahi konga Tohitapú. ʻOku tokoni ʻeni kiate koe ke huʻufataha hoʻo ngaahi fakakaukaú ki he meʻa ʻoku fai ki ai ʻa e lāuleá pea tokoni ia ki hoʻo manatuʻi ha ngaahi poini tefito ke ke ngāueʻaki ʻamui ange.
3 Akoʻi Hoʻo Fānaú ke Fanongo: ʻOku fiemaʻu ki he fānaú ʻa e fakahinohino fakalaumālié. (Teu. 31:12) ʻI he kuonga muʻá “ko kinautolu kotoabe nae faa fanongo moe loto ilo” ʻi he lotolotonga ʻo e kakai ʻa e ʻOtuá naʻe pau ke nau tokanga ʻi hono lau mai kiate kinautolu ʻa e Laó. (Nehe. 8:1-3, PM) Kapau naʻe kau ʻi he ngaahi fakatahá ʻa e ngaahi mātuʻá ʻo nau mātuʻaki tokanga, ʻoku ngalingali ʻe fai ʻe heʻenau fānaú ʻa e meʻa tatau. ʻOku ʻikai fakapotopoto ke ʻomai ha ngaahi meʻavaʻinga pe ngaahi tohi tāvalivali ke fakavaʻingaʻi ʻaki ʻa e fānaú. Ko e ngaahi feʻaluʻaki ʻikai fiemaʻu ki he falemālōloó ʻokú ne toe fakahohaʻasi ʻenau fanongó. Koeʻuhi “ʻoku tāvani ʻa e vale ʻi he loto ʻo ha tamasiʻi,” ʻoku totonu ki he ngaahi mātuʻá ke nau fai ha feinga fakamātoato ke sio ko ʻenau fānaú ʻoku nau tangutu maʻu pea fanongo ʻi he ngaahi fakatahá.—Pal. 22:15.
4 ʻI he hoko ko e kau fanongo leleí, ʻoku tau fakamoʻoniʻi ai ʻoku tau fakapotopoto moʻoni pea ʻoku tau fiemaʻu ke ‘fakalahi ʻa e meʻa ʻoku tau maʻú.’—Pal. 1:5.