Ko e Hā ʻa e Taumuʻá?
1 Ko e hā hono ʻuhinga ʻoku tau fai ai ʻa e ngaahi ako Tohitapu ʻi ʻapí? Ke ʻoatu pē ai ha ʻilo, ke fakaleleiʻi ʻa e moʻui ʻa e kakaí pe ke fakamāmaʻi pē ai ʻenau vakai ki he kahaʻú? ʻIkai. Ko ʻetau taumuʻa tefitó ke ngaohi-ākonga maʻa Sīsū Kalaisi! (Mt. 28:19; Ng. 14:21) Ko e ʻuhinga ia ʻoku fiemaʻu ai ke feohi ʻa e faʻahinga ʻoku tau ako mo iá mo e fakatahaʻangá. Ko ʻenau laka ki muʻa fakalaumālié ʻoku fekauʻaki hangatonu ia mo ʻenau mahinoʻi moʻoni ʻa e kautaha faka-Kalisitiané.
2 Founga ke Fakahoko Ai Iá: ʻI he kamatá pē, fakaʻaiʻai maʻu pē ʻa e tokotaha akó ke ne maʻu ʻa e ngaahi fakataha ʻa e fakatahaʻangá. (Hep. 10:24, 25) Fakamatalaʻi ʻa e founga ʻe fakaivimālohiʻi ai heni ʻa ʻene tuí, tokoniʻi ia ʻi heʻene fai ʻa e finangalo ʻo e ʻOtuá pea ʻai ai ia ke ne malava ʻo maʻu ʻa e feohi lelei mo e niʻihi kehe ʻoku nau toe loto ke fakahīkihikiʻi ʻa Sihová. (Sāme 27:13; 32:8; 35:18) Ko hoʻo ngaahi fakahaaʻi fakafoʻituitui ʻa e ʻofa mo e houngaʻia ki he fakatahaʻangá pea ki he ngaahi fakatahá ʻe ueʻi ai ia ke ne holi ke maʻu ia.
3 ʻOku fiemaʻu ke mahinoʻi ʻe he faʻahinga foʻoú ko e kautaha ʻa Sihová ko ha fetokouaʻaki fakavahaʻapuleʻanga. Fakahā kiate kinautolu ʻa e ongo foʻi vitiō ko e Jehovah’s Witnesses—The Organization Behind the Name mo e Our Whole Association of Brothers. Tokoniʻi kinautolu ke nau ʻiloʻi ʻoku ngāueʻaki ʻe Sihova ʻa e faʻahinga fakatapui ʻe laui miliona ʻi māmani lahi ke fakahoko hono finangaló. ʻAi ke ʻilo ʻe he faʻahinga foʻou ko ʻení ʻoku fakaafeʻi mo kinautolu foki ke nau tauhi ki he ʻOtuá.—Ai. 2:2, 3.
4 Ko ha fakatupunga fiefia lahi ē ke sio ki ha tokotaha ako Tohitapu ʻokú ne hoko ko ha ākonga moʻoni ʻa Sīsū. Ko ʻetau taumuʻá ia!—3 Sione 4.