“ʻE Lava Ke U Maʻu mei Fē ha Taimi?”
1 Ko e tangilāulau ia ʻa e tokolahi ʻo kitautolu, he ʻoku femoʻuekina ʻetau moʻuí ʻi he ngaahi ngāué. Kuo faʻa leaʻaki ʻo pehē, ko e taimí ko ʻetau koloa mahuʻinga taha mo mole vave tahá ia. Ko ia, ʻoku lava ke tau maʻu mei fē ha taimi ki he ngaahi meʻa ʻoku mahuʻinga moʻoní, hangē ko e lautohí mo hono ako ʻa e Folofola ʻa e ʻOtuá?—Fili. 1:10.
2 Ko e kií, ʻoku ʻikai ko e feinga ke maʻu ha taimi lahi ange ka ko e fakakaukau ki he meʻa ko ia ʻoku tau loto ke fai ʻi he taimi ʻoku tau maʻú. ʻOku tau maʻu kotoa ʻa e houa ʻe 168 ʻi he uike, mahalo ko e 100 nai ʻoku fakamoleki nai ia ʻi he mohé pea mo e ngāué. Ko ia, ʻe lava fēfē ke tau ngāueʻaki ʻa e ngaahi houa ʻoku toé ki he ʻaonga lahi tahá? ʻOku fokotuʻu mai ʻe he Efeso 5:15-17 (NW), ke tau laka ʻo “ʻoua te tau taʻefakapotopoto ai ka ke tau hoko ko e faʻahinga ʻoku fakapotopoto, ʻo fakatau mai ʻa e taimi faingamālié . . . , ʻi hono ʻiloʻi ʻa e finangalo ʻo Sihová.” ʻOku fakahaaʻi heni ha fiemaʻu ke ngāuekakatoʻaki ʻa e faingamālie kotoa pē ke fai ʻa e ngaahi meʻa ʻoku folofolaʻaki ʻe Sihova ʻoku fiemaʻú.
3 Naʻe fakafehoanaki ʻe Sīsū hotau ʻahó ki he ngaahi ʻaho ʻo Noá. (Luke 17:26, 27) Ko e kakai ʻi he taimi ko iá naʻa nau femoʻuekina ʻi he ngaahi meʻa fakaʻaho ʻo e moʻuí. Kae kehe, naʻe maʻu ʻe Noa ha taimi ke langa ai ha fuʻu ʻaʻake lahi pea ke malanga. (Hep. 11:7; 2 Pita 2:5) ʻO anga-fēfē? ʻAki hono fakamuʻomuʻa ʻa e finangalo ʻo e ʻOtuá pea talangofua kiate ia ʻaki hono fai “pehē tofu pē” ʻa e ngaahi meʻá.—Sen. 6:22, NW.
4 Ko e Hā ʻOku Totonu ke Fakamuʻomuʻá? Naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mt. 4:4) ʻI he uike taki taha, ʻoku tau maʻu ai ha “ʻinasi ʻo e ngaahi tokonaki meʻakai [fakalaumālié] ʻi hono taimi totonu.” (Luke 12:42, NW) ʻOku fiemaʻu heni ha taimi-tēpile lautohi mo e ako fakafoʻituitui tuʻumaʻu ke mahinoʻi kotoa ia ʻo kapau ʻoku tau fiemaʻu ha ʻaonga moʻoni. ʻI he houngaʻia ʻi he meʻakai fakalaumālié, ʻoku ʻikai ke tau vakai ki ai ʻo hangē ha meʻakai ʻoku teuteuʻi fakavavé, ke keina fakavave ʻo hangē ko ʻete kai pē mo lele ʻa e meʻakai fakamatelié. ʻI hono kehé, ʻoku ueʻi kitautolu ʻe he houngaʻia totonú ke vaheʻi ha taimi ke ako pea fiefia ai ʻi he ngaahi meʻa fakalaumālié.
5 Ko hono maʻu ʻa e meʻakai fakalaumālié ʻe lava ke iku atu ia ki he moʻui taʻengata. (Sione 17:3) ʻOku tuha ia mo ha tuʻunga muʻomuʻa ʻi heʻetau taimi-tēpile fakaʻahó. ʻOku lava ke tau maʻu ha taimi ki hono lau fakaʻaho ʻa e Tohitapú pea mo e teuteu ki he ngaahi fakataha faka-Kalisitiané? ʻIo, ʻe lava ke tau maʻu. Ko ia, te tau maʻu ha “fuʻu totongi” ʻa ia ʻoku hoko mai mei hono ʻiloʻi pea mo hono fai ʻa e finangalo ʻo e ʻOtuá.—Sāme 19:7-11.