Ko e Ngaahi Tāpuaki mei Hono Fakahaaʻi ʻa e Houngaʻia ʻi he ʻOfa ʻa Sihová—Konga 1
1 Naʻe tohi ʻe he ʻapositolo ko Sioné: “ʻOku tau ʻofa ʻe kitautolu, koeʻuhi naʻe tomuʻa ʻofa [ʻa Sihova] kiate kitautolu.” (1 Sione 4:19) ʻI heʻetau fakakaukau atu ki he kotoa ʻo e meʻa kuo tokonaki mai ʻe Sihova maʻatautolú, ʻoku ueʻi ai kitautolu ke fakahā ʻetau houngaʻia lolotó. Naʻe fokotuʻu ʻe Sīsū ha faʻifaʻitakiʻanga ʻi hono fai ʻení ʻaki ʻa e talangofua ʻo faifakamoʻoni fekauʻaki mo e huafa pea mo e Puleʻanga ʻo e ʻOtuá. (Sione 14:31) ʻOku lelei ke tau lāulea ki ha ngaahi founga ʻe niʻihi ʻe lava ke tau fakahā ai ʻetau houngaʻia ki he ʻofa ʻa Sihová pea mo e ngaahi tāpuaki ʻoku hoko mai mei aí.
2 ʻAlu mei he Fale ki he Fale: Naʻe akoʻi ʻe Sīsū ʻa ʻene kau ākongá ki he founga ke fakahokoʻaki ʻa e ngāue fakamalanga ʻo e Puleʻangá. ʻOku fakahaaʻi mahino ʻe heʻene ngaahi fakahinohinó naʻa nau ʻalu mei he fale ki he fale, ʻo fakamafola ʻa e ongoongo leleí. (Luke 9:1-6; 10:1-7) ʻOku fiemaʻu ʻa e ʻofa ki he ʻOtuá mo e kaungāʻapí ke tau hanganaki ʻalu ai mei he matapā ki he matapā ʻi he taimi ʻoku tau fetaulaki ai mo e loto-noá pea mo e fakafepakí. Kae kehe, ʻi heʻetau ʻalu mei he fale ki he falé, ʻoku tau maʻu ai ʻa e ʻaonga fakafoʻituitui koeʻuhi he ko ʻetau tuí ʻoku hoko ʻo toe fefeka ange, toe mālohi ange ʻetau tuipaú pea toe mahino ange ʻetau ʻamanakí.
3 ʻI he ngāue he malumalu ʻo e tataki fakaeʻāngeló, kuo tau maʻu ai ha faʻahinga tokolahi ʻoku fiekaia mo fieinua ki he moʻoní. (Fkh. 14:6) Kuo pehē ʻe he faʻahinga ʻi he ngaahi ʻapí naʻa nau faʻa lotu ki ha tokoni ʻi he taimi naʻe haʻu ai ha Fakamoʻoni ki honau matapaá. Ko ha ongo fefine Fakamoʻoni ʻe toko ua mo ha kiʻi tamasiʻi naʻa nau ʻalu fakataha mei he fale ki he fale ʻi ha motu ʻi he Kalipiané. ʻI he taimi naʻe fili ai ʻa e ongo Fakamoʻoní ke nau mālōlō ā ʻi he ʻaho ko iá, naʻe hoko atu pē ʻa e kiʻi tamasiʻí ia ʻiate ia pē ki he matapā hoko maí ʻo ne tukituki ai. Naʻe fakaava mai ʻe ha finemui ʻa e matapaá. ʻI he sio atu ʻa e ongo Fakamoʻoní ki he meʻá ni, naʻá na ʻalu atu leva ʻo talanoa mo ia. Naʻá ne fakaafeʻi kinautolu ki loto peá ne fakamatala ange ko e toki ʻosi atu pē ia ʻa ʻene lotu ki he ʻOtuá ke fekau mai ha Kau Fakamoʻoni ke akoʻi kiate ia ʻa e Tohitapú!
4 Faifakamoʻoni ʻi he Ngaahi Halá: Koeʻuhi ʻoku fuʻu faingataʻa ʻi he ngaahi feituʻu ʻe niʻihi ke maʻu ha kakai ʻi ʻapi, ko e faifakamoʻoni ʻi he halá ko ha founga ola lelei ia ke faifakamoʻoni ai ki he kakaí. ʻIkai ko ia pē, ʻoku nofo ʻa e kakai tokolahi ʻi he ngaahi feituʻu ʻoku ʻaaʻi pe ngaahi fale ʻoku maluʻi ʻa ia heʻikai te tau lava ke ʻalu ai mei he matapā ki he matapā. Kae kehe, ʻoku ueʻi kitautolu ʻe heʻetau houngaʻia ki he ʻofa ʻa Sihová ke tau ngāueleleiʻaki ʻa e founga ʻoku ala lava kotoa pē ke fetuʻutaki ai ki he kakaí mo e pōpoaki ʻo e Puleʻangá, ʻo kau ai ʻa e faifakamoʻoni ʻi he halá.—Pal. 1:20, 21.
5 Fai ʻa e Ngaahi Toe ʻAʻahí: Koeʻuhi ʻoku tau kumi ki ha faʻahinga ʻoku nau “ʻiloʻi ʻa ʻenau fiemaʻu fakalaumālié,” ʻoku tau loto ke fai ʻa e meʻa te tau malavá ke fakatōliʻa ʻa e fiemaʻu ko iá. (Mt. 5:3, NW) ʻOku fiemaʻu heni ke tau toe foki ʻo fuʻifuʻi ʻa e ngaahi tenga ʻo e moʻoní ʻa ia naʻa tau toó. (1 Kol. 3:6-8) Ko ha tuofefine ʻi ʻAositelēlia naʻá ne tuku ha tuleki ʻi ha fefine ʻa ia naʻe hā ngali naʻe ʻikai te ne fakahaaʻi ha mahuʻingaʻia lahi. Ka neongo ia, naʻe kīvoi pē ʻa e tuofefiné ʻi he feinga ke toe maʻu ia ki hono ʻapí. ʻI he faifai peá ne fetuʻutaki mo iá, naʻe ʻilo ai ʻe hotau tuofefiné ko e hili ko ia ʻa e ʻuluaki ʻaʻahí, naʻe fakatau ai ʻe he fefiné ha Tohitapu mamafa. Naʻe kamata ʻe he tuofefiné ha ako mo ia!
6 Fakahoko ʻa e Ngaahi Ako Tohitapú: ʻOku lava ke hoko ʻeni ko e tafaʻaki fakafiefia mo fakapaleʻi lahi taha ia ʻo ʻetau ngāue fakafaifekaú. Ko ha tāpuaki ē ke tokoniʻi ha kakai ke ako fekauʻaki mo Sihova, ke sio ʻoku nau fai ha ngaahi liliu ʻi heʻenau moʻuí ke fakahōifua kiate ia pea ke sio tonu ʻi heʻenau papitaiso faka-Kalisitiane ko e fakahāhā ʻo ʻenau fakatapui ki he ʻOtuá!—1 Tes. 2:20; 3 Sione 4.
7 ʻI he ʻīsiu hoko maí, te tau lāulea ai ki ha ngaahi founga lahi ange ʻa ia ʻoku tāpuakiʻi ai kitautolu ʻi hono fakahā ʻa e houngaʻia ʻi he ʻofa ʻa Sihová.