Ko e Ngaahi Tāpuaki mei Hono Fakahaaʻi ʻa e Houngaʻia ʻi he ʻOfa ʻa Sihová—Konga 2
1 ʻI he konga ʻo e māhina kuo ʻosí he kaveinga ko ʻení, naʻa tau fakamatala ai ki he founga ʻe fā ʻe lava ke fakahaaʻi ai ʻi he ngāue fakafaifekaú ʻetau houngaʻia ki he ʻofa ʻa Sihová. (1 Sione 4:9-11) He taimí ni te tau tānaki atu ha toe founga lahi ange ʻe nima ke fai ai ʻení. ʻI heʻetau kau kakato ki hono tokoniʻi fakalaumālie ʻa e niʻihi kehé, ʻoku tāpuakiʻi ai kitautolu.
2 Faifakamoʻoni ʻIkai ʻi he Founga Anga-Mahení: Ko ha founga ola lelei ʻeni ki hono maʻu fakatouʻosi ai ʻa e kakai fiekaia mo fieinua ki he māʻoniʻoní pea ke tuku ha ngaahi tohi tokoni ʻiate kinautolu. ʻOku lelei ke ‘fakatau mai ʻa e taimi faingamālié’ pea faifakamoʻoni ʻi he ngaahi tuʻunga kotoa pē pea ki ha taha pē ʻoku tau fetaulaki mo ia. (Ef. 5:16, NW) ʻE lava nai ke tau fakatupulekina ha loto-toʻa ke faifakamoʻoni ʻi he founga ko ʻení, ka ʻo kapau ʻoku tau houngaʻia ʻi he ʻofa ʻa e ʻOtuá pea mo e ngaahi fiemaʻu ʻa e kakaí, te tau faifakamoʻoni ʻi he faingamālie kotoa pē.—2 Tim. 1:7, 8.
3 Naʻe tāpuakiʻi lahi ha misinale ʻi heʻene kamata ha fetalanoaʻaki mo ha kaungā heka tekisī. Naʻe fakahaaʻi ʻe he tangatá ha mahuʻingaʻia. Naʻe fai ha ngaahi toe ʻaʻahi, pea naʻe kamata ha ako Tohitapu. Naʻe haʻu ʻa e tangatá ki he moʻoní pea fakalakalaka ʻo aʻu ki he tuʻunga ʻo e hoko ko ha tokotaha mātuʻa ʻi he fakatahaʻangá!
4 Fai ha Ngaahi Tohi: Mahalo heʻikai lava ke tau ʻalu mei he fale ki he falé koeʻuhi ko ha mahamahaki fakaesino pe ko ha ʻalotāmaki. ʻE lava ke tau fai ha ngaahi tohi, ʻo ʻoatu ha fakamoʻoni nounou ʻi he meilí ki he faʻahinga tāutaha ʻoku tau ʻiloʻí, ha faʻahinga naʻe mole atu ha taha naʻa nau ʻofa ai ʻi he maté, pe ko ha faʻahinga naʻe ʻikai te nau ʻi ʻapi ʻi he feituʻu ngāué. ʻE lava ke tau mono atu ai ha taha ʻo ʻetau ngaahi tuleki lolotongá ʻa ia ʻoku ʻi ai ha pōpoaki fakamānako makatuʻunga mei he Tohitapú pea fakalototoʻaʻi ʻa e tokotaha ʻokú ne maʻu iá ke ne ʻomai ha tali kapau ʻoku ʻi ai haʻane faʻahinga fehuʻi. Ngāueʻaki ʻa ho tuʻasila fakafoʻituituí pe ko ia ki he Fale Fakatahaʻangá; kātaki ʻoua ʻe ngāueʻaki ʻa e tuʻasila ʻo e ʻōfisi vaʻá.
5 Faifakamoʻoni ʻAki ʻa e Telefoní: Ko ha founga lelei ʻeni ke aʻu ai ki he kakai ʻoku ʻikai lava ke tau feʻiloaki mo ia ʻi he ngāue fale-ki-he-falé. Kapau te tau fakahoko fakapotopoto ia, ʻaki ʻa e anga-ʻofa, fakapotopoto mo e pōtoʻi, te tau maʻu nai ha tali lelei ʻaupito. Ko ʻEtau Ngāue Fakafaifekau ʻo e Puleʻanga ʻo Fepueli 2001, peesi 5-6, ʻoku ʻomai ai ha ngaahi fokotuʻu ʻaonga ki he founga ke maʻu ai ha ola lelei tahá.
6 ʻI he taimi naʻe faifakamoʻoni ʻaki ai ʻe ha tuofefine ʻa e telefoní, naʻá ne ʻeke ki ha fefine pe naʻá ne fakakaukau lahi ki he meʻa ʻoku tuku tauhi mai ʻe he kahaʻú maʻana pea mo hono fāmilí. Naʻe pehē ʻe he fefiné naʻá ne fakakaukau ki ai. Naʻá ne fakahā ange koeʻuhi ko ʻene ʻamanaki-tōnoá naʻá ne fakamavaheʻi ai ia ʻi hono ʻapí. ʻI hono ueʻi ʻe he tokanga moʻoni ʻa e tuofefiné, naʻe loto-lelei ai ʻa e fefiné ke fetaulaki mo e tuofefiné ʻi ha māketi ofi mai. Ko hono olá, naʻe loto-lelei ʻa e fefiné ke tali ha ako Tohitapu!
7 Talitali Lelei ha Kau Sola: Kapau ʻoku tau ʻofa ʻi hotau ngaahi kaungāʻapí, te tau tokanga ke fakatokangaʻi ʻa e tokotaha sola ʻoku ʻaʻahi mai ki hotau feituʻu faiʻanga fakatahá pea te tau ʻai ia ke ne ongoʻi ʻoku talitali lelei. (Loma 15:7) ʻAi ia ke ne ʻiloʻi ʻokú ne ʻi he lotolotonga ʻo e faʻahinga ʻoku nau mahuʻingaʻia loto-moʻoni ʻi heʻene lelei fakalaumālié. Ko ʻetau tokanga moʻoní pea mo ʻetau tuʻuaki ange ha ako Tohitapu fakafoʻituituí ʻe ueʻi nai ai ia ke ne tali ʻetau tokoní.
8 Ko ʻEtau ʻUlungaanga Leleí: ʻI heʻetau ʻulungaanga leleí, ʻoku tau teuʻi ai ʻa e moʻoní. (Tai. 2:10) ʻI he taimi ʻoku leaʻaki ai ʻe ha faʻahinga ʻi he māmaní ha ngaahi meʻa lelei fekauʻaki mo kitautolu ʻi he tuʻunga ko e Kau Fakamoʻoni ʻa Sihová, ʻoku nau ʻomai ai ʻa e lāngilangi ki hotau ʻOtuá. (1 Pita 2:12) ʻE lava foki ke tokoni ʻa e meʻá ni ke kamata ai ʻa e niʻihi kehé ʻi he hala ki he moʻuí.
9 Fēfē ke fakamanatu ʻa e ngaahi founga ʻe nima ko ʻeni ke fakahā ai ʻetau houngaʻia ki he ʻofa lahi ʻa Sihova kiate kitautolú pea ngāueʻaki kinautolu? (1 Sione 4:16) ʻI hoʻo fai iá, te ke utu ai ha ngaahi tāpuaki lahi.