Anga-Fakanānā ʻi he Valá mo e Teuteú
1 “Ko e kakai tangatá kotoa, naʻa mo e tamaiki tangatá, ʻoku nau tui hēkesi. Ko e kakai fefiné kotoa mo e tamaiki fefiné, fakatouʻosi ʻa e finemuí mo e fānaú, ʻoku nau tui ha kofu pe ko ha piva. ʻOku ʻikai sio ai ki ha talausese tangikalī pe ko ha sote taʻehēkesi. ʻOku ulo ʻa e tokotaha kotoa ʻi hení.” Ko e lau ia ʻa ha līpooti ongoongo. Ko e faʻahinga kakai fēfē naʻá ne fakamatalaʻí? Ko ha fakatahataha fakapolitikale? Ko ha sipoti naʻe fai? Ko ha koniseti rock? ʻIkai ʻaupito! Naʻá ne fakamatalaʻi ha kulupu ʻo e fanga tokoua mo e fanga tuofāfine ʻi ha fuʻu fakataha-lahi fakavahe ʻi he taʻu kuo ʻosí.
2 ʻI ha kolo fakataha-lahi ʻe taha, naʻe ʻomai ai ʻe ha fainusipepa ʻa e fakamatala ko eni fekauʻaki mo e fuʻu Kau Fakamoʻoní: “ʻOku maʻa ʻa e kakai tangata kotoa pē pea ʻoku nau tui suti mo e hēkesi. ʻOku tui vala fakanānā ʻa e kakai fefiné ka ʻi he tuʻunga matamatalelei.” Ko e tokotaha mamata hono uá, ko ha tokotaha leʻo, naʻá ne pehē: “Ko e kakai anga-lelei, anga-fakaʻapaʻapa, maʻa mo maau kimoutolu. Ko e meʻa ʻoku ou sio ki aí ʻoku fakaʻofoʻofa. ʻI he māmani ʻulifōfō ko ení, ʻoku mou malava ai ke toʻo ʻa e ʻulí!” Ko ha ngaahi fakamoʻoni lelei moʻoni ia maʻatautolu! ʻIkai ʻoku tau fakamālō ʻi he malava ke fakaongoongoleleiʻi lahi pehē ʻetau fetokouaʻakí? Ko e moʻoni, ko e faʻahinga kotoa ʻi he fuʻu kakaí ni ʻoku nau kau ʻi he tokoni ki he ngaahi līpooti leleí ʻaki honau fōtunga alafaʻifaʻitakiʻangá.
3 Kuo tau hoko ʻo ʻiloa ʻi māmani lahi ʻi he hoko ʻo kehe ʻi ha tuʻunga makehe ʻi hotau fōtungá. (Mal. 3:18) Ko e hā hono ʻuhingá? Koeʻuhi ʻoku tau muimui ki he enginaki Fakatohitapu ke “teuʻaki [kitautolu] ʻa e kofu ʻoku ngali ke ʻai, pea ō mo e [anga-fakanānā] mo e angafakamaʻumaʻu: . . . ʻa ia ko e meʻa ʻoku tāu mo e [faʻahinga] ʻoku nau lavutu ke tauhi ki he ʻOtua.”—1 Tim. 2:9, 10.
4 Ko e Hā ʻOkú Ke Fakahaaʻi ʻi Ho Valá mo e Teuteú? Ko e vala ʻoku tau tuí mo e founga ʻo ʻetau tui iá ʻokú ne fai ha fakamatala pau fekauʻaki mo kitautolu—ko ʻetau ngaahi tuí, fakakaukaú, mo e ngaahi taumuʻá. Ko e ngaahi sīpinga ʻoku tau filí ʻoku fakamatalaʻi ai pe ko hai kitautolu pea mo e meʻa ʻoku tau fakafofongaʻí. Kuo pau ke ʻoua ʻaupito te tau poupouʻi ʻa e fakakaukau mo e ʻulungaanga ololalo ʻa ia ʻoku manakoaʻi ʻe he māmaní. Ko ʻetau tokangá ʻoku ʻikai koeʻuhi ko ha sīpinga pau ʻoku tōtuʻa ʻene ʻalu fakataha mo e kuongá ka ko e sio pe ʻoku feʻunga ki ha taha ʻoku taku ko ha faifekau ʻa e ʻOtuá. (Loma 12:2) ʻI he ʻikai ke fili ha fōtunga ʻoku fakaʻaliʻali ai ha laumālie faʻifaʻitelihá pe ʻoku ʻomai ai ha sīpinga moʻui taʻetāú, ʻoku tau loto ke fakahaaʻi ʻoku tau “fakahikihikiʻi [moʻoni] ʻa e ʻOtua.”—1 Pita 2:12.
5 ʻI he taimi ʻe niʻihi, ʻe tali nai ai ʻe ha taha ʻa ia ʻoku kei foʻou, taʻetaukei, pe vaivai fakalaumālié ha meʻa pē ʻoku tuʻuaki mai ʻe he māmaní ʻi he valá mo e teuteú, ʻo ʻikai ʻuluaki fakakaukau ki he anga ʻo ʻene tapua atu ʻa Sihova mo ʻene kautahá. Ko kitautolu kotoa te tau fai nai ha sivisiviʻi-kita ke sio pe kuo tākiekina kitautolu ʻe he fakakaukau ʻa e māmaní. ʻE lava ke tau fakaofiofi ki ha tokoua pe tuofefine fakalaumālie matuʻotuʻa ʻoku fakaʻapaʻapaʻi, ʻo kole ki haʻane fakamatala lea totonu fekauʻaki mo e sīpinga ʻo hotau valá mo e teuteú pea fakakaukau fakamātoato leva ki he ngaahi fokotuʻu ʻoku ʻomaí.
6 ʻOku ʻosi loto-tatau ʻa e niʻihi ʻoku totonu ke nau tokanga fekauʻaki mo e anga honau valá lolotonga ʻa e kau ki he fakataha-lahí. Ka ʻoku nau tuku hifo leva honau tuʻungá lolotonga ʻa e ngaahi taimi ʻatā hili ʻa e ngaahi kongá. Tauhi maʻu ʻa e tuʻunga māʻolunga ʻoku taau mo e kau faifekau Kalisitiané. (2 Kol. 6:3, 4) Ko fē pē ʻoku tau ʻalu ki ai ʻi ha feituʻu kakai, ko ʻetau ngaahi kaati fakaʻilonga fakataha-lahí fakataha mo hotau valá mo e teuteu tāú ʻoku fakahaaʻi atu ai kitautolu ko e Kau Fakamoʻoni ʻa Sihova. Ko ia ai, ko hotau valá ʻoku totonu ke maau maʻu pē mo fakanānā, ʻo fakahaaʻi ai ko kitautolú ʻoku “ʻikai ʻo māmani.”—Sione 15:19.
7 Tau fai ʻa e meʻa kotoa te tau malavá ʻi he Fakataha-Lahi Fakavahe “Kau Fanongonongo Faivelenga ʻo e Puleʻangá” ʻi he taʻu ní, ke fakamoʻoniʻi ai ko kitautolú “ko e kakai tapuha kia Sihova ko [hotau] ʻOtua.” Ko e fakaueʻiloto lelei ʻe hokó ʻe tānaki atu ia ki he “fakamaloʻia, mo e ongoongoa, mo e langilangiʻia” ʻo Sihová.—Teu. 26:19.
[Puha ʻi he peesi 4]
Founga ke Fakalāngilangiʻi Ai ʻa Sihová:
■ Tui vala ʻi he founga ʻoku taau mo ha faifekau ʻa e ʻOtuá.
■ Fakaʻehiʻehi mei he ngaahi sīpinga ʻoku muimui ki he laumālie ʻo e māmaní.
■ Fakahāhā ʻa e fakanānā, ʻa ia ʻoku tapua mei ai ʻa e anga-fakamaʻumaʻú.