Fakalato Hoʻo Fiemaʻu Fakalaumālié
1 Ko ʻetau Fakataha-Lahi Fakavahe “Kau Fanongonongo Faivelenga ʻo e Puleʻangá” ʻoku tuʻunuku maí, ʻe ʻomai ai kia kitautolu ha faingamālie fisifisimuʻa ke fakalato ai ʻetau fiemaʻu fakalaumālié. ʻI he hangē ha houa kai lelei fakamatelie, ʻoku fafangaʻi fakalaumālie moʻoni kitautolu ʻe he polokalamá “i he gaahi lea oe tui.” (1 Tim. 4:6, PM) Te ne fakaivia kitautolu ke tau ʻunuʻunu ofi ange ai kia Sihova. Pea ʻe lava ke tau ʻamanekina ai ke maʻu ʻa e akonaki mo e fakalototoʻa ke tokoniʻi kitautolu ke fekuki mo e ngaahi ʻahiʻahi ʻi heʻetau moʻuí. ʻOku fakapapauʻi mai ʻe Sihova kia kitautolu: “Te u akonakiʻi koe mo hulu ki he hala te ke foua: te u faleʻi koe ʻaki ʻeku hila.” (Sāme 32:8) He fiefia ē ka ko kitautolu ke maʻu ʻa ʻene tataki ʻofá ʻi heʻetau moʻuí! Fakakaukau angé ki ha ngaahi sitepu ʻaonga ʻe lava ke tau fai ke maʻu ai ʻa e ʻaonga lahi tahá mei he polokalama ʻo e fakataha-lahí.
2 ʻOku Fiemaʻu Ke Tau Teuʻi Hotau Lotó: Ko kitautolu taki taha ʻokú ne maʻu ha fatongia ke maluʻi ʻa hono lotó tonu. (Pal. 4:23) ʻOku fiemaʻu heni ke tau ngāueʻi ʻa e akonakiʻi-kitá pea ke tau faitotonu ʻia kitautolu. Ko e fakataha-lahí ko ha taimi ia ke fakalaulauloto ai ki hotau vahaʻangatae mo Sihová, ko ha taimi ke ‘fakasio ai ki he lao haohaoá, ʻa e lao tauʻatainá.’ Ke teuʻi hotau lotó ke ‘tali ʻa e folofola kuo toó,’ ʻoku totonu ke tau kole kia Sihova ke ne sivisiviʻi kitautolu, ke fakapapauʻi ai ʻia kitautolu ha “hala ʻomi mala” ʻoku fiemaʻu ke fakatonutonu, pea ke tataki ai kitautolu ʻi he “hala taʻengata.”—Sem. 1:21, 25; Sāme 139:23, 24.
3 Fanongo pea Fakalaulauloto: Naʻe fakaongoongoleleiʻi ʻe Sīsū ʻa Mele ʻi heʻene mātuʻaki tokanga ki heʻene ngaahi leá, ʻi heʻene pehē: “Kuo fili ʻe Mele ʻa e ngafa ʻoku lelei, ʻa ia foki ʻe ʻikai toʻo meiate ia.” (Luke 10:39, 42) Kapau ʻoku tau maʻu ʻa e fakakaukau fakaʻatamai tatau, ʻe ʻikai te tau fakaʻatā ʻa e fanga kiʻi meʻa laulaunoá ke ne fakahohaʻasi kitautolu. Te tau fakapapauʻi ʻoku tau tangutu ʻo tokanga ʻi he lolotonga ʻa e polokalamá kotoa. Te tau fakaʻehiʻehi mei he talanoa pe lue takai holo ʻoku ʻikai fiemaʻú pea te tau tokanga ke ʻoua ʻe fakahohaʻasi ʻa e niʻihi kehé ʻaki ʻa e ngaahi telefoni selulaá, ngaahi pipá, ngaahi meʻa faitaá mo e ngaahi meʻa faitā vitioó.
4 ʻI heʻetau fanongo ki he ngaahi malangá, ʻoku lelei ke hiki ha ngaahi nouti nounou ke tokoniʻi ai kitautolu ke ʻanalaiso ʻa e anga ʻo hono fakahoko ʻa e kaveingá. ʻOku totonu ke tau fakafehokotaki ʻa e meʻa ʻoku tau fanongo ki aí mo e meʻa kuo tau ʻosi ʻiló. ʻE tokoniʻi ai heni kitautolu ke mahinoʻi pea tauhi maʻu ai ʻa e fakamatalá. ʻI hono fakamanatu ʻetau ngaahi noutí, ʻoku fiemaʻu ke tau fai ia fakataha mo ha fakakaukau ke ngāueʻaki ʻa e fakamatalá. Ko kitautolu taki taha ʻoku lelei ke tau ʻeke: ‘ʻOku anga-fēfē ʻa e kaunga ʻa e meʻá ni ki hoku vahaʻangatae mo Sihová? Ko e hā ʻa e ngaahi liliu ʻoku fiemaʻu ke u fai ʻi heʻeku moʻuí? ʻE lava fēfē ke u ngāueʻaki ʻa e fakamatalá ni ʻi heʻeku feangainga mo e niʻihi kehé? ʻE lava fēfē ke u ngāueʻaki ia ʻi heʻeku ngāue fakafaifekaú?’ Lāulea mo e niʻihi kehé ki he ngaahi poini ʻoku tautefito ai ʻetau fiefiá. Ko hono fai ʻo e ngaahi meʻá ni ʻe tokoniʻi ai kitautolu ʻi hono tauhi ʻa e ngaahi lea ʻa Sihová ‘ʻi hotau lotoʻi lotó.’—Pal. 4:20, 21.
5 Tau Ngāueʻaki ʻa e Meʻa ʻOku Tau Akó: Hili hono maʻu ha fakataha-lahi fakavahé, naʻe pehē ʻe ha fakafofonga ʻe taha: “Ko e polokalamá naʻe mātuʻaki fakanatula fakafoʻituitui, ʻo ueʻi ai ha taha ke ne sivisiviʻi ʻa e tuʻunga ʻo hono lotó pea mo e tuʻunga ʻo hono fāmilí, pea ke ʻoatu ʻa e tokoni ʻofa Fakatohitapú hangē ko ia ʻoku fiemaʻú. Kuo ʻai ai au ke u lāuʻilo lahi ange fekauʻaki mo hoku fatongia ke fai ha tokoni lahi ange ki he fakatahaʻangá.” Ngalingali ko e tokolahi ʻo kitautolu kuo tau ongoʻi pehē. Ka ʻoku ʻikai feʻunga pē ke tau mavahe fakataha mo e ongoʻi langa hake mo e fakaivifoʻou. Naʻe pehē ʻe Sīsū: “Kapau ʻoku mou ʻilo ʻa e ngaahi meʻa ko ia, pea ko e toki kakai monuʻia kimoutolu, ʻo kapau te mou fai ia.” (Sione 13:17, fakaʻītali ʻamautolu.) Kuo pau ke tau ngāueʻaki tōtōivi ʻa e ngaahi poini ʻoku kaunga fakafoʻituitui kia kitautolú. (Fili. 4:9) Ko e kī eni ki hono fakalato kakato ʻetau fiemaʻu fakalaumālié.
[Puha ʻi he peesi 3]
Fakalaulauloto ki he Meʻa ʻOkú Ke Fanongo ki Aí:
■ ʻOku anga-fēfē ʻene kaunga ki hoku vahaʻangatae mo Sihová?
■ ʻOku anga-fēfē ʻene tākiekina ʻeku ngaahi feangainga mo e niʻihi kehé?
■ ʻE lava fēfē ke u ngāueʻaki ia ʻi heʻeku moʻuí pea ʻi heʻeku ngāue fakafaifekaú?