Fakatahataha Fakataha ke Fakahīkihikiʻi ʻa Sihova
1. Ko e hā ʻa e kaveinga ʻo e fakataha-lahí, pea ko e hā ʻoku taau ai ʻa Sihova mo ʻetau fakahīkihikí?
1 ʻOku māfimafi-aoniu ʻa Sihova ʻi he mālohí, taʻemafakatotoloa ʻi he potó, haohaoa ʻi he fakamaau totonú, pea ko e fakasino ia ʻo e ʻofá. ʻI he tuʻunga ko e Tokotaha-Fakatupu, Tokotaha Foaki-Moʻui, mo e Hau Fakalevelevá, ko ia tokotaha pē ʻoku taau mo ʻetau lotú. (Sāme 36:9; Fkh. 4:11; 15:3, 4) Ko e Fakataha-Lahi Fakavahe “ʻAve ki he ʻOtuá ʻa e Lāngilangí” ʻi he faʻahitaʻu failau ko ení ʻe fakaivimālohiʻi ai ʻetau fakapapau ke fakahīkihikiʻi ia ʻi hono tuʻunga ko e ʻOtua moʻoni pē tahá.—Sāme 86:8-10.
2, 3. ʻE malava fēfē ke ʻai ʻe he palani leleí ke tau maʻu ʻaonga kakato?
2 Fiemaʻu ʻa e Palani Lelei: Ke tau maʻu ʻaonga kakato mei he kātoanga kai fakalaumālie ʻoku tuku tauhi mai ʻe Sihová, ʻoku mātuʻaki fiemaʻu ʻa e palani lelei. (Ef. 5:15, 16) Kuó ke fakakakato hoʻo ngaahi fokotuʻutuʻu ki he nofoʻangá, meʻalelé, pea mo e taimi ke ʻatā ai mei he ngāué pe ko e akó? ʻOua ʻe tuku ʻa e ngaahi meʻa mahuʻingá ni ki he miniti fakaʻosí. Kapau ʻokú ke tautoloi ʻi he kole ha taimi ʻataá, ʻe mole nai ai meiate koe ha konga ʻo e taimi fakafiefiá ni. Ko kitautolu kotoa ʻoku fiemaʻu ke tau ʻi ai ʻi he kongá kotoa.
3 ʻAi ko hoʻo taumuʻá ia ke aʻu tōmuʻa ki he faiʻanga fakataha-lahí ʻi he ʻaho taki taha. ʻE ʻai ai ke ke malava ʻo nofo ki ho nofoʻangá ki muʻa ʻi he hiva kamatá pea ʻe tokoniʻi ai koe ke ke ʻi ha fakakaukau fakaʻatamai totonu ke tali ʻa e fakahinohino ʻoku ʻomaí. ʻE fakaava ʻa e ngaahi matapaá ʻi he 8:00 pongipongi ʻi he ʻaho taki taha. Kātaki ʻoua ʻe taʻofi ha ngaahi sea tuku kehe ʻa e ngaahi sea ki he faʻahinga pē ʻi ho fāmilí tonu pe ko hoʻo kau fonongá.
4. Ko e hā ʻoku kole mai ai ke tau haʻu kotoa mo ha kai hoʻatā ki he fakataha-lahí?
4 ʻOku kole atu ke omi kotoa mo ha kai hoʻatā kae ʻikai ke mavahe mei he faiʻanga fakataha-lahí ke ʻomai meʻakai lolotonga ʻa e mālōlō hoʻataá. Ko hoʻomou ngāue fāitaha mo e fokotuʻutuʻu ko ení ʻe tokoni ia ki ha ʻatimosifia melino pea fakaʻatā ai ʻa e taimi lahi ange ki he feohi mo e kaungātuí. (Sāme 133:1-3) Kātaki ʻo manatuʻi ʻoku ʻikai fakangofua ʻa e ngaahi ʻaiʻanga meʻa sioʻatá mo e ngaahi inu ʻolokaholó ki he ngaahi fale fakataha-lahí.
5. ʻE lava fēfē ke tau kamata teuʻi hotau lotó ki he fakataha-lahí?
5 Fanongo pea Ako: Naʻe teuʻi fakamātoato ʻe ʻĒsela ʻa hono lotó ke ne tali ʻa e folofola ʻa e ʻOtuá. (Esela 7:10) Naʻá ne ofeʻi ʻa hono lotó ki he ngaahi akonaki ʻa Sihová. (Pal. 2:2) ʻE lava ke tau kamata teuʻi hotau lotó ki he fakataha-lahí naʻa mo e ʻi he ki muʻa ke tau mavahe mei ʻapí ʻaki ʻa e fakalaulauloto ki he kaveinga ʻo e fakataha-lahí pea lāulea ki ai mo hotau fāmilí.
6. Ko e hā ʻe lava ke ne tokoniʻi kitautolu ke tauhi maʻu ʻetau tokangataha ki he polokalamá? (Sio ki he puhá.)
6 ʻI ha fuʻu holo lahi, ʻe lava ke lahi ʻa e ngaahi meʻa ke sio ki ai mo e ngaahi ongo ke ne fakaleluʻi ʻetau tokangá. Ko e ngaahi fakalelu peheé ʻe lavangofua ke ne toʻo ʻetau tokangá mei he tokotaha malangá. ʻI he hoko ʻa e meʻa ko iá, ʻoku mole ai ʻa e fakahinohino mahuʻingá. Ko e ngaahi fokotuʻu ʻoku maʻu ʻi he puha ʻoku ʻoatu hení ʻe lava ke ne tokoniʻi kitautolu ke fakaleleiʻi ʻetau tokangá.
7, 8. ʻE lava fēfē ke tau fakahaaʻi ʻa e fakaʻatuʻi ki he niʻihi kehé, pea ko e hā ʻa e tokonaki ʻoku ala maʻu ki he faʻahinga ʻoku ʻikai lelei ʻenau fanongó?
7 Fakahāhā ʻa e Fakaʻatuʻi ki he Niʻihi Kehé: ʻE lava ke ngāueʻaki ʻa e ngaahi meʻa-faitaá mo e ngaahi meʻa-faitā vitioó ʻi he lolotonga ʻa e polokalamá, ka ke fakaʻehiʻehi mei hono fakahohaʻasi ʻa e niʻihi kehé, fai pē ia mei ho nofoʻangá pē. Ko e ngaahi telefoni selulaá mo e pipá kuo pau ke seti ia ke ʻoua te ne fakahohaʻasi ʻa e niʻihi kehé. Ki he ʻaonga maʻá e faʻahinga ʻoku ʻikai lelei ʻenau fanongó, ʻe fakamafola ʻa e polokalamá ʻi he feituʻu faiʻanga fakataha-lahí fakafou ʻi he letiō FM ʻi he ngaahi fakataha-lahi lalahi kotoa pē. Ko ha fanongonongo ʻe ʻomai ai ʻa e ngaahi fakaikiiki ʻoku fiemaʻú ʻe fai ia ʻi he kamata ʻa e konga ʻuluakí. ʻE fiemaʻu ke ke ʻomai hoʻo meʻa fanongo FM siʻisiʻi fakataha mo hono uaea fanongo. ʻOku ʻikai totonu ke fakahoko ha meʻa ngāue fakafoʻituitui ki he sisitemi fakaʻuhila pe meʻa fakaleʻolahi ʻa e faiʻanga fakataha-lahí.
8 He fakatuʻotuʻa atu ē ko kitautolu ke fakatahataha fakataha ke fakahīkihikiʻi ʻa Sihová! ʻOfa ke tau fakapapauʻi ke fakalāngilangiʻi ia ʻaki hono maʻu ʻa e konga kotoa, ʻaki ʻa e fanongo tokanga, pea ʻaki ʻa hono ngāueʻaki ʻa e meʻa ʻoku tau akó.—Teu. 31:12.
[Puha ʻi he peesi 3]
Fanongo ʻi he Ngaahi Fakataha-Lahí
▪ Fakalaulauloto ki he ngaahi kaveinga malangá
▪ Sio ki he ngaahi konga Tohitapú
▪ Hiki ha nouti fakanounou
▪ Fakamavaheʻi ʻa e ngaahi poini ke ngāueʻakí
▪ Fakamanatu ʻa e meʻa ʻokú ke akó