“Tau Hakeakiʻi Hono Huafa Fakataha”
1. Ko e hā ʻa e faingamālie te tau maʻu ke hakeakiʻi fakataha ai ʻa e huafa ʻo e ʻOtuá, pea ko e hā ʻe lava ke tau fai he taimí ni ke teuteu atu ki aí?
1 “Mou kau mo au ke viki ʻa Sihova, pea tau hakeakiʻi hono huafa fakataha,” ko e hiva ia ʻa e tokotaha-tohi-sāmé. (Sāme 34:3) Ko ʻetau Fakataha-Lahi Fakavahe “ʻAʻeva mo e ʻOtuá” hoko maí ʻe ʻomai ai kiate kitautolu ha faingamālie ke hakeakiʻi fakataha ai ʻa e huafa ʻo Sihová fakataha mo hotau fanga tokoua mo e fanga tuofāfine mei he ngaahi fakatahaʻanga lahi. Kuó ke fai ʻa hoʻo ngaahi fokotuʻutuʻu ki he ngaahi nofoʻangá, fefonongaʻakí pea mo e taimi ʻatā mei he ngāue fakamāmaní? ʻOku fakapotopoto ke tau tokanga tokamuʻa ki he ngaahi meʻá ni.—Pal. 21:5.
2. Ko e hā ʻoku ʻaonga ai ke palani ke aʻu tōmuʻa ki he faiʻanga fakataha-lahí?
2 Aʻu ki he Faiʻanga Fakataha-Lahí: ʻOku lahi ʻa e ngaahi meʻa ke tokanga ki ai ʻi he taimi ʻoku tau maʻu ai ha fakataha-lahi. Ko e mavahe tōmuʻa mei ʻapí ʻe tokoni ia kiate kitautolu ke fekuki ai mo ha ngaahi tautoloi taʻeʻamanekina pea te tau malava ai ke maʻu hotau ngaahi nofoʻangá ki muʻa ke kau loto-ʻaufuatō ʻi he hiva mo e lotu kamatá. (Sāme 69:30) Ko ha ngaahi miniti siʻi ki muʻa ke kamata ʻa e kongá, ʻe tangutu ai ʻa e tokotaha-seá ʻi he peletifōmú lolotonga ʻa e tā ʻa e fasi talateu ʻo e Puleʻangá. ʻOku totonu kiate kitautolu kotoa ke tangutu ki hotau ngaahi nofoʻangá ʻi he taimi ko iá koeʻuhí kae lava ke kamata ʻa e polokalamá ʻi ha founga fakangeingeia.—1 Kol. 14:33, 40.
3. ʻE lava fēfē ke tau fakahā ʻa e fakaʻatuʻi ki he niʻihi kehé ʻi hono kumi ʻa e ngaahi nofoʻangá?
3 ʻOku naʻinaʻi mai kia kitautolu ʻa e Folofola ʻa e ʻOtuá ke ‘ʻilonga haʻatau meʻa ʻe fai, fai pe ʻi he ʻofa.’ (1 Kol. 16:14) ʻI he taimi ʻe fakaava ai ʻa e matapaá ʻi he 8:00 pongipongi, ko e fakaʻatuʻi ki he niʻihi kehé ʻe taʻofi ai kitautolu mei he lele, fakavavevave pe feteketekei ʻi ha feinga ke maʻu ʻa e ngaahi nofoʻanga ʻoku tau filí ki muʻa ia ke maʻu ʻe he niʻihi kehé. ʻE taʻofi nai ʻa e ngaahi nofoʻangá ki he faʻahinga pē ʻokú ke fononga mai mo ia ʻi he meʻalele tatau pe nofo fakataha mo ia ʻi he ʻapi tataú.—1 Kol. 13:5; Fili. 2:4.
4. Ko e hā ʻa e ngaahi fokotuʻutuʻu ki he mālōlō hoʻataá, pea ʻoku ʻaonga fēfē ʻa e meʻá ni?
4 Kātaki ʻo ʻomai ha kai hoʻatā kae ʻoua ʻe mavahe mei he faiʻanga fakataha-lahí ke maʻu ha meʻakai he lolotonga ʻa e mālōlō hoʻataá. ʻE fakaʻatā ai heni kitautolu kotoa ke maʻu ha feohi fakatupu langa hake pea ke ʻi ai mei he kamataʻanga pē ʻo e konga efiafí. Kapau ʻe fiemaʻu, ʻe lava ke ngāueʻaki nai ha kiʻi kula siʻisiʻi ʻa ia ʻe lava ke tuku ʻi he lalo nofoʻangá. Ko e ngaahi kula lalahí, ngaahi ipu sioʻatá mo e ngaahi inu ʻolokaholó ʻoku ʻikai ngofua ia ʻi he fale fakataha-lahí.
5. Ko e hā ʻa e tokonaki kuo fai maʻá e faʻahinga ʻoku ʻikai lelei ʻenau fanongó?
5 Ke ʻaonga ki he faʻahinga ʻoku ʻikai ke lelei ʻenau fanongó, ʻe fakamafola ʻa e polokalamá ʻi ha peau fakaletiō FM ʻi he feituʻu he holó. Ko ha fanongonongo fekauʻaki mo e meʻá ni ʻe fai ia ʻi he kamata ʻo e konga ʻuluakí. Ke ngāueleleiʻaki ʻa e tokonaki ko ʻení, ʻe fiemaʻu ke ke ʻomai hoʻo meʻa fanongo FM siʻisiʻi fakataha mo hono meʻa fanongo.
6. ʻE lava fēfē ke tau teuteuʻi hotau lotó ki he fakahinohino te tau maʻú?
6 Ko ha Kātoanga Fakalaumālie ʻOku Fakatatali Mai kia Kitautolu: Ko Tuʻi Sihosafate ʻa e tokotaha naʻá ne “teuteu [hono] loto ke kumi kia Jihova.” (2 Kal. 19:3, PM) ʻE lava fēfē ke tau teuteuʻi hotau lotó ki muʻa he fakataha-lahí? Ko e ongo kupu ʻi he peesi fakamuimui ʻo e ongo ʻīsiu ʻo e Awake! ʻo Mē 22 mo e Sune 8 ʻoku ʻomai ai ha tomuʻa vakai ki he kātoanga fakalaumālie ʻe ʻomai aí. Ko e hā ʻoku ʻikai ke ke vaheʻi ai ha taimi ke fakalaulauloto ki he ongo kupu ko iá, ʻo fakatupulekina ai ʻa e fakatuʻamelie ki he meʻa kuo tuku tauhi mai ʻe Sihova maʻa kitautolú? Ko hono teuteuʻi hotau lotó ʻoku toe kau ki ai ʻa e kole kia Sihova ke tokoniʻi kitautolu ke maʻu ʻa e ʻuhinga ʻo e fakahinohino te tau maʻú pea ke ngāueʻaki ia.—Sāme 25:4, 5.
7. Ko e hā ʻetau holí, pea ko e hā hono ʻuhingá?
7 ʻOku tau holi kotoa ke ako lahi ange mei he Folofola ʻa e ʻOtuá, ʻi hono ʻiloʻi fakafou ʻi aí ʻe lava ke tau tupu ai ʻo aʻusia ʻa e fakamoʻuí. (1 Pita 2:2) Ko ia ai, ʻofa ke tau ʻi ai ʻi heʻetau Fakataha-Lahi Fakavahe “ʻAʻeva mo e ʻOtuá” pea ‘hakeakiʻi fakataha ai ʻa e huafa ʻo Sihová.’—Sāme 34:3.
[Puha ʻi he peesi 3]
Ngaahi Founga ke Hakeakiʻi Ai ʻa e Huafa ʻo e ʻOtuá
◼ Palani ki muʻa
◼ Fakahā ʻa e ʻofa ki he niʻihi kehé
◼ Teuteuʻi ho lotó