Fanongo pea Ako
1. Ko e hā ʻe fiemaʻu nai ai ha feinga lahi ange ke fanongo pea ako ʻi he fakataha-lahi fakavahé?
1 ʻOku vavé ni ke kamata ʻa e fakataha-lahi fakavahe 2013. Ko e ngāue lahi kuo fai ki hono teuteu ha polokalama ke feau ʻa e ngaahi fiemaʻu lolotonga ʻi he māmaní. Kuó ke fai ha fokotuʻutuʻu ke ʻi ai kotoa he ʻaho ʻe tolu ʻo e fakataha-lahí? Ko e ngaahi fakataha-lahi lalahí ʻoku lahi hono ngaahi fakahohaʻá, ko ia ʻoku fiemaʻu ha feinga lahi ange ke fai ha tokanga lelei ki he polokalamá. Koeʻuhi ko e ngaahi kongá ʻoku lōloa ange ʻi he ngaahi fakataha ʻa e fakatahaʻangá, ko e tokangatahá kuo pau ke lōloa ange. Tānaki atu ki ai, ko e fefonongaʻakí mo e ngaahi meʻa kehe ʻoku fakatupunga helaʻia nai. Ko e hā te ne tokoniʻi kitautolu ke nofoʻaki ʻāʻā koeʻuhi ka tau lava ʻo fanongo pea akó?—Teu. 31:12.
2. ʻE lava fēfē nai ke tau teuʻi hotau lotó ki he polokalama fakataha-lahí?
2 Ki Muʻa ke Kamata ʻa e Fakataha-Lahí: Ko ʻetau Uepisaiti fakaʻofisialé, www.jw.org ʻoku ʻi ai ʻa e polokalama fakataha-lahí, ʻa ia ʻoku kau ai ʻa e ngaahi kaveinga kotoa ʻo e malangá mo e konga Tohi Tapu tefito ʻe taha pe ua ki he malanga taki taha. Kapau ʻoku tau lava ʻo ngāueʻaki ʻa e ʻInitanetí, ko hano tomuʻa vakaiʻi ʻa e fakamatalá ni te ne tokoniʻi kitautolu ke teuʻi hotau lotó ki ai. (ʻĒsela 7:10) Lolotonga hoʻo efiafi Lotu Fakafāmilí, ʻe lava ke ke vaheʻi ha taimi ke langa hake ha fakatuʻamelie ki he polokalama ʻoku teu ke hokó?
3. Ko e hā te ne tokoniʻi kitautolu ke fanongo tokangá?
3 Lolotonga ʻa e Polokalamá: Kapau ʻoku faingamālie, ngāueʻaki ʻa e falemālōloó ki muʻa ke kamata ʻa e polokalamá. Tāmateʻi hoʻo telefoni toʻotoʻó koeʻuhi ke ʻoua ʻe fakahohaʻasi koe ʻe ha tā pe ʻoatu pōpoaki pe fakataueleʻi koe ke ʻave pōpoaki holo lolotonga ʻa e polokalamá. Pea kapau ʻoku fiemaʻu ke moʻui hoʻo telefoní, ʻai ia ke ʻoua te ne fakahohaʻasi ʻa e niʻihi kehé ʻo ka tā mai ha taha. Kapau ʻokú ke ngāueʻaki ha ipad lolotonga ʻa e polokalamá, fai ia ʻi ha founga ʻe ʻikai fakahohaʻasi ai ʻa e niʻihi kehé. Fakaʻehiʻehi mei he kai pe inu lolotonga ʻa e polokalamá. (Koh. 3:1) Tokangataha ki he tokotaha-malangá. ʻI he lau ha konga Tohi Tapu, muimui ai ʻi hoʻo Tohi Tapú. Hiki ha nouti nounou.
4. ʻE lava fēfē ʻa e ngaahi mātuʻá ʻo tokoniʻi ʻenau fānaú ke fanongo pea akó?
4 ʻOku tau toe fiemaʻu foki ʻetau fānaú ke fanongo pea ako. ʻOku pehē ʻi he Palōveepi 29:15: “Ko e tamasiʻi ʻoku tukuange noa ʻoku ne fakamaaʻi ʻene faʻe.” Ko ia ai, ʻoku lelei ki he ngaahi fāmilí ke tangutu fakataha koeʻuhi ke lava ʻe he ongo mātuʻá ʻo fakapapauʻi ko ʻenau fānaú ʻoku tokanga lelei ki he polokalamá kae ʻikai ko e talanoa, feʻaveʻaki pōpoaki pe lue takai holo. Neongo kapau ʻoku nau kei iiki ke mahinoʻi e meʻa kotoa ʻoku lāulea ki aí, ʻoku lava ke akoʻi e fānaú ke hanganaki ʻāʻā mo tangutu fakalongolongo.
5. Ko e hā ʻoku ʻaonga ai ke fakamanatu ʻa e polokalamá pea ʻe lava fēfē nai ke fai ení?
5 ʻI he ʻOsi e Polokalamá he ʻAho Taki Taha: ʻOua ʻe fuʻu ʻā fuoloa. Mohe efiafia ke maʻu ha mālōlō feʻunga. Ko hono fakamanatu ʻa e meʻa naʻá ke fanongo aí ʻe tokoniʻi koe ke manatuʻi fuoloa ange. Ko ia ai, ʻe ʻaonga ke vaheʻi ha ngaahi miniti ke lāulea ki he polokalamá ko ha fāmili ʻi he efiafi taki taha. Kapau te ke ʻalu ki he falekaí mo e kaungāmeʻá, fēfē ke ʻave hoʻo noutí pea vahevahe ha poini ʻe taha pe ua ʻoku tautefito hoʻo saiʻia aí? ʻI hoʻo foki ki ʻapi mei he fakataha-lahí, ʻe lava ke ke fakamoleki ha taimi lolotonga hoʻo efiafi Lotu Fakafāmilí ke lāulea ki he founga ke ke ngāueʻaki ʻa e fakamatalá ʻi he tuʻunga ko ha fāmili. ʻE toe lava ke ke vaheʻi ha taimi he uike kotoa ke fakamanatu ha konga ʻi ha meʻa naʻe tukuange foʻou mai.
6. ʻOku feʻunga pē ʻa e ʻi ai he fakataha-lahí? Fakamatalaʻi.
6 ʻE ʻikai fuʻu ʻaonga ʻa e teuteú kapau ʻe ʻikai ke kai pea fakamolū. ʻE lava ke leaʻaki ʻa e meʻa tatau fekauʻaki mo e kai fakalaumālié ʻa ia ʻe fai he fakataha-lahi fakavahé. ʻOfa ke tau maʻu ʻaonga kakato ʻaki ʻa e ʻi ai ʻi he konga taki taha, fanongo tokanga pea ngāueʻaki ʻa e meʻa ʻoku tau akó.