“Fakataha Mai ʻa e Kakai”
1. Ko e hā ʻa e faitatau ʻo e fakataha lahi fakavahé mo e fakavahaʻapuleʻangá ki he fakataha mahuʻinga ʻa e kau ʻIsilelí ʻi he hili pē ʻenau mavahe mei ʻIsipité?
1 Taimi siʻi pē mei heʻenau mavahe mei ʻIsipité, naʻe fakahinohino ʻe Sihova kia Mōsese ke “fakataha mai ʻa e kakai” ki he Moʻunga Sainaí ke fanongo ki Heʻene ngaahi leá ke nau manavahē kiate Ia pea akoʻi ʻenau fānaú ki Heʻene ngaahi foungá. (Teu. 4:10-13) He kātoanga fakangalongataʻa mo fakatuimālohi ē! Lolotonga ʻo e ngaahi māhina siʻi ka hokó, ʻe fakatahataha ʻa e kakai ʻa Sihová ʻi he ngaahi fakataha lahi fakavahe mo fakavahaʻapuleʻanga ke akoʻi kinautolu ʻe Sihova. Ko e hā e meʻa kuo pau ke tau fai koeʻuhí ke tau maʻu ʻaonga kakato mei ai?
2. Ko e hā e meʻa kuo pau ke tau fai ke ‘mateuteu’ ai ki heʻetau fakataha lahí?
2 ‘Mateuteu’: Naʻe fekau ʻe Sihova ʻa e kau ʻIsilelí ke nau ‘mateuteu’ ki he fakatahataha fakahisitōlia ʻi he Moʻunga Sainaí. (ʻEki. 19:10, 11) ʻI he tuʻunga meimei tatau, ʻoku fiemaʻu ʻaupito ʻa e mateuteu leleí ki he faʻahinga kotoa te nau maʻu ʻa e ngaahi fakataha lahí, kae ʻikai ko e faʻahinga pē ʻe ʻi ai ʻenau konga ʻi he polokalamá. Ko e fakatātaá, ko e tokolahi ʻe fiemaʻu ke nau fokotuʻutuʻu ke poaki mei heʻenau ngāue fakamāmaní. Mahalo ʻe tatau ho tuʻungá mo Nehemaia. Naʻá ne fiemaʻu ke tukuange ʻene ngāue ko ha tokotaha lingi kava kia Tuʻi ʻAtasease kae malava ke ʻalu ki Selusalema ke tokoni ki hono toe langa ʻo e ʻaá, ka naʻá ne ʻilo mahalo ʻe ʻikai loto ki ai ʻa e tuʻí. Naʻe fai ʻe Nehemaia ha lotu peá ne fakahaaʻi loto-toʻa ʻene kolé ʻi he anga-fakaʻapaʻapa. Naʻe fakangofua ia ʻe he tuʻí ke ʻalu peá ne toe poupou ki he ngāue langá! (Nehe. 2:1-9) ʻIkai ngata pē hoʻo poaki ki he pule ngāué, kuo ʻosi maau hoʻo ngaahi fokotuʻutuʻu ki he fefolauʻakí mo e nofoʻangá? ʻE fiefia ʻa e kau mātuʻá ke tokoni ki ha tokotaha pē te ne fiemaʻu nai ha tokoni. Palani ke aʻu tōmuʻa ki he ngaahi konga taki taha, pea mateuteu “ke tau tokanga ʻo lahi ange” ki he meʻa te tau fanongo ki aí.—Hep. 2:1.
3. Ko e hā te ne tokoniʻi kitautolu ke teuteu hotau lotó ki he polokalamá?
3 Ko e tafaʻaki mahuʻinga ʻe taha ʻo ʻetau mateuteú ʻoku kau ki ai hono teuteu hotau lotó ke tau fanongo mo ako. (ʻĒsela 7:10) Ko e polokalama ki he fakataha lahí ʻe hā tokamuʻa atu ʻi he Uepisaiti jw.org pea ʻe fakahaaʻi ai ʻa e kaveingá fakataha mo e konga Tohi Tapu tefito ʻe taha pe ua ki he ngaahi malanga taki taha. ʻOku ʻomai ai heni ha fakamatala mahuʻinga ʻe lava ke tau lāulea ki ai lolotonga ʻetau efiafi Lotu Fakafāmili fakauiké ʻo aʻu ki he taimi ʻe fai ai ʻa e fakataha lahí. ʻOku hiki tatau ʻe he kau malanga ʻe niʻihi ʻa e polokalamá pea ngāueʻaki ia lolotonga ʻa e fakataha lahí.
4. ʻE lava fēfē ke ngāueʻaki ʻe he ngaahi mātuʻá ʻa e fakataha lahí ke akoʻi ai ʻenau fānaú?
4 ‘Akoʻi Hoʻo Fānaú’: Ko e taha e taumuʻa tefito ʻo e fakataha lahi ʻi he Moʻunga Sainaí, ki he ngaahi mātuʻa ʻIsilelí ‘ke akoʻi ʻenau fanaú.’ (Teu. 4:10) Ko e fakataha lahí ʻoku ʻomai ai ʻa e faingamālie lelei ki he ngaahi mātuʻá ke nau fai ʻa e meʻa tatau. ʻOku totonu ke tangutu fakataha ʻa e ngaahi mātuʻá mo ʻenau fānaú lolotonga ʻa e ngaahi kongá pea tokoniʻi kinautolu ke nau fanongo tokanga. ʻI he fakaʻosinga ʻo e ʻaho taki taha pea ki mui ai lolotonga ʻenau lotu fakafāmilí, ʻe lava ke lāulea fakataha ʻa e ngaahi fāmilí ki he polokalamá.
5. Ko e hā e ʻaonga te tau maʻu ʻi he kau atu ki he fakataha lahi ʻoku teu ke hokó?
5 Ko e fakataha lahi mahuʻinga ʻi he Moʻunga Sainaí naʻe tokoniʻi ai ʻa e kau ʻIsilelí ke nau houngaʻia ʻi honau monū mahuʻinga ʻi he hoko ko e kakai ʻa e ʻOtuá. (Teu. 4:7, 8) ʻI he founga meimei tatau, ko ʻetau fakataha lahi ʻoku teu ke hoko maí ʻoku fokotuʻutuʻu ia ke tau maʻu ʻaonga mei ai. ʻE malava ke tau mavahe mei he toafa anga-fefeka ʻo Sētané ʻi he ʻaho ʻe tolu pea fiefia ʻi he meʻakai fakalaumālie fakaivifoʻou mo e feohi fakatupu langa hake ʻi hotau palataisi fakalaumālié. (ʻAi. 35:7-9) Koeʻuhi ko e ofi mai ʻa e ʻaho ʻo Sihová, ʻofa ke ʻoua te tau liʻaki ʻa e faingamālie ko ení ke kau fakataha ʻi he fefakalototoʻaʻakí!—Hep. 10:24, 25.